1 Korintus 9 - Muna Southern Dialect

O haku bhe takano seemie rasulu 9:1-27

¹ Suano mie bebasia gahaꞌa idi ini? Suano dua rasulu gahaꞌa idi ini? Idi kunaꞌekumo padamo dua apowoha bhe Yesus Ompuntoomu. Ingka kunaꞌekumo hintimiumo itu hasilino akahadhaa so Ompu.

² Mahinggamo mie bhaindo miina dakumona kanau rasulu, tamaka so hintimiu idi ini tantumo rasulu. Kapaꞌamo dadimiu peda mie marasaeano ne Ompu ingka o bukutiinomo karasuluꞌaku.

³ Ane bhe so bhitahaki kanau, apotunduꞌao wutoku nada anaꞌa.

⁴ Bhahaa miina takohakua taomaa bhe taohoꞌu hasilino kaowuleꞌa mani?

⁵ Bhahaa miina takohakua taewoowa bhe hobhine mani mie marasaeano peda nehabundo rasulu sigaoꞌano, bhahitieno Ompu Yesus bhe Petrus dua?

⁶ Bhahaa mpahinomo Barnabas bhe idi pata kohakuno so bebasino maiꞌao ne kahadhaa taeꞌondofi nehumaa mani?

⁷ Nandoo bhahaa tantara kumalano popahisano nopake dhoino wutonoa? Nandoo bhahaa mie mekaampo metisano angguru tamaka miina naembalia nohumaa bhakeno angguruno naꞌaa? Nandoo bhahaa mekaendeano dhumba tamaka miina naembali nofohoꞌu oeno titino dhumbano?

⁸ Pugauku ini suano kaowu nomaiꞌao ne fekihindo manusia, kapaꞌamo ingka weo tubhono agama Yahudi notibuhi dua peda anaꞌa.

⁹ Weo Kitabino Musa naꞌa notibuhi peda aini, “Ane o sapi tangasano nefinda-findaꞌi gandum so napogaatiꞌao onuno bhe kunsalono, nunsuno koemo kakompoea.” Bhahaa o sapi kaowu naꞌa nemosabhaꞌaono Lahataꞌala?

¹⁰ Bhahaa bhe intaodiomu dua nepulaoꞌaono naꞌaa? Ingka anoamo, aini notibuhi so intaodiomu. O mie melukuno wite bhe mie pogaatiꞌaono onuno gandum bhe kunsalono, tantumo dokahadhaa weo kaposahunaꞌao tetewei damaꞌanda bhe dawuno kaowuleꞌando.

¹¹ Ingka padamo taeꞌewiangkoomu wine metaa weo dadimiu, nomaiꞌao ne Rohino Lahataꞌala. Bhahaa nopontalabhi-labhimo ane taeꞌawa seendai so kadadiꞌa mani te dhunia ini maiꞌao ne pehapimiu?

¹² Ane mie sigaoꞌano dokohaku daetahima dawundo maiꞌao ne hintimiu, ingka kunaꞌekumo nofoliu dua kakohaku mania. Ampamo kaowu haku aitu miina tamakeea. Insaodi nandoo tapoindalo tasabahaki sabhaha kasabha, sumanomo koe taꞌontomi foleleꞌano Bhihita Metaano Kristus.

¹³ Miina mandeꞌaaneomua bhahaa, o mie kumahadhaano weo Lambuno Lahataꞌala ingka deꞌawa oti nehumaando maiꞌao ne Lambuno Lahataꞌala naꞌa? Bhahaa miina dua mandeꞌaaneomua o imamu mefohilalono medha kaefoampeꞌa ingka deꞌawa dua dawu maiꞌao ne oti kapopanga naꞌa so daomaa?

¹⁴ Pedamo dua aitu Ompu padamo nofotantue, o mie mefoleleno Bhihita Metaa dadumadi namaiꞌao ne foleleꞌano Bhihita Metaa.

¹⁵ Tamaka haku anaꞌa bhe naseꞌise miina amakeea. Pedamo dua abuhi suha aini miina akopatudhu neanomo daꞌumondofa kanau nada naꞌa, kapaꞌamo madaꞌo amate! Bhe naseemie pae bhe so mosalino sabhaha nemowoseꞌaono bhakeku.

¹⁶ Kapaꞌamo ane aefolele Bhihita Metaa maiꞌaono ne Lahataꞌala, miina bhe tingkunoa amowose bhakeku, hampano takakumo tetewei amolelee. Abalaamo mpuu ane paise aefolele Bhihita Metaa!

¹⁷ Ibahano kahadhaa aini ahumabue amangkafi kapoindalono wutoku, tantumo naembali aesalo ponamboku. Tamaka kaefoleleꞌaku Bhihita Metaa suano kapoindaloku wutoku, ingka adhalangi kaowu taka neposahunaꞌaono Lahataꞌala ne idi.

¹⁸ Kaowu o ae bhahaa so ponamboku? Ingka pedamo aini ponamboku: weo foleleꞌano Bhihita Metaa miina aesalo dhoi, hampano hakuku aesalo so kadadiꞌaku miina amakeea.

¹⁹ Idi ini o mie bebasi, suano bhatuando manusia. Ampamo kaowu afobhatua wutoku ne kosasawindo mie, neanomo sedhuluꞌa dua kabhahindo mie so neowaku ne Kristus.

²⁰ Bhe miendo Yahudi adadi peda miendo Yahudi neanomo dabhahi miendo Yahudi so neowaku ne Kristus. Bhe mie mintahakino tubhono agama Yahudi, adadi peda mie mintahakino tubhono agama naꞌa, mahinggamo sakotuꞌuno idi ini miina amintahakie tubhono agama anaꞌa. Kahabuꞌaku peda anaꞌa neanomo dabhahi mie mintahakino tubhono agama Yahudi so neowaku ne Kristus.

²¹ Bhe mie suano Yahudi, adadi dua peda mie suano Yahudi tapa mangkafino tubhono agama Yahudi. Gahaꞌaitumo sakotuꞌuno idi ini miina adumadi we simbalino tubhono Lahataꞌala anaꞌa, hampano aangkafi tubhono Kristus. Kahabuꞌaku peda anaꞌa neanomo dabhahi mie tapa mangkafino tubhono agama Yahudi so neowaku ne Kristus.

²² Bhe mie monaleno kaparasaea, adadi dua peda mie monaleno kaparasaea, neanomo amoolida amowada ne Kristus. Tangkanomo, bhe sabhaha mie aangkafi sabhaha kodadindo, bhahaꞌi kaowu nada amai maka dua dhalano seemie hodua amoolida amowada ne Kristus.

²³ Bhahi-bhahiꞌae ini ahabue hampano Bhihita Metaa so aealaꞌao dua dawu weo kabarakatino.

²⁴ Ingka pandeꞌaaneomu, weo pogolo-goloꞌa kosasawindo mie pogolono sanea dotende, tamaka mpahinomo seemie meꞌawano kawaꞌao so fotalono. Dadiꞌanomo tendeomu ampa kaꞌosano bukumiu so umawaꞌaoꞌomu kawaꞌao anaꞌa.

²⁵ Sasuka mie so meangkafino potandingiꞌa tabeano nokane-kanea mbadhano bhe nopooli nofewanaki totono lalono. Aini dodhalangie so kaowu daeꞌawaꞌao kawaꞌao so fotalono, ingka o kataheno kamba-kamba pikimoleuno. Tamaka intaodiomu dodhalangi bhahi-bhahiꞌae naꞌa so daeꞌawaꞌao kawaꞌao so pata molooleuno ampa suhue dhamani.

²⁶ Dadiꞌanomo miina taꞌatumende-atumendea, bhe miina apotumbu kabunto-buntoa.

²⁷ Idi akanea wutoku: miina aooloanea uluku, afobhatua mbadhaku, neanomo namada aefolele Bhihita Metaa ne mie bhaiku, pae damolimba kanau ne potandingiꞌa.