1 Korintus 7 - Muna Southern Dialect

Kafoinaꞌu pokaiꞌano bhe kagaa 7:1-16

¹ Aitu atumobhoosiangkoomu wambano suhamiu ne idi. Ane seemie moꞌane miina nagumaa ingka netaa.

² Ampamo kaowu hampano dolentu balaano dopokawite-wite, naetaa seemie moꞌane bhe hobhineno wutono, seemie hobhine bhe moꞌaneno wutono.

³ Seemie moꞌane tetewei nadhumalangi takano peda seemie moꞌane ne hobhineno; pedamo aitu seemie hobhine tetewei nadhumalangi takano peda seemie hobhine ne moꞌaneno.

⁴ Seemie hobhine miina nakokuasa ne mbadhano wutono tamaka nokuasaiꞌe moꞌaneno; pedamo dua itu seemie moꞌane miina nakokuasa ne mbadhano wutono tamaka nokuasaiꞌe hobhineno.

⁵ Koise pokodoꞌotiomua, simbali padamo mafakaaneomu pogaatiomu sebantaha so meꞌawaomu kasalawa sumambaheaꞌomu. Tamaka mada aitu suli pohompuomu keana nopoolikoomu kawudhuno Kafeompuꞌando seetani, kapaꞌamo bheanea pae moolieꞌomua mewanaki nafusuumiu.

⁶ Apugau peda aini miina amahintangikoomu, tamaka afolalesakoomu.

⁷ Sakotuꞌuꞌano gaoku kosasawindo mie nada dua idi ini, ampamo kaowu ingka seemie-seemie bhe kadawu kamoisaꞌaono maiꞌao ne Lahataꞌala, seemieno peda aini seemieno peda aitu.

⁸ Andoa pata gumaano bhe andoa bhihinandano, amohatoda naetaa koemo dogaaꞌa, pedamo dua idi ini.

⁹ Ampamo kaowu ane pae damooli damewanaki totono lalondo, naetaa dagumaa, kapaꞌamo naetaa dagumaa bhe namohansuruda nafusuundo.

¹⁰ Ne mie toka gumaano bhe pahintaku. Sakotuꞌuno suano pahintaku tamaka pahintano Ompu. Peda aini: o hobhine koise nohunsa moꞌaneno.

¹¹ Ampamo kaowu ane nopohunsamo bhe moꞌaneno koise nogaa toha, simbali sumuli napometaa bhe moꞌaneno. O moꞌane koise dua nopohunsa bhe hobhineno.

¹² Ne sigaoꞌano dua amohatoda (tamaka aini wambaku wutoku, miina namaiꞌao ne Ompu), ane nandoo moꞌane toka gumaano bhe hobhine pata marasaeano ne Kristus, maka hobhine aitu noꞌunda napohempoiane, koise nohunsaea.

¹³ Pedamo dua ane bhe hobhine marasaeano ne Kristus nogaamo bhe moꞌane pata marasaeano ne Kristus, maka noꞌunda napohempoiane, koise nohunsaea moꞌaneno naꞌaa.

¹⁴ Kapaꞌamo moꞌane pata marasaeano naꞌa nongkilomo hampano hobhineno, pedamo dua hobhine pata marasaeano naꞌa nongkilomo hampano moꞌaneno. Ane paise ingka o anamiu sanea anaꞌi haramu, tamaka ampa aitu anamiu ingka sanea anaꞌi mongkilo.

¹⁵ Ampamo kaowu ane mie pata marasaeano naꞌa gaono nahumunsa hobhineno tawa moꞌaneno, koise eleꞌaaneomua. Kapaꞌamo hintimiu moꞌane tawa hobhineno miina titapuomu. Lahataꞌala ingka nobhasikoomu so dumadiꞌaoꞌomu weo katohopono lalo.

¹⁶ Hintu hobhine, nada amai mandeꞌaane bhahaa putae moꞌanemu pataꞌo marasaeano maitu pae mosalamatie? Pedamo dua hintu moꞌane nada amai mandeꞌaane bhahaa putae hobhinemu pataꞌo marasaeano maitu pae mosalamatie?

Kodadi peda pakatandano nofobhasi Lahataꞌala 7:17-24

¹⁷ Dadiꞌanomo seemie-seemie tabeano natumahima kodadi peda toka nedawuꞌaono Lahataꞌala ne anoa, bhe tanamangka-angkamo kansuhu peda kodadi pakatibhasino ne Lahataꞌala. Ainimo tubho nefoinaꞌuꞌaoku ne kosasawindo umati neꞌamai-neꞌamai liwu.

¹⁸ Ibahano seemie pakatibhasino ne Lahataꞌala padamo dosunae, koemo fosaliea kasunano naꞌaa. Pedamo dua pakatibhasino miinaꞌo naesuna, koemo nesalo dasumunae.

¹⁹ Kapaꞌamo doangkafi atorano desuna bhe miina daesuna, saneamo pata kofahalaano. Maraluuꞌano doangkafi pahintano Lahataꞌala.

