1 Korintus 6 - Muna Southern Dialect

Katangahi koe dobhieꞌao bhahitie ne pande bhitaha 6:1-11

¹ Noafa bhahaa nonandooꞌao ne olotamiu itu mokadono mefebhitahakino ne mie pata mandeꞌaono Lahataꞌala ane nopoꞌalati bhe bhahitieno? Noafa miina mefebhitahakiomu ne umati bhaimiu?

² Miina mandeꞌaaneomua bhahaa mada kaowu so bhitahakino dhunia ini ingka o umati mongkilono Lahataꞌala? Ane mada kaowu bhitahakiomu dhunia ini, noafa bhahaa miina moolianeomu mebhitahakiomu parakara pata koꞌuluꞌa?

³ Miina mandeꞌaaneomua gahaꞌa putae intaodi ini so bhitahakino dua malaꞌekati, bhemo toha parakarano manusia maꞌoleo hangkowine.

⁴ Mahinggamo pedamo itu, ane bhe parakara mohobu noafa gahaꞌa owaeꞌomu dua ne pande bhitaha pata nefosibhala ne olotando umati?

⁵ Kapugauꞌaku peda aini so moambanoꞌaoꞌomu. Bhahaa miina bhe mie kotimbangino ne olotamiu itu so mandeno mebhitahakino parakarando umati?

⁶ Noafa bhahaa seemie bhahitie marasaeano nobhieꞌao dua bhahitieno, gahaꞌaitu so fobhitahakino mie pata marasaeano ⸤ ne Kristus⸥ ?

⁷ Hampano pomobhi-mobhieꞌaoꞌomu kaowu sapada-pada hintimiu, ingka nokomaꞌana seꞌisemo dua katalomiu. Noafa bhahaa ane taꞌotumuhumoomu mahinggamo pae naꞌumadhilia? Noafa bhahaa ane taꞌotumahimamoomu mahingga damekahugikoomu?

⁸ Tamaka wutomiu meowano pata kaꞌadhili bhe kahugi, nehabumiu itu ingka nokantibha bhahitieꞌimiu.

⁹ Miina mandeꞌaaneomua bhahaa putae mie humabu modaino paise daeꞌawa dawu weo Kafopahintaꞌano Lahataꞌala? Koise nokolilino totono lalomiu! Mie pokawite-witeno, mesombaino barahala, mie monsule, karambole moꞌane, gumaano sapada moꞌane tawa hobhine,

¹⁰ kasoꞌo, mie kumadau-dauno, mempohoꞌuno, mie foꞌumbuno, bhe fobhohe-bhoheꞌino saneamo so pata mealano dawu weo Kafopahintaꞌano Lahataꞌala.

¹¹ Ingka seemie hodua ne hintimiu dohabu dua peda anaꞌa endefiꞌini, tamaka ampa aitu padamo dofekanggelaꞌikoomu, padamo dofekangkilokoomu, padamo dua dopometaaꞌangkoomu bhe Lahataꞌala, noangka ne Ompu Yesus Kristus bhe Rohino Lahataꞌalantoomu.

Katangahi pokaiꞌano bhe pokawite-wite 6:12-20

¹² Nandoo mugauno seemie manusia nobebasi nehabu o ae maka dua. Anoamo, tamaka ambaku miina kosasawiꞌae nehabundo manusia nokofahalaa. Mahinggamo abebasi aehabu o ae maka dua, tamaka akiido namobhatua kanau habuku naꞌa.

¹³ Nandoo dua mugauno o oti so iꞌino handa, o handa so kaeateꞌano oti, tamaka ingka kohaahondaꞌae ini sanea namosalie Lahataꞌala. Mbadhando manusia paise naembalia damakee so dapokawite-witeꞌao tamaka so daꞌumondofaoꞌao Ompu, bhe Ompu umondofaono mbadhando manusia.

¹⁴ Lahataꞌala mowanuno Ompu Yesus maiꞌao ne mate, namodadi kaita dua hampano kuasano.

¹⁵ Bhahaa miina mandeꞌaaneomua o mbadhamiu itu ingka o katokanomo dua mbadhano wutono Kristus? Naembali bhahaa katokano mbadhano Kristus amakee so mbadhano karambole? Ingka tantumo paise!

¹⁶ Bhahaa miina mandeꞌaaneomua ane seemie moꞌane nekapoti karambole ingka noseꞌisemo dua bhe hobhine aitu? Kapaꞌamo weo Kitabi notibuhi, “Andoa daembalimo seemie.”

¹⁷ Tamaka o mie kumapotino Ompu ingka noserohimo bhe Ompu.

¹⁸ Fekakodoꞌo wutomiu ne dhosano pokawite-wite, hampano sabhaha dhosa sigaoꞌano nehabundo manusia nokadhadhia we simbalino mbadhando, tamaka o mie pokawite-witeno ingka nokodhosa ne mbadhano wutono.

¹⁹ Bhahaa miina mandeꞌaaneomua mbadhamiu itu lambu mongkilo kaeateꞌano Rohino Lahataꞌala? Rohino Lahataꞌala ini neate weo totono lalomiu bhe nowaꞌangkoeꞌomu wutono Lahataꞌala. Dadiꞌanomo hintimiu itu suanomo fehebuaꞌamiu wutomiu.

²⁰ Kapaꞌamo hintimiu itu padamo doꞌolikoomu, olimiu padamo dotanduaꞌane. Dadiꞌanomo pakeomu mbadhamiu so kakalabhiano Lahataꞌala.