1 Tesalonika 2 - Muna Southern Dialect

Kahadhaano Paulus we Tesalonika 2:1-12

¹ Bhahitieꞌi, ingka pandeꞌaaneomu hato mani ne olotamiu miina nasumia-siaꞌa.

² Ingka pandeꞌaaneomu dua miinaꞌo tamai te hintimiu, padamo dofodee-dee bhe dofompina-mpina kainsami we Filipi. Tamaka bhe katulumino Lahataꞌalantoomu, insaodi taokado taowaangkoomu Bhihita Metaa maiꞌaono ne Lahataꞌala, mahingga dobhahi mewangi kainsami.

³ Katangahi mani ne hintimiu miina namaiꞌao ne fekihi umala, miina dua namaiꞌao ne patudhu pata mongkilo tawa so dafobhohe-bhoheꞌiꞌao.

⁴ Insaodi tapugau suano so tamekaꞌiaꞌao lalondo manusia, tamaka so tamekaꞌiaꞌao lalono Lahataꞌala, umudhinomo totono lalo mani. Kapaꞌamo Lahataꞌala noabhi kainsami nopantasi noposahunaꞌao kainsami Bhihita Metaa tamolelee.

⁵ Ingka pandeꞌaaneomu dua miina sepaliꞌa tamekameko-meko pugau mani, miina dua taefebuniangkoomu patudhu kumadau-dauno. Lahataꞌala sakusii mani.

⁶ Insaodi miina dua taeꞌondofi kapudhi, naetaa namaiꞌao ne hintimiu, naetaa ne mie sigaoꞌano, mahinggamo insaodi rasuluno Kristus sakotuꞌuꞌano takohaku taesalo ne hintimiu.

⁷ Nomalu lalo mani taeate bhe hintimiu, tapedamo seemie ina nodambaꞌao anano.

⁸ Kabhalano kanini kaasi mani ne hintimiu, sampe tahelasimo suano kaowu tafohatoangkoomu Bhihita Metaa, tamaka tahelasimo dua tawaꞌangkoomu dadi mani. Kapaꞌamo taoasiangkoomu sepaliꞌa.

⁹ Bhahitieꞌi, tetewei nandoo dua feꞌulaiꞌeomu kaꞌosano taꞌulei bhe tafekawule-wule. Mentae mohondo takahadhaa taeꞌondofi kadadiꞌa mani keana taembali wowoꞌomiu, poowa taefoleleangkoomu Bhihita Metaa maiꞌaono ne Lahataꞌala.

¹⁰ Dadi mani ne olotamiu marasaeano ne Kristus nongkilo, nobanara bhe miina nakodengo-dengoa. Ingka kosasawiꞌae ini wohaaneomu wuntano matamiu; ingka Lahataꞌala nosakusiiane dua.

¹¹ Pandeꞌaaneomu podiu mani ne hintimiu seemie-seemie tapedamo seemie ama bhe anaꞌino.

¹² Maꞌanano tatangahikoomu, tafekatangka lalomiu, pakade taesalo mpuu dumadiomu naposahataa bhe kapoindalono Lahataꞌala. Kapaꞌamo Lahataꞌala nosaliꞌikoomu mesuaꞌomu weo Kafopahintaꞌano kumalabhiano.

Kawulano lalono Paulus ne umati 2:13-16

¹³ Dadiꞌanomo, miina bhe katiehea taefoampe katumpuno lalo ne Lahataꞌala, mbaꞌinomo wakutuuno tafohatoangkoomu Bhihitano Lahataꞌala, fetingkeeꞌomu bhe tahimaeꞌomu. Bhihita aini miina mabhieꞌomu wamba maiꞌao ne manusia, tamaka mpuu-mpuuno bhoasaono Lahataꞌala. Ingka daanumo peda anaꞌa. Lahataꞌalamo ini kumahadhaano weo totono lalomiu marasaeano ne Kristus.

¹⁴ Aitu bhahitie mani, namisiemoomu dua nenamisindo tombu-tombudo umatino Lahataꞌala seꞌiseno bhe Kristus we Yudea. Maꞌanano menamisiomu kakadee-dee maiꞌao ne saliwumiu, pedamo dua umatino Lahataꞌala we Yudea denamisi kakadee-dee nomaiꞌao ne miendo Yahudi saliwundo.

¹⁵ Andoamo naꞌa mongkono Ompu Yesus bhe ana-anabii, modee-deenomo dua insaodi. Podiundo maitu miina naoꞌiaꞌane Lahataꞌala, pakade dopomodai bhe sabhaha mie.

¹⁶ Patudhundo daꞌumonto-ontomi kainsami keana taefolele Bhihita Metaa ne bansano liwu suano Yahudi keana dosalamati. Pedamo naꞌa dhosando tadotubha-tubhahimo kansuhu sampe nohato ne kakapoꞌano. Panda-pandano nokangkanaidamo mpuu amahano Lahataꞌala.

Patudhuno Paulus namendua nakumala we Tesalonika 2:17-20

¹⁷ Mahingga peda naꞌa, bhahitieꞌi, notanda dofofosuhu dopogaatiomu endefiꞌini, taꞌuleiꞌe mpuu lalo mani tamendua tapoꞌawaangkoomu, hampano sadhulu-dhulu kakambano lalo mani ne hintimiu. Pogaatintoomu sebantaha ini ne mata kaowu, weo totono lalo miina.

¹⁸ Gao mani mpuu tamaiꞌikoomu; wutoku, Paulus, suano kaowu sepaku afesobae, tamaka noꞌontomi kainsami Kafeompuꞌando seetani.

¹⁹ Kapaꞌamo hintimiumo neposahunaꞌao mani, kaowulaꞌano lalo mani, kaowuleꞌa mani somo kaowoseꞌano bhake mani ne wiseno Ompuntoomu Yesus humato namai. Ane pae hintimiu, laꞌae dua?

²⁰ Nokotuꞌu daanumo, hintimiumo meowa kainsami kakalabhia bhe kawulano lalo.