1 Korintus 4 - Muna Southern Dialect

Lahataꞌala Kaseemie-mieꞌano Fobhitahakinomo 4:1-5

¹ Naetaa dakumona kainsami palima-limano Kristus, mie neposahunaꞌao taefebhihitaiꞌao sabhaha rahasiano Lahataꞌala.

² Sifati neꞌondofi ne mie neposahunaꞌao peda anaꞌa, ingka o kataino lalono ne kafeompuꞌano.

³ Ane o idi, ingka miina aoheruanea bhitahaki kanauꞌomu hintimiu tawa pande bhitaha sigaoꞌano dua. Bhahamoa miina dua amoꞌala wutoku.

⁴ Daanumo miina amandeꞌao laloku akokaꞌalaa, tamaka aini suano bukutiino putae miina akokaꞌala. Wutono Ompu so motantuno akokaꞌala bhe miina.

⁵ Dadiꞌanomo koise paꞌindulu fobhotusiomu, antagiomu nahumato wutono Ompu. Anoa nalumengkasi sabhaha rahasia tifebunino weo kahohondo. Anoamo dua so tumalesaono sabhaha patudhu weo totono lalondo manusia. Ne naꞌamo seemie-seemie naetahima kapudhi so mantasiꞌano maiꞌao ne Lahataꞌala.

Dadindo rasulu 4:6-21

⁶ Bhahitieꞌiku! Newambaku ini aesandaha ne Apolos bhe wutoku so kaetaaꞌamiu, neanomo naembali metuadaomu bhe poguhuomu maꞌanano wamba aini, “Koe liuꞌea tubho toka tibuhiꞌano!” Ane nada anaꞌa, ne olotamiu itu pae bhe mie nesangke-sangkemiu nalumiuꞌe mie bhaino.

⁷ Kapaꞌamo laꞌae bhahaa kumonako nofoliu kakofahalaamu bhe mie bhaimu? Kona kanaꞌeomu o ae ndumandooꞌano ne hintimiu itu tapa netahimamiu maiꞌao ne Lahataꞌala! Ane kotu-kotuꞌu bhahi-bhahiꞌae tahimaeꞌomu ne Lahataꞌala, noafa bhahaa sangke-sangkeꞌao wutomiu, kao-kaomo bhahi-bhahiꞌae maitu miina tumahimaeꞌomu?

⁸ Ingka fekihimiu moweꞌimoomu, mohangkaeamoomu, membaliomu kafeompuꞌa, ingka miina maraluu kainsamiomua. Kakesa maka ane kotu-kotuꞌu membaliomu kafeompuꞌa, neanomo naembali tamahinta tapoowa bhe hintimiu.

⁹ Kapaꞌamo fenaiku, insaodi rasulu, Lahataꞌala notei kainsami we kundo-kundo, tapedamo mie so nepongko ne wisendo mie bhahi. Insaodi taembali kapokabhidha-bhidhaꞌando dhunia ini, kasimata-mataꞌandomo sabhaha mie bhe malaꞌekati.

¹⁰ Insaodi taobhohe hampano Kristus, tamaka ⸤ ambamiu⸥ hintimiu pandeomu weo kaparasaea ne Kristus. Insaodi taonale, tamaka ⸤ ambamiu⸥ hintimiu moꞌosaomu. Insaodi dobihidhingi kainsami, tamaka ⸤ ambamiu⸥ hintimiu dofosibhalakoomu.

¹¹ Taꞌampamo aitu taoꞌaho bhe nokekele wuꞌu mani, pakea mani tanokobhini-bhinimo, dotofali kainsami bhe tatalilimo miina takolambua.

¹² Insaodi takahadhaa mobhie tapake lima mani. Ane dofeꞌawuti kainsami tafosambaheaꞌao, ane dofodee-dee kainsami tapotaami.

¹³ Ane dofekaꞌaebu kainsami, tatobhoosi meteetaa. Insaodi tapedamo hewuno dhunia ini, taꞌampamo aitu dokona kainsami samahano dhunia.

¹⁴ Abuhiangkoomu aini miina akopatudhu amekaambanokoomua, tamaka atangahikoomu peda anaꞌiku timoasiꞌaono.

¹⁵ Kapaꞌamo mahingga ampa aitu peda mie marasaeano ne Kristus bheanea nehewunomo gurumiu, tamaka amamiu seemie kaowu. Weo kaparasaeamiu ne Kristus Yesus idimo ini amamiu, hampano Bhihita Metaa nefosampeku ne hintimiu.

¹⁶ Dadiꞌanomo aesalo mpuu, angkafiomu sandaha nefotiwohaku!

¹⁷ Kanandooꞌanomo atuduangkoomu Timotius, anaku timoasiꞌaono bhe kumampuu-mpuuno ne Ompu. Anoa nameꞌulaiangkoomu kodadiku peda seemie mangkafino Kristus Yesus, pedamo nefoinaꞌuꞌaoku ne kosasawindo umati ne amai maka kahatoꞌaku.

¹⁸ Ingka nandoomo seemie hodua melangkeno diu, weo fekihindo paemo amai we hintimiu itu.

¹⁹ Tamaka ane Ompu namaꞌa kanau kalalesa, apikimai we hintimiu itu. Ne naꞌamo maka amandeꞌaanda mie melangkeno diu itu bhahaꞌi kuasa ae neꞌawando, suano kaowu taꞌo pugaundo.

²⁰ Kapaꞌamo Kafopahintaꞌano Lahataꞌala miina kaowu natiwoha ne pugaundo manusia, tamaka notiwoha ne kuasano Lahataꞌala ⸤ weo dadindo manusia⸥ .

²¹ Dadiꞌanomo medando ae nepoindalomiu? Tamepilimoomu: amai aeowaangkoomu kapepe, kaa amai amalu-malusikoomu weo kanini kaasi?