1 Petrus 3 - Muna Southern Dialect

Dadindo polambu seꞌonu 3:1-7

¹ Pedamo dua hintimiu hobhineꞌi, tuhuomu ne moꞌanemiu, neanomo ane nandoo ne olotando moꞌaneꞌi maitu tapa marasaeano ne bhoasaono Lahataꞌala, podiu metaamiu somo damarasaeaꞌao, mahinggamo pae metula-tulaomu.

² Kapaꞌamo tetewei damohae kamoindano bhe kalebeno dadimiu.

³ Ane gaomiu membaliomu hobhine mokesa, koise taꞌondafao kaowu kaokesaꞌano fewutoimiu, ibahano legasiꞌano wuluno fotu, pakeꞌa lega bulawa bhe pakea moꞌali.

⁴ Tamaka kakesamiu tabeano namaiꞌao weo totono lalo, o kamalu bhe katohopono lalo. Aini saneamo lega pata mopoopulino, saneamo foliuno kaꞌali ne pomatano Lahataꞌala.

⁵ Ingka pedamo naꞌa hobhineꞌi lumebeno endefiꞌini posahunaꞌaono ne Lahataꞌala. Kaokesaꞌando hampano dotuhu mpuu ne moꞌanendo mbalimo legando.

⁶ Nopototo bhe Sara neangka ne Abraham bhe noabhiemo dua kafeompuꞌano. Hintimiu itu anaꞌino Sara, sumanomo habu metaaꞌomu bhe koise konimoteꞌiomu.

⁷ Hintimiu dua moꞌaneꞌi, fosibhalaeꞌomu namisino hobhinemiu weo dadino polambu. Tandaiꞌeomu andoa maitu miina napototo kaꞌosando bhe hintimiu. Fosibhaladaomu, kapaꞌamo andoa dapoowa-owa bhe hintimiu saneamo so umawano kadawuno Lahataꞌala, maꞌanano dadi suhue dhamani. Dhalangieꞌomu bhahi-bhahiꞌae ini, keana notitee sambaheamiu.

Kanini kaasi bhe pometaa 3:8-12

⁸ Panda-pandano, soba dadi sekakolaloomu, poanta-antangiꞌao namisimiu, pomoa-moasiꞌaoꞌomu peda mie sebhahi-bhahitieno, pomobhe-mobhelaꞌaoꞌomu lalo bhe fekapanda diumiu.

⁹ Kadai koise bhoosianeomu kadai, feꞌawu koise tobhoosianeomu feꞌawu, tamaka mesaloomu kabarakatino Lahataꞌala so mie aitu. Kapaꞌamo dadimo medano aitu katibhasiꞌamiu, somo meꞌawaꞌaoꞌomu kabarakati.

¹⁰ ⸤ Weo Kitabi notibuhi peda aini,⸥ “Ane o mie noasiꞌao dadi metaa bhe nopoindalo kataano namisi, tabeano nadhumagani lelano ne pugau modai bhe wiwino ne wamba kopaha.

¹¹ Habu modai tabeano naꞌumohoe maka nahumabu metaaꞌano; naeꞌondofi pometaa, naꞌumuleiꞌe lalono ampa naꞌumawae.

¹² Kapaꞌamo matano Ompu noangkafi kansuhu mie banara, tingalano sandengi ne mie mekatondalano, tamaka nopoewangi bhe mie humabu modaino.”

Dosabaha weo kakadee-dee 3:13-22

¹³ Laꞌae bhahaa so kopatudhu modaino ne hintimiu ane mokokosoomu humabu metaaꞌomu?

¹⁴ Tamaka mahinggamo kumadee-deeꞌomu hampano angkafiomu kapoindalono Lahataꞌala, ingka kodawuaꞌomu. Dadiꞌanomo koise moteꞌiomu ne laꞌae maka dua, koise tikendaomua.

¹⁵ Fosibhalaomu Kristus weo totono lalomiu, ampamo Anoa so Ompu weo dadimiu. Sadhia mantaa-ntaaꞌomu tumobhoosiomu mie meenaꞌaono kaposahunaꞌao nefintahakimiu itu. Tamaka tobhoosiandaomu kamaluno lalo bhe adhatidaomu.

¹⁶ Ampamo kaowu totono lalomiu kumatanga-tangano, tabeano namoinda. Patudhuno ane o mie daꞌumumbukoomu mbaꞌinomo dadi metaamiu peda mie mangkafino Kristus, tadaoambanoꞌaomo wutondo.

¹⁷ Ane kapoindalonomo Lahataꞌala dakumadee-dee, ingka netaa dokadee-dee hampano dohabu metaa, bhe dokadee-dee hampano dohabu modai.

¹⁸ Kapaꞌamo wutono Kristus nomateꞌao dhosantoomu, sepaku kaowu so suhue dhamani. Anoa mie banara nomateꞌao mie modai. Kamateꞌano ingka so natumondaꞌao hintimiu ne Lahataꞌala. Mbadha kamanusiano dopongkoe, tamaka Rohino Lahataꞌala nofowanue maiꞌao ne mate.

¹⁹ Weo kuasano Rohi anaꞌa Kristus nokala nefolele bhihita ne sabhaha rohi netohongku.

²⁰ Rohi andoa maitu saneamo pata meangkano ne Lahataꞌala ne dhamanino Nuh endefiꞌini. Wakutuu anaꞌa Lahataꞌala nokosabaha noantagi manusia dabhalii diundo, tangasano Nuh nofotoka bhangka bhalano nehabuno. Ne naꞌa seendai kaowu sumalamatino maiꞌao ne luano oe bhalano, kabhahindo dooalu.

²¹ Kadhadhia aitu nembalimo kaꞌibahatino kakadiu sarani, mosalamatikomoomu ampa aitu. Kakadiu sarani miina nakopatudhu namekanggelaꞌi sabhaha mohakuꞌano ne mbadha, tamaka patudhuno desalo kangkilono totono lalo kumatanga-tangano ne Lahataꞌala. Kanandooꞌano bhahi-bhahiꞌae maitu mbaꞌinomo Yesus Kristus nowanumo maiꞌao ne mate.

²² Ampa aitu Kristus nofonimo te surugaa, nengkoha ne suanano Lahataꞌala. Kosasawindo malaꞌekati bhe sabhaha mintahano kuasa bhe kafeompuꞌa dotuhumo ne Anoa.