1 Tesalonika 5 - Muna Southern Dialect

Damantaa-ntaa so kahatoꞌano Ompu 5:1-11

¹ Bhahitieꞌi, miina namaraluua taebuhiangkoomu naefie oleono tawa tempono anaꞌa nakumadhadhia.

² Ingka pandeꞌaanemoomu mpuu oleo kahatoꞌano Ompu nada seemie kasoꞌo nomai kohondoꞌa.

³ Ane dopugau, “Ingka notohopo, noꞌamani dadintoomu”, ne naꞌamo dua tambaꞌomo nakumangkanaida balaa kabinasaꞌa, maka paise bhe so lumapanoa. Kadhadhia amaitu tanamisihatoꞌamo nada kaleano hobhine so koanano.

⁴ Ampamo kaowu, bhahitieꞌi, hintimiu miina dumadiomu weo kahohondo, dadiꞌanomo oleo anaꞌa paise nakumakendakoomu nada seemie kasoꞌo.

⁵ Kosasawimiu dadiomu ne mentaleaꞌano, sanea mie ole-oleo. Intaodiomu suano mie kohondoꞌa tawa dumadino weo kahohondo.

⁶ Dadiꞌanomo pae naembalia tadaodo-odo peda mie sigaoꞌano, tamaka tabeano dakodhaga dantumaa-ntaa oleo kahatoꞌano Ompu weo katohono fekihi.

⁷ Kapaꞌamo moodono, doodo kohondoꞌa; mololanuno, dololanu dua kohondoꞌa.

⁸ Tamaka intaodiomu ini, mie ole-oleo, tabeano natumoho fekihintoomu. Damintaha ne kaparasaea ne Ompu bhe kanini kaasi ne mie bhainto; kaparasaea bhe kanini kaasi ini nabentengikoomu tapedamo bhadhu uti nepakendo popahisano. Pakade daposahunaꞌao dua ne kasalamati; kaposahunaꞌao ini somo bentengikoomu tapedamo songkono tantara.

⁹ Kapaꞌamo Lahataꞌala miina nafopili so nofokantibhaꞌao amaha, tamaka so daeꞌawaꞌao kasalamatiꞌa mangkaꞌano ne Yesus Kristus Ompuntoomu.

¹⁰ Anoamo ini mateno so intaodiomu ini, neanomo ne oleo kahatoꞌano dadumadi bhe Anoa, mahinggamo nandoo daoꞌuhi, mahinggamo dua damatemo.

¹¹ Dadiꞌanomo, tabeano potanga-tangahiomu, pofeka-fekatangkaomu lalo, pedamo habumiu ampa aini.

Katangahi kapuliaono 5:12-22

¹² Bhahitieꞌi, taesalo mpuu fosibhalada neangkamiu weo kahadhaano Ompu. Kapaꞌamo andoa dokahadhaa moꞌosa ne olotamiu bhe mbalimo dua tumangahikoomu.

¹³ Feompuniꞌida mpuu weo kanini kaasimiu hampano kahadhaando. Sadhia dadi pometa-metaaꞌomu.

¹⁴ Taesalo dua, bhahitieꞌi, mefeꞌulaiandaomu mie mantawa. Fekatangkaomu lalondo mansoteꞌino. Tulumidaomu mefaraluuno katulumi. Sabahaomu ne sabhaha mie.

¹⁵ Posiꞌondoomu, habu modai koise dobhoosiane dua habu modai, tamaka sadhia uleiꞌomu lalomiu habu metaaꞌomu, sapada-pada hintimiu bhe ne sabhaha mie.

¹⁶ Sadhia fowula lalomiu.

¹⁷ Sambaheaꞌomu kansuhu.

¹⁸ Ne sabhaha waweno dadi mefoampeomu katumpuno lalo, kapaꞌamo anaꞌa kapoindalono Lahataꞌala so hintimiu seꞌiseno bhe Kristus Yesus.

¹⁹ Koe sobueꞌomu kahadhaano Rohino Lahataꞌala.

²⁰ Koe pisakieꞌomu wambado kosuahano peda seemie anabii.

²¹ Tamaka bhahi-bhahiꞌae tabeano damesoloe, metaaꞌano damintahakie.

²² Fekakodoꞌo wutomiu ne sabhaha modaiꞌano.

Kasongkono suha 5:23-28

²³ Sio-siomo wutono Lahataꞌala fowaꞌaono katohopono dadi, namekangkilo lalomiu ampa naongkilo mpuu. Sio-siomo rohi, alusu bhe mbadhamiu nadhumaganie mpuu Lahataꞌala keana nokodengo-dengo ne oleo kahatoꞌano Yesus Kristus Ompuntoomu.

²⁴ Lahataꞌala toka sumaliꞌikoomu nahumabue bhahi-bhahiꞌae naꞌa, hampano nokampuu-mpuu ne dhandino.

²⁵ Bhahitieꞌi, sambahea kainsamiomu bhe insaodi.

²⁶ Fosampe kainsami salam mani peda bhahitie pomoa-moasiꞌaono.

²⁷ Weo neano Ompu aesalo mpuu wambano suha aini dabasaandae kosasawindo bhahitie marasaeano.

²⁸ Sio-siomo sadhia napobhaiangkoomu kabarakatino Ompuntoomu Yesus Kristus.