1 Tesalonika 4 - Muna Southern Dialect

Katangahi dadumadi mongkilo 4:1-12

¹ Panda-pandano bhahitieꞌi, padamo tatangahikoomu nada amai dadumadi damekaꞌia lalono Lahataꞌala. Anaꞌa daanumo habuemoomu. Tamaka aitu taesalo mpuu weo neano Ompu Yesus, nasedhuluꞌa dua kakampuu-mpuuno habumiu naꞌa.

² Ingka pandeꞌaanemoomu katangahi medano ae newaꞌao mani ne hintimiu weo kuasano Ompu Yesus.

³ Kapaꞌamo kapoindalono Lahataꞌala peda aini: dadi mongkilo, maꞌanano dofekakodoꞌo wutondo ne podiu pokawite-wite.

⁴ Seemie-seemie moꞌane naeala bhe hobhineno so wutono maka nadumadi mongkilo ne pomatano Lahataꞌala bhe pomatano manusia.

⁵ Weo dadimiu, koe taangka-angkafimo nafusuuno mbadhamiu, peda nehabundo bansano liwu tapa mandeꞌaono Lahataꞌala.

⁶ Weo diu nepulaoꞌaoku ini, koise dua kokaꞌalaomu ne bhahitiemiu tawa bhohe-bhoheꞌieꞌomu. Ingka endefiꞌini padamo tafodhagakoomu putae Ompu nahumukumu mehabuno kaꞌala medando naꞌa.

⁷ Kapaꞌamo Lahataꞌala miina nafosaliꞌi dadumadi pokawite-wite, tamaka dadumadi mongkilo.

⁸ Dadiꞌanomo ane bhe tumagalino katangahi aini, miina datumagali manusia, tamaka dotagalimo Lahataꞌala maꞌangkoomu Rohino mongkilono.

⁹ Ingka miinamo namaraluua taebuhiangkoomu nada amai pomoni-moniniꞌaoꞌomu sapada-pada hintimiu, mbaꞌinomo wutono Lahataꞌala pada nofoguhukoomu pomoa-moasiꞌaoꞌomu.

¹⁰ Bhahamoa sampe pomoni-moniniomu dua bhe kosasawindo bhahitiemiu marasaeano ne kosekaꞌewaꞌae kadieno Makedonia. Ampamo kaowu, bhahitieꞌi mani, taesalo mpuu nasedhuluꞌa dua kakampuu-mpuuno habumiu naꞌa.

¹¹ Uleiꞌeomu lalomiu dadiomu weo katohopo, koise meꞌatoro dadino mie bhaimu, naetaa gumiuꞌomu so kadadiꞌano wutomiu, peda nefoinaꞌuꞌao mani endefiꞌini.

¹² Ane nada anaꞌa, pae membaliomu wowoꞌono mie bhaimu, dadimiu naetaa ne pomatano mie sigaoꞌano tapa marasaeano ne Kristus.

Kahatoꞌano Ompu 4:13-18

¹³ Bhahitieꞌi mani, gao mani mandeꞌaaneomu mpuu peda amai kolaundo mie marasaeano humunsano dhunia ini, keana nokompeaha lalomiu peda mie sigaoꞌano tapa koposahunaꞌaono ⸤ ne dadi buꞌou⸥ .

¹⁴ Ingka doparasaeaꞌomu Yesus nomate maka suli nodadi. Dadiꞌanomo doparasaeaꞌomu dua, ⸤ humato nasumuli Yesus⸥ Lahataꞌala nawowoꞌoda kosasawindo mie mate marasaeano ne Yesus dapoowa-owa bhe Anoa.

¹⁵ Nefoinaꞌuꞌao mani ini bhoasaono Ompu: ne oleo kahatoꞌano Ompu ⸤ Yesus⸥ , intaodiomu dumadino paise damaꞌinduluki mie toka humunsano wawo dhunia ini.

¹⁶ Wakutuu anaꞌa natifetingke pahinta, malaꞌekati bhalano nakumei bhe duhuleleno Lahataꞌala damuntoe. Ne naꞌamo dua wutono Ompu nasumampu namaiꞌao te surugaa, maka marasaeano ne Kristus toka komate-mateno namaꞌindulu namodadida.

¹⁷ Mada aitu intaodiomu dumadino ne wakutuu anaꞌa datisangke dapoowa-owa bhe andoa te olu ngkapute dasumumpui Ompu te antara. Nadamo anaꞌa daeateomu bhe Ompu ampa suhue dhamani.

¹⁸ Dadiꞌanomo pakeomu bhoasao aini so polawe-lawesiꞌaoꞌomu lalo.