1 Korintus 16 - Muna Southern Dialect

Katulumindo umati we Yerusalem 16:1-4

¹ Aitu apugauꞌao foꞌonuꞌano dhoi so umati marasaeano ⸤ we Yerusalem⸥ ; naetaa angkafiomu atora nefohatoꞌaoku ne sabhaha tombudo umati we kadieno Galatia.

² Seꞌo-seꞌoleono Ahadhi, seemie-seemie naegaati dhoi seendai, naposahataa bhe hasilino. Dhoi anaꞌa hunsaeꞌomu, neanomo humato amai tokamo natifoꞌonu.

³ Ahumato kaowu atumudumo mie mantasiꞌano ne pomatamiu, amaꞌanda suha dakumala we Yerusalem dawowoꞌo kawaꞌaomiu naꞌa.

⁴ Ane namaraluu akumala dua bhe idi, ingka dapobhai kanau.

Patudhuno Paulus 16:5-9

⁵ Mada amangka we Makedonia amai te hintimiu, kapaꞌamo alumempagi kadieno Makedonia.

⁶ Bheanea aeate namampona-mpona bhe hintimiu, bhahamoa kosekawantaꞌae wulano use. Mada anaꞌa naembali tumulumi kanauꞌomu amopansuhu kala-kalaku.

⁷ Ampa aitu akiido aohakoomu sekabantaha kaowu; aposