1 Petrus 4 - Muna Southern Dialect

Dadi buꞌou 4:1-6

¹ Mbadha kamanusiano Kristus nenamisi kakadee-dee, dadiꞌanomo hintimiu dua tetewei fekamatangka fekihimiu so nohelasiꞌao kumadee-deeꞌomu. Kapaꞌamo mie madano menamisino kakadee-deeno mbadha, nokukundomo dhosa.

² Dadiꞌanomo katumpono dadimiu we dhunia ini pakeeꞌomu angkafiomu kapoindalono Lahataꞌala, koise angkafiomu kapoindalono manusia.

³ Ingka endefiꞌini nompona sepaliꞌa angkafiomu kapoindalondo manusia tapa mandeꞌaono Lahataꞌala. Hintimiu angkafiomu sabhaha nafusuu, kapoindalo modai, fohoꞌu ampa mololanuomu, sakahame, mempohoꞌuomu, bhe mesombaiꞌomu barahala timohakuno.

⁴ Ampa aitu mie tapa mandeꞌaono Lahataꞌala tadomente mbaꞌinomo miinamo posabhangkaandaomu weo podiu tampahasa pontalabhi-labhino maitu, katiꞌumbuꞌamiumo.

⁵ Tamaka namada kaowu andoa tetewei dapobhaloꞌao podiundo bhe Lahataꞌala, kapaꞌamo Lahataꞌala nokantaa-ntaamo nabhotusi mie dumadino bhe mateno.

⁶ Kanandooꞌanomo Bhihita Metaa dofolelee dua ne mie mateno. Patudhuno, mbadhando daanumo netompaloimo mate, peda kabhotusino Lahataꞌala so manusia, tamaka rohindo dadumadi naposahataa bhe kapoindalono Lahataꞌala.

Dadindo mie marasaeano ne Kristus 4:7-11

⁷ Kafetompaino bhahi-bhahiꞌae nomaꞌomo. Dadiꞌanomo fewanakie wutomiu bhe kodhagaomu, netaaꞌao sambaheaꞌomu.

⁸ Tamaka fofoliuꞌano, pomoa-moasiꞌao sampuu-mpuuno lalomiu, kapaꞌamo ane dopomoa-moasiꞌao dohelasimo dua dopomaꞌa-maꞌafuꞌao, mahingga nobhahi kaꞌalando.

⁹ Pofoti-fotiampeomu ne lambumiu, koise fedeeꞌomu ane bhe mengkahatono we lambumiu.

¹⁰ Lahataꞌala nowaꞌangkoomu seemie-seemie kapooli poꞌala-alaꞌano. Dadiꞌanomo pake metaaꞌeomu so poꞌondo-ondofaoꞌomu. Ingka hintimiu mie nefoparasaeano Lahataꞌala tumahimano sabhaha katuno kadawuno.

¹¹ Ane seemie neowa kafoinaꞌu, naetaa napugau kanggetumo wambano wutono Lahataꞌala. Ane seemie nofoꞌondofao, naetaa namake kaꞌosa newaꞌaono Lahataꞌala, neanomo ne sabhaha nehabumiu Lahataꞌala damekakalabhiaꞌe namangka ne Yesus Kristus. Ingka Anoamo kokalabhiano bhe kokuasano ampa suhue dhamani. Amin.

Kakadee-deendo mie marasaeano ne Kristus 4:12-19

¹² Bhahitieꞌiku timoasiꞌaono! Koemo menteomua ane menamisiomu kakadee-dee bhalano. Kakadee-dee aitu tapedamo hendeno efi nepakeno Lahataꞌala noꞌudhi kamatangkano kaparasaeamiu. Ampamo kaowu koe kofekihiomu kadhadhia netompaloimiu naꞌa nopontalabhi-labhimo.

¹³ Tamaka fowulae lalomiu, hampano mealaomu dawu weo kakadee-deeno Kristus, neanomo nahumato tempono kakalabhiano Kristus damotiwohae, sedhuluꞌa kaꞌia bhe kawulano lalomiu.

¹⁴ Ane dowambakikoomu mbaꞌinomo angkafiomu Kristus, kodawuaꞌomu. Ingka nokomaꞌanaꞌao Rohino Lahataꞌala kumalabhiano neate weo totono lalomiu.

¹⁵ Koise bhe naseemie ne olotamiu itu so kumadee-deeno mbaꞌinomo nofopongko, tawa nosibu, tawa mie modai, tawa mie mesampuruno urusuno mie bhaindo.

¹⁶ Tamaka ane kumadee-deeꞌomu mbaꞌinomo angkafiomu Kristus, koise moambanoaneomu, tamefoampemoomu katumpuno lalomiu ne Lahataꞌala hampano dokonakoomu mangkafino Kristus.

¹⁷ Aitu nohatomo tempono Lahataꞌala nabhitahakimo dhunia, natumanda ne umatino. Dadiꞌanomo ane kabhitahakino natumanda ne intaodiomu marasaeano, nada amai bhahaa losano mie tapa marasaeano ne Bhihita Metaa?

¹⁸ ⸤ Weo Kitabi notibuhi peda aini,⸥ “Ane mie banara noꞌalimo dasumalamati, o ae bhahaa so kumadhadhiaꞌano ne mie pata meangkano bhe mie kodhosa?”

¹⁹ Dadiꞌanomo ane nandoo kumadee-deeno noposahataa bhe kapoindalono Lahataꞌala, naetaa damotawakala dadindo ne Lahataꞌala bhe sadhia dahumabu metaa. Kapaꞌamo Anoamo Fofokonandoono, nokampuu-mpuu ne dhandino.