1 Tesalonika 3 - Muna Southern Dialect

Lele metaa neowano Timotius 3:1-13

¹ Panda-pandano kakambano lalo mani miinamo natitagalia. Dadiꞌanomo tafekihie naetaa dahumunsa kainsami tamoisa we kotano Atena,

² maka tatudu bhahitie mani Timotius namai we hintimiu. Anoa ini posabhangkaꞌa mani weo kahadhaa so Lahataꞌala taefolele Bhihita Metaano Kristus. Katituduꞌano ne hintimiu, neanomo namekatangka lalomiu bhe namodhulu kamatangkano kaparasaeamiu ne Kristus.

³ Ane nada anaꞌa, paise bhe so tiundano kaparasaea weo kasabhamiu ini. Ingka pandeꞌaaneomu kasabha ini nopesuamo dua weo patudhuno Lahataꞌala nefotantuno so intaodiomu.

⁴ Nandoo kainsami bhe hintimiu, tafohatokomoomu wawo, intaodiomu ini daeꞌawaomu kakadee-dee. Ampa aitu ingka daanumo nokoꞌulamo.

⁵ Dadiꞌanomo, mbaꞌinomo miinamo natitagalia kakambano lalo mani, tatudumo Timotius, amandeꞌao kaowu koeateno kaparasaemiu. Kapaꞌamo nomihiangkoomu laloku, bhahasaa nopoolikoomu kawudhuno Kafeompuꞌando seetani sampe nasumia-sia kawule mani.

⁶ Ampa aitu Timotius nosulimo we insaodi, neowa lele timoꞌiaꞌaono, leleno kaparasaea bhe kanini kaasimiu. Ambano dua hintimiu sadaa-daa feꞌulai metaa kainsamiomu, nokamba dua lalomiu poꞌawa kainsamiomu, pedamo dua kakambano lalo mani.

⁷ Dadiꞌanomo, bhahitieꞌi, weo sabhaha kaseke bhe kasabha mani, notilawesi dua lalo mani hampano hintimiu bhe kaparasaeamiu.

⁸ Aitu nodadimo toha lalo mani, sumanomo notangka koehemiu weo Ompu.

⁹ Katumpuno lalo mani ne Lahataꞌala pae bhe kokapoꞌaa, hampano kawulano lalo mani ne wiseno Lahataꞌalantoomu miina natikiha-kiha mbaꞌinomo hintimiu.

¹⁰ Mentae mohondo tampuu-mpuunie sepaliꞌa taesalo ne Lahataꞌala, neanomo naembali toha dapoꞌawa-awaomu, tamokapoangkoomu nemokaeꞌaomiu weo kaparasaeamiu.

¹¹ Sio-siomo wutono Lahataꞌala Amantoomu bhe Ompuntoomu Yesus Kristus naelengka kainsami kaangkaꞌa tamai we hintimiu.

¹² Sio-siomo dua Ompu namodhulu kabhalano kanini kaasimiu sapada-pada hintimiu bhe ne sabhaha mie ampa napontalabhi-labhi, pedamo dua kanini kaasi mani ne hintimiu.

¹³ Sio-siomo dua Ompu namekatangka lalomiu, neanomo mongkiloomu bhe paise kodengo-dengoomua ne wiseno Lahataꞌala Amantoomu, ne oleo kahatoꞌano Ompuntoomu Yesus bhe kosasawindo umati mongkilono.