1 Korintus 8 - Muna Southern Dialect

Oti kapopanga so barahala 8:1-13

¹ Aitu akowambaꞌao oti kapopanga ne barahala. Nandoo mugauno, “Intaodi ini dokokapandemo.” Ampamo kaowu o kapande nofofekalangke diu, tamaka o kanini kaasi nofofekamatangka lalo.

² Mie kofekihino nokonipandeꞌaomo, sakotuꞌuꞌano miinaꞌo namandeꞌaane o ae so mantasiꞌano nepandeꞌaono.

³ Tamaka mie moasiꞌaono Lahataꞌala, nopandeꞌaanemo Lahataꞌala.

⁴ Pokaiꞌano bhe humaaꞌano oti toka nepopanga ne barahala saꞌituini, ingka dopandeꞌaanemoomu sakotuꞌuꞌano miina bhe barahala ne alamu ini, dopandeꞌaanemoomu dua Lahataꞌala Kaseemie-mieꞌano, miina bhe sigaoꞌanoa.

⁵ Kapaꞌamo mahinggamo nandoo nekonando dewa tawa kaompu-ompu naetaa te lani naetaa we dhunia ini (ingka daanumo anoamo, nobhahi dewa bhe kaompu-ompu),

⁶ tamaka so intaodiomu ampamo Lahataꞌala Kaseemie-mieꞌano, Amantoomu. Anoamo mokonandoono bhahi-bhahiꞌae, dadintoomu somo dua Anoa. So intaodiomu Ompu seemie-mieno dua, Yesus Kristus. Noangka ne Anoa bhahi-bhahiꞌae dofokonandooꞌe, hampanomo dua Anoa kadadiꞌantomoomu.

⁷ Tamaka aini miina damandeꞌaane sabhaha mie. Nandoo mie moneano sumombaino barahala endefiꞌini. Dadiꞌanomo, taꞌampamo aitu ane dohumaa oti kapopanga ne barahala, dofekihi lalondo oti maitu kotu-kotuꞌu otino barahala. Ane dohumaa oti pedando maitu, sadhia donamisi wutondo dokodhosa hampano totono lalondo kumatanga-tangano nandoo nonale, ⸤ sadhia notalo⸥ .

⁸ Sakotuꞌuꞌano oti nehumaa miina namekakomaꞌo kaitaomu ne Lahataꞌala. Ane dohumaaꞌe miina dakolabaanea, ane miina daomaaꞌe miina dua daohugianea.

⁹ Tamaka dhaganie mpuu bhahasaa kabebasimiu itu nembali kakodhosaꞌando so mie bhaimu tapaꞌo motangkano kaparasaea.

¹⁰ Ibahano mie bhaimu tapaꞌo motangkano kaparasaea namoha hintu kokapandeno mengkoha-ngkoha momaa weo lambu kasombaiꞌa barahala, ingka anoa itu naokadomo dua naomaa oti kapopanga ne barahala.

¹¹ Ane peda kaowu anaꞌa ingka kapandemu nofobinasamo bhahitiemu pataꞌo motangkano kaparasaea, gahaꞌaitumo Kristus nomate dua so anoa itu.

¹² Ane kodhosaomu ne bhahitieꞌimiu peda anaꞌa bhe bhelaiꞌeomu totono lalondo pataꞌo motangkano kaparasaea, ingka sakotuꞌuno kodhosamoomu dua ne Kristus.

¹³ Dadiꞌanomo ane o oti nehumaa naembali kakodhosaꞌano bhahitieku, akiido sepaliꞌa aomaa oti aitu ampa suhue dadiku, keana aehabu dhosa so bhahitieku naꞌa.