1 Timotius 2 - Muna Southern Dialect

Sambaheando umati 2:1-7

¹ Kabhao-bhaono aesalo mpuu: foampe kamesalomu, sambaheamu, katondalamu so mie bhaimu bhe katumpuno lalo ne Lahataꞌala so kosasawindo manusia.

² Mesalo so sabhaha kolaki bhe kosasawindo mintahano kuasa weo liwu, neanomo dadintoomu natohopo mpuu weo kofeompuntoomu ne Lahataꞌala bhe podiu metaa ne mie bhainto.

³ Sambaheamo pedando aini metaaꞌano, poangkafiꞌano bhe kapoindalono Lahataꞌala, mosalamati kaitaomu.

⁴ Gaono mpuu Lahataꞌala, kosasawindo manusia dasumalamati bhe damandeꞌao kabanara.

⁵ Kapaꞌamo Lahataꞌala ampamo seemie-mieno, pedamo dua poatoꞌaono manusia bhe Lahataꞌala ampamo seemie-mieno, Anoamo itu manusia Kristus Yesus.

⁶ Anoa ini noowa Wutono mbali katolosino dhosando kosasawindo manusia. Pedamo anaꞌa Lahataꞌala nofotiwohamo kakampuu-mpuuno nofosalamati manusia ne tempo toka nefotantuno.

⁷ Kanandooꞌanomo idi ini nosangke kanau aembali guru bhe rasulu meowano bhihita ne mie suano Yahudi, amoleleanda bhihitano kaparasaea bhe kabanara. Wambaku ini nokotuꞌu, miina akopahaa.

Ehe mengkohando moꞌane bhe hobhine weo sambaheaꞌa 2:8-15

⁸ Dadiꞌanomo gaoku mpuu, ne amai maka dua o moꞌane dasumambahea datumanampe limando mongkilono, koe doꞌamahaa, koe dopotaga-tagalia.

⁹ Pedamo dua hobhine, naetaa daelega saetaaꞌano bhe damake sapantasiꞌano. Wuluno fotu koemo dokini-kiniea, koe depake bulawa tawa muntia, koemo dua depake pakea moꞌaliꞌano.

¹⁰ Tamaka wutondo tadalumegasiane habu metaa, mantasiꞌano mbali seemie hobhine mabhino wutono nofeompu ne Lahataꞌala.

¹¹ Seemie hobhine tabeano nofetingke kafoinaꞌu koemo nediu-diua, tanotuhumo.

¹² Miina aꞌumundaꞌaanda o hobhine damoinaꞌu tawa damahintangi o moꞌane, tabeano dametingke kaowu.

¹³ Kapaꞌamo kabhao-bhaono nefokonandoono Lahataꞌala, ingka Adam makaneꞌo Hawa.

¹⁴ Pakade dua tibhohe-bhoheꞌino ⸤ ne ule⸥ , ingka suano Adam, tamaka o hobhine amaitu, sampe nokangkalaꞌi pahintano Lahataꞌala.

¹⁵ Tamaka mahinggamo nada naꞌa, o hobhine damosalamatie nakoana, sumanomo nokampuu-mpuu lalono weo kaparasaeano ne Kristus, noasiꞌao manusia bhaino, nodadi mongkilo, tangkanomo dadino sapantasiꞌano.