²⁰ Seemie-seemie tabeano sadaa-daa nadumadi peda kodadino pakatibhasino ne Lahataꞌala.

²¹ Ane pakatibhasimu membali bhatua, ingka pae naoafaa. Ampamo kaowu ane bhe kasalawamu so mobebasiꞌao, pakee kasalawa aitu.

²² Hampano seemie bhatua nebhasino Ompu ingka nofobebasie Ompu. Pedamo dua mie bebasi nebhasino Ompu, ingka nembalimo bhatuano Kristus.

²³ Hintimiu padamo doꞌolikoomu, olimiu padamo dotanduaꞌane. Dadiꞌanomo koemo membaliomu bhatuando manusia bhaimu.

²⁴ Bhahitieꞌiku, naetaa seemie-seemie sadaa-daa nadumadi te wiseno Lahataꞌala peda kodadino pakatibhasino.

Katangahi so pataꞌo gumaano 7:25-40

²⁵ Aitu apugau dua so kalambeꞌi. Daanumo so andoa ini miina bhe pahinta netahimaku maiꞌao ne Ompu. Ampamo kaowu taꞌamolimbaangkoomu dua fekihiku peda seemie tiparasaeano hampano rahamatino Ompu.

²⁶ Fenaiku, hampano sabhaha kasabha newisekintoomu, so metaaꞌano seemie-seemie nadumadi peda kodadino ampa aitu.

²⁷ Ane bhemo mieno lambumu koise pohunsaomu. Ane paeꞌo gumaa, koemo kadeki meꞌondofi hobhinemu.

²⁸ Tamaka ane gumaa, pae kodhosaa. Pedamo dua ane seemie kalambe nagumaa pae nakodhosaa. Ampamo kaowu mie gumaano nabhahi naeꞌawa kasabhano dhunia, sakotuꞌuno gaoku lumapaomu ne kasabha anaꞌa.

²⁹ Patudhuku peda aini: tempono dhamani aini tamo seendai. Dadiꞌanomo ne katumpono wakutuu aini mie kohobhineno naetaa nadumadi kao-kaomo miina bhe hobhineno;

³⁰ moꞌaeno dadumadi kao-kaomo miina daoꞌaea, moꞌiano dadumadi kao-kaomo miina daoꞌiaꞌa, mie toka bhalandano kao-kaomo miina datumahima neꞌolindo,

³¹ bhe mie mepakeno kanandoono dhunia ini dadumadi kao-kaomo miina datitapu ne kanandoo anaꞌa. Kapaꞌamo dhuniantoomu ampa aini kaowu naosalimo.

³² Gaoku mpuu pae bhe kamihino lalo weo dadimiu. Moꞌane tapa gumaano nofisiꞌonu fekihino so Ompu, gaono namekaꞌia lalono Ompu.

³³ Tamaka moꞌane gumaano nofisiꞌonu fekihino ne sabhaha kanandoono dhunia, gaono namekaꞌia hobhineno,

³⁴ sampe fekihino nopodawu-dawumo. Seemie hobhine tapa komoꞌaneno tawa seemie kalambe nofisiꞌonu fekihino so Ompu, neanomo mbadhano bhe alusuno naongkilo namekopuuniane Ompu. Tamaka hobhine gumaano nofisiꞌonu fekihino ne sabhaha kanandoono dhunia, gaono namekaꞌia moꞌaneno.

³⁵ Bhahi-bhahiꞌae ini abuhiangkoeꞌomu so kaetaaꞌano wutomiu, miina akopatudhu aꞌumonto-ontomi kabebasimiu. Patudhuku kaowu neanomo humabuomu metaaꞌano bhe mantasiꞌano, weo kaꞌondofaomiu ne Ompu pae nakambali-mbalia fekihimiu.

³⁶ Ampamo kaowu ane seemie moꞌane nonamisi lalono nohabu pata mantasiꞌano ane pae nagumaa bhe pohaeno, kapaꞌamo wohaꞌano pohaeno sadhulu-dhulu kakamungkula bhe tabeano dagumaamo, heruane ae dagumaa, pae dakodhosaa.

³⁷ Tamaka ane seemie moꞌane padamo nobhotusiꞌao wutono pae nagumaa bhe pohaeno, sumanomo nenteentoomo totono lalono, miina bhe mosuhuea, bhe kotu-kotuꞌu nopoolie nofewanaki kapoindalono, ingka nohabu metaaꞌano dua.

³⁸ Dadiꞌanomo mie gumaano bhe pohaeno nohabu metaaꞌano, tapa gumaano ingka tanodhulumo dua kataano.

³⁹ Seemie hobhine gumaano bhe katapuno kaomponano nodadi moꞌaneno. Ane nomate moꞌaneno, ingka nobebasi nagumaa dua bhe moꞌane nepoindalono, sumanomo mie marasaeano ne Ompu.

⁴⁰ Tamaka fekihiku, sedhuluꞌa dua kakodawuano ane pae nagumaa toha. Fenaiku fekihiku ini nomaiꞌao dua ne Rohino Lahataꞌala netahimaku.