1 Korintus 5 - Muna Southern Dialect

O dhosa bhalano weo umati 5:1-13

¹ Sakotuꞌuno nokolelemo bhihita putae ne olotamiu itu nandoomo habu tolauno kapokahaku. Ingka nandoo mie monsuleno bhe ina weeno. Mahinggamo mie pata mandeꞌaono Lahataꞌala miina daehabua podiu medando aitu.

² Tamaka mahingga pedamo itu nandoo dua nelangke diumiu. So mantasiꞌano ingka tabeano naopea lalomiu, bhe mie humabuno medando itu mogampieꞌomu maiꞌao ne olotamiu.

³ Daanumo mbadhaku nokodoꞌo bhe hintimiu tamaka totono laloku nopobhaiangkoomu. Dadiꞌanomo mie humabuno pedando itu padamo abhotusiane kahukumu, kao-kaomo bhe idi ne itu.

⁴ Ane pohompu-hompuomu weo kuasano Yesus Ompuntoomu, bhe totono laloku nopobhaiangkoomu dua,

⁵ maka weo neano Ompu Yesus mie aitu tetewei tawakalaaneomu ne Kafeompuꞌando seetani, neanomo mbadhano nabinasa tamaka alusuno damosalamatie ne oleo kahatoꞌano Ompu.

⁶ Miina namantasia mekawose bhakemiua. Miina mandeꞌaaneomua gahaꞌa sekandai-ndai ragi noꞌendeanemo kosekabhahiꞌae kadhalono tarigu so roti?

⁷ Ohoeꞌomu ragi ngkodau itu ⸤ kaꞌibahatino dhosa⸥ , neanomo membaliomu nada kadhalono tarigu buꞌou pata koragiꞌano. Ingka hintimiu daanumo pedamo anaꞌa. Kapaꞌamo Kristus, anano dhumbantoomu so kapopanga ne hohaeaꞌano Paska, padamo dosumbelee.

⁸ Dadiꞌanomo poharoa kaitaomu, koe daepake roti koragi ngkodauꞌano, kaꞌibahatino sabhaha mohakuꞌano bhe modaiꞌano. Tamaka mepake kaitaomu roti buꞌou pata koragiꞌano, kaꞌibahatino dadi mongkilo bhe banara.

⁹ Ingka weo suhaku padamo abuhiangkoeꞌomu, koise posabhangkaomu bhe mie pokawite-witeno.

¹⁰ Ampamo kaowu patudhuku suano sabhaha mie ne dhunia ini pokawite-witeno bhe kumadau-dauno, tawa mie fobhohe-bhoheꞌino bhe mesombaino barahala. Kapaꞌamo ane nada naꞌa ingka tabeano gumampianemoomu dhunia inia.

¹¹ Tamaka nebuhiku ini apulaoꞌao koise posabhangkaomu bhe mie mabhino wutono bhahitie marasaeano tamaka nopokawite-wite, nokadau-dau, nesombai barahala, nofoꞌumbu, nempohoꞌu bhe nofobhohe-bhoheꞌi. Mahingga momaa pombaliomu bhe mie medando aitu koise.

¹² Kapaꞌamo bhitahakiꞌando mie we simbalino umati suano nepandeꞌaokua. Tamaka ane umati marasaeano, ingka hintimiu so bhitahakida.

¹³ Mie we simbalino umati nabhitahakida wutono Lahataꞌala. ⸤ Weo Kitabi notibuhi,⸥ “Ambaeꞌomu mie modai ne olotamiu itu!”