1 Korintus 2 - Muna Southern Dialect

¹ Bhahitieꞌiku! Wakutuuno amai we hintimiu bhe afohatoangkoomu bhihitano Lahataꞌala, miina aepake wamba mokesa tawa afotiwohaangkoomu kapandeku.

² Kapaꞌamo tokamo abhotusie kaomponano bhe hintimiu paise amohatoangkoomu sigaoꞌano, mpahinomo bhihitano Yesus Kristus, Anoamo mateno te sau salipu.

³ Wakutuuno amai we hintimiu itu, idi ini aonale sepaliꞌa, bhe nogugu kanau kateꞌi.

⁴ Weo bhihita bhe kafoinaꞌu nefosampeku naꞌa, ingka miina aepake wambado mie mande timohelaꞌaono lalo, tamaka wambaku nopobhaiane tanda-tanda motiwohano kuasano Rohino Lahataꞌala.

⁵ Kanandooꞌano peda anaꞌa neanomo kaparasaeamiu paise naengkoha ne kapandedo manusia, tamaka naengkoha ne kuasano Lahataꞌala.

Kapande maiꞌaono ne Rohino Lahataꞌala 2:6-16

⁶ Mahinggamo peda naꞌa, ne olotando mie toka motangkano kaparasaea insaodi tapugauꞌao dua wambano kapande. Ampamo kaowu kapande aini suano kapandeno dhunia ini, suano dua kapandedo mintahano kuasa ne dhamani aini, kapaꞌamo kuasando andoa ini naosali.

⁷ Wambano kapande nepulaoꞌao mani ini nomaiꞌao ne Lahataꞌala, rahasia aini notifebuni sampe miinaꞌo damandeꞌaane mieno dhunia. Tamaka mpini miinaꞌo bhe dhunia Lahataꞌala tokamo nofontaa-ntaaꞌe mbali intaodiomu, so daealaꞌao dawu ne kakalabhiano Lahataꞌala.

⁸ Miina bhe mintahano kuasa ne dhamani aini lumosangino kapande anaꞌa, kapaꞌamo ane dalumosangie, ingka Ompu Kumalabhiano tetewei paise dakumantaiꞌe te sau salipu.

⁹ Aini noposahataa bhe tibuhino weo Kitabi peda aini, “Pata newohano mata, pata nefetingkeno tingala, pataꞌo dua tiumbaꞌano ne fekihindo manusia, aitumo nefontaa-ntaano Lahataꞌala so mie moasiane.”

¹⁰ Tamaka ne intaodiomu Lahataꞌala padamo nofohato kaitae noangka ne Rohino. Rohino Lahataꞌala ingka nolosangi bhahi-bhahiꞌae, mahingga patudhuno Lahataꞌala tifebuniꞌano sepaliꞌa.

¹¹ Laꞌae bhahaa so mandeꞌaono totono lalono manusia? Ingka tantumo rohino manusia aitu. Pedamo dua aitu miina bhe manusia mandeꞌaono totono lalono Lahataꞌala, mpahinomo wutono Rohino Lahataꞌala.

¹² Intaodiomu miina daetahima rohino dhunia, tamaka netahimantoomu o Rohi maiꞌaono ne Lahataꞌala, neanomo damandeꞌaane sabhaha newaꞌaono Lahataꞌala ne intaodiomu.

¹³ Dadiꞌanomo ane tatalesao sabhaha giu pokaiꞌano bhe Rohino Lahataꞌala, tatalesaane ne mie toka tumahimano Rohino Lahataꞌala, miina taepake wambano kapande nepoguhuꞌao mani ne manusia, tamaka taepake wamba nepoguhuꞌao mani ne Rohino Lahataꞌala.

¹⁴ Mie tapa mandeꞌaono Lahataꞌala nokiido natumahima sabhaha maiꞌaono ne Rohino Lahataꞌala, nokonaemo sanea bhohe. Daanumo miina bhe kapoolinoa nalumosangie, hampano sabhaha maiꞌaono ne Rohino Lahataꞌala naꞌa kaneꞌo dolosangie fahalaano ane dotiisangie noangka ne Rohino Lahataꞌala.

¹⁵ Manusia tumahimano Rohino Lahataꞌala sadhia netiisangi bhahi-bhahiꞌae, tamaka wutono manusia naꞌa miina bhe kohakuno damoꞌalae.

¹⁶ ⸤ Weo Kitabi notibuhi peda aini,⸥ “Laꞌae bhahaa mandeꞌaono fekihino Ompu? Laꞌae bhahaa so moinaꞌuno Ompu?” Tamaka intaodiomu ini, fekihintoomu ingka nopototomo bhe fekihino Kristus.