1 Korintus 3 - Muna Southern Dialect

Potaga-tagaliꞌa 3:1-9

¹ Bhahitieꞌiku! Wakutuu anaꞌa miinaꞌo naembalia apugau bhe hintimiu peda apugau ne mie toka nekabhintino Rohino Lahataꞌala, tamaka nandoo apugau ne mie nekuasaino kapoindalono dhunia, kao-kaomo hintimiu sadaa-daa kaana-anaꞌi weo kaparasaeamiu ne Kristus.

² Endefiꞌini kao-kaomo afotitikoomu, miinaꞌo amaꞌangkoomu oti motuꞌa, kapaꞌamo miinaꞌo mondoiꞌeomua. Gahaꞌa taꞌampamo dua aitu sadaa-daa miinaꞌo mondoiꞌeomua,

³ kapaꞌamo nandoo nokuasaikoomu kapoindalono dhunia. Ane ne olotamiu nandoo pokondu-konduaꞌao lalo bhe potaga-tagaliꞌa, ingka nokomaꞌana nandoo nokuasaikoomu kapoindalono dhunia, ingka tanopototomo bhe mie bhaimiu ne dhunia ini.

⁴ Ane nandoo pugauno, “Idi ne wetano Paulus,” maka sigaoꞌano nopugau dua, “Idi ne wetano Apolos,” ingka nentaleamo podiumiu tanopototomo bhe mie bhaimiu ne dhunia ini.

⁵ Kaowu laꞌae bhahaa Apolos maitu? Laꞌae bhahaa Paulus maitu? Andoamo itu ingka sanea palima-limano Ompu matokoomu ne kaparasaea ne Kristus. Seemie-seemie nedhalangi kaowu taka peda newaꞌaono Ompu.

⁶ Idi metisano, Apolos tumubhasiane oe, tamaka wutono Lahataꞌala mefotumbuno kantisa.

⁷ Dadiꞌanomo naetaa metisano naetaa metubhasino sakotuꞌuno miina bhe ulu-uluꞌanoa, mpahinomo wutono Lahataꞌala mefotumbuno kantisa.

⁸ Metisano bhe metubhasino ingka tanopototomo kahadhaando, seemie-seemie naꞌumawa ponambono naposahataa bhe kawuleno nokahadhaa.

⁹ Kapaꞌamo insaodi ini taposabha-sabhangka weo kahadhaa so Lahataꞌala, hintimiu itu tapedamo kaampono Lahataꞌala, tapedamo dua lambu so Lahataꞌala.

O lambu bhe sandino 3:10-23

¹⁰ Noposahataa bhe kadawuno Lahataꞌala newaꞌaono ne idi, aembalimo peda pandeno lambu kokapandeno, padamo afongkohae sandino, bhaindo mongkohano lambuno. Ampamo kaowu seemie-seemie tabeano nakodhaga mpuu weo kahadhaano naefoehe lambu te wawono sandi amaitu.

¹¹ Kapaꞌamo bhe naseemie pae bhe so moolino mefongkohano sandi sigaoꞌano we simbalino sandi toka tifongkohaꞌano, o wutono Yesus Kristus.

¹² Taneatemo ne mie mefoeheno lambu te wawono sandi amaitu, naepakeane bulawa tawa o salaka, o kontu moinda tawa o sau, o dana tawa o hoono ai.

¹³ Ampamo kaowu nasewakutuu kahadhaano seemie-seemie tetewei natipandeꞌao, ingka oleo kahatoꞌano Ompu so motiwohaea. Kapaꞌamo ne oleo anaꞌa o efi so motiwohae, hampano kahadhaano seemie-seemie natiꞌudhi katangkano ne efi maitu.

¹⁴ Ane lambu nefoehe maitu pae naomaaꞌe efi, ingka mie kumahadhaaꞌe naꞌumawa ponambono.

¹⁵ Tamaka ane kahadhaano natikantunu, ingka naohugi; ampamo kaowu wutono nasumalamati kanggetumo dohelae maiꞌao weo efi.

¹⁶ Miina mandeꞌaaneomua gahaꞌa putae hintimiu itu Lambuno Lahataꞌala? Miina mandeꞌaaneomua gahaꞌa putae Rohino Lahataꞌala neate weo totono lalomiu?

¹⁷ Ane bhe mie mobinasano Lambuno Lahataꞌala, maka namobinasae dua Lahataꞌala. Kapaꞌamo Lambuno Lahataꞌala nongkilo, ingka hintimiumo itu.

¹⁸ Koise bhe bhohe-bhoheꞌino wutono. Ane ne olotamiu itu bhe kofekihino nopande ne pomatano dhunia, naetaa nasumuli naobhohe so nopandeꞌao sakotuꞌuno.

¹⁹ Kapaꞌamo nekonando kapande we dhunia ini, sanea bhohe ne pomatano Lahataꞌala. Ingka notibuhi weo Kitabi peda aini, “Lahataꞌala nepake kapandedo mie mande mbali tando kakonaꞌando wutondo.”

²⁰ Nandoo dua tibuhino peda aini, “Ompu nopandeꞌaane putae fekihindo mie mande sanea fekihi sia-sia.”

²¹ Dadiꞌanomo koe bhe mesangke-sangkeno manusia bhaino, kapaꞌamo bhahi-bhahiꞌae ingka saneamo fehebuaꞌamiu.

²² Naetaa ndo Paulus, Apolos bhe Petrus, naetaa o dhunia, o dadi bhe mate, sampe dhamani aini bhe oleo mbuhumai ingka saneamo fehebuaꞌamiu.

²³ Tamaka wutomiu itu fehebuaꞌano Kristus, bhe Kristus fehebuaꞌano Lahataꞌala.