1 Petrus 2 - Muna Southern Dialect

Kontu dumadino bhe bansano liwu mongkilono 2:1-10

¹ Dadiꞌanomo, ohoeꞌoomu toha sabhaha modaiꞌano, koemo kopahaomu, koemo fehaaꞌulaomu, koemo nokondua lalomiu bhe koemo dua foꞌumbuomua.

² Naetaa membaliomu toha nada anaꞌi kaneꞌo lumenteno, gaono sadhia natumiti. Nadamo anaꞌa hintimiu sadhia meꞌondofiomu so otino alusumiu, neanomo dhulu kamatangka kaparasaeamiu maka sumalamatiomu.

³ ⸤ Kapaꞌamo notibuhi weo Kitabi peda aini,⸥ “Ingka namisiemoomu kataano Ompu.”

⁴ Dadiꞌanomo maꞌotiomu Ompu. Anoamo tapedamo kontu dumadino. Daanumo doꞌohoe manusia, tamaka nopilie Lahataꞌala mbali kontu sandi foliuno kakoharagaa.

⁵ Hintimiu tapedamo dua kontu dumadino, dadiꞌanomo undaomu namakekoomu Lahataꞌala so namoeheꞌao lambu so katisombaiꞌano. Ane nada naꞌa, ingka membalimoomu imamu mongkilono mefoampeno kapopanga posahataano bhe lalono Lahataꞌala noangka ne Yesus Kristus.

⁶ Kapaꞌamo notibuhi weo Kitabi peda aini, “Padamo aepili sepoi kontu koharagaa, ahunsae te kabhawono Sion somo sandi bhalano. Sabhaha mie marasaeano ne Anoa paise nandidikiane lalondo.”

⁷ Kontu anaꞌa nokoharagaa sepaliꞌa so hintimiu marasaeano, tamaka so mie tapa marasaeano nopokantibhamo bhe kabuhino Kitabi peda aini, “O kontu neꞌohondo mefelambuno, ingka nembalimo sandi bhalano.”

⁸ Notibuhi dua, “Kontu aini somo katitunoꞌa, somo dua katifolongkoꞌando mie.” Katitunoꞌando hampano miina daeangka ne bhoasaono Lahataꞌala, pedamo toka nefotantuno Lahataꞌala.

⁹ Tamaka hintimiu bansano liwu tipilino, imamu meompuno ne Omputo, bansano liwu mongkilono, umati fehebuaꞌano wutono Lahataꞌala. Lahataꞌala nopilikoomu bhe nobhasikoomu maiꞌao weo kahohondo pesuaꞌomu weo kantalea kumalabhiano, neanomo moleleeꞌomu sabhaha habuno timenteꞌaono.

¹⁰ Endefiꞌini hintimiu suano umatino Lahataꞌala, ampa aitu membalimoomu umatino. Endefiꞌini miina namasiangkoomu Lahataꞌala, ampa aitu nobhelaangkomoomu lalo.

Palima-limano Lahataꞌala 2:11-17

¹¹ Bhahitieꞌiku timoasiꞌaono! Ngkoha-ngkohamiu te dhunia ini kanggetu mie humampe bhe mie meateno ne koliwuno. Dadiꞌanomo aesalo mpuu, koise angkafiomu kapoindalono wuto, kapaꞌamo sadhia nopoewangi bhe kapoindalono alusu.

¹² Ehe mengkohamiu ne olotando mie tapa marasaeano ne Lahataꞌala tabeano naetaa sepaliꞌa, neanomo ane dakumonakoomu mie modai, ingka damohaꞌao wutondo sabhaha habu metaamiu. Dadiꞌanomo ne oleo kahatoꞌano Lahataꞌala andoa damekakalabhiaꞌe dua.

¹³ Hampano kafosibhalamiu ne Lahataꞌala, tuhuomu ne sabhaha mintahano kuasa ne olotano manusia. Tuhuomu ne Omputo Kaisar, mintahanomo pahinta foliuno kalangke.

¹⁴ Tuhuomu dua ne gubernur nefoeheno Kaisar so dabhotusiꞌao mie modaino diu bhe damosibhalaꞌao mie metaano diu.

¹⁵ Kapaꞌamo patudhuno Lahataꞌala habu metaamiu nadumampu wobhando mie kabhohe-bhohe bhe mohohobuno fekihi.

¹⁶ Dadiomu peda mie bebasi, tamaka koise pakeomu kabebasi aitu somo tingkuno habu modaimiu. Dadiomu peda seemie palima-limano Lahataꞌala.

¹⁷ Fosibhaladaomu kosasawindo mie, moasiandaomu bhahitieꞌimiu, moteꞌiomu ne Lahataꞌala, fosibhalaomu Omputo Kaisar.

Kakadee-deeno Kristus somo sandaha 2:18-25

¹⁸ Bhahitieꞌiku membalino bhatua, tuhuomu ne kafeompuꞌamiu bhe sadhia fotiwohaandae kafosibhalamiu, koise kaowu ne kafeompuꞌa metaa bhe momaluꞌano lalo, tamaka dua ne moꞌosaꞌano lalo.

¹⁹ Ane ne olotamiu nandoo nefodee-dee tamaka miina dakokaꞌalaa, naetaa tadasumabahamo datumongku kakadee-dee anaꞌa, hampano dofeꞌulai Lahataꞌala. Ane humabuomu peda naꞌa, ingka fekaꞌiamoomu lalono Lahataꞌala.

²⁰ O ae bhahaa kapudhiano ane potaamiꞌao kakadee-dee mbaꞌinomo kokaꞌala? Tamaka ane humabu metaaꞌomu maka potaamiꞌao kakadee-deemiu, ingka fekaꞌiamoomu lalono Lahataꞌala.

²¹ Dokosabaha weo kakadee-dee, ingka anaꞌamo katibhasiꞌamiu ne Lahataꞌala, kapaꞌamo wutono Kristus padamo dua nokadee-dee so hintimiu. Pedamo anaꞌa ingka nehunsaangkoomu sandaha so neangkafimiu, tumapiomu koinaꞌano.

²² Anoa miina sepaliꞌa nakodhosaa, miina dua nakopahaa.

²³ Ane dofeꞌawutie, anoa miina nafofeꞌawuti. Wakutuuno dofodee-deeꞌe, miina nafonantiꞌao, tangkanomo bhahi-bhahiꞌae nofosipulie ne Lahataꞌala, Fobhitahakino umadhilino.

²⁴ Mbadhano wutono Kristus notongkue bhahi-bhahiꞌae dhosantoomu, sampe dokantaiꞌe te sau salipu. Patudhuno neanomo intaodiomu dabebasiomu maiꞌao ne kuasano dhosa bhe dadintoomu naposahataa bhe kapoindalono Lahataꞌala. Ingka kakowembe-wembenomo mbadhano Kristus mekaꞌuhikoomu.

²⁵ Kapaꞌamo endefiꞌini hintimiu pedamo dhumba kolilinono, tamaka ampa aitu sulimoomu ne Mie dhumaganikoomu, umondofaono alusumiu.