1 Timotius 3 - Muna Southern Dialect

Mie so neangkando umati 3:1-7

¹ Nokotuꞌu mpuu bhoasao aini: mie mobhalano lalo naembali neangkando umati nepoindalo kahadhaa mokesa.

² Dadiꞌanomo neangkando umati tabeano mie tapa kodengo-dengono, seemie kaowu hobhineno, nopoolie nofewanaki totono lalono, nokotimbangi, nokoꞌadhati, nohelasi nefotiampe mie weo lambuno, bhe nopande nofofoinaꞌu.

³ Suano dua mie mempohoꞌuno, suano mansoꞌamahano, tamaka momaluno lalo, meowano pometaa, suano meompuno ne dhoi.

⁴ Anoa ini tabeano netaa nofefotuꞌao polambuno, notiangka bhe dofosibhalae anaꞌino.

⁵ Kapaꞌamo ane o mie pae namande namefotuꞌao polambuno wutono, nada amai bhahaa namefotuꞌao umatino Lahataꞌala?

⁶ Mie neangkando umati koise dua kaneꞌo mesuano sarani, bhahasaa nelangke diuno maka nokantibhae kahukumu peda Kafeompuꞌando seetani endefiꞌini.

⁷ Anoa tabeano netaa dua neano we simbalindo umati weo poliwu, keana dofoꞌalae mie bhaino sampe nakumona ne tando kataꞌono Kafeompuꞌando seetani.

Mie so membalino umondofaono umati 3:8-13

⁸ Pedamo dua anaꞌa mie so umondofaono umati tabeano mie metaano diu, koise nokohaꞌa lelando, koise dempohoꞌu, koise dokadau-dau bhe dhoi.

⁹ Andoa tabeano damintahaki kabanarano kaparasaea ne Kristus toka nefekantaleaꞌino Lahataꞌala, maiꞌaono ne totono lalo mongkilo kumatanga-tangano.

¹⁰ Andoa ini naetaa daꞌumudhida kadeki. Ane pae dakodengoa, kaneꞌomo naembali daꞌumondofao umati sigaoꞌano.

¹¹ O hobhinendo dua tabeano mie metaano diu, suano mie pande umbu, tabeano damoolie damewanaki totono lalondo bhe datiparasaea mpuu.

¹² Umondofaono umati tabeano kohobhineno seemie kaowu, namande namefotuꞌao anaꞌino bhe polambuno.

¹³ Kapaꞌamo ane nofoꞌondofao metaa weo umati, damosibhalae maka nadhumulu katangkano lalono naetula-tulaꞌao kaparasaeano ne Kristus Yesus.

Patudhuno suha aini 3:14-16

¹⁴ Bhahi-bhahiꞌae ini abuhiangkoe, mahinggamo weo posahunaꞌaoku nasee-seendai ini amai apoꞌawaangko.

¹⁵ Tamaka ane pae apikihatoko, ingka pandeꞌaanemo nada amai tabeano dadindo mie weo polambuno Lahataꞌala, aituꞌaemo umatino Lahataꞌala dumadino. Intaodiomu umati marasaeano ini tapedamo sandi bhe kampana mekatangkanomo seꞌonu lambu, hampano dofintahaki bhe dodambaꞌao kafoinaꞌuno kabanara.

¹⁶ Kotu-kotuꞌu nobhala mpuu rahasiano agamantoomu ini, Anoa nofotiwoha Wutono nembali manusia, nosakusiiane Rohino Lahataꞌala Anoa ini mie banara, dowohae malaꞌekati, bhihitano dofolelee ne sabhaha bansano liwu tapa mandeꞌaono Lahataꞌala, doparasaeaꞌe ne kosekaꞌewaꞌae dhunia ini, notisangke weo kakalabhia te surugaa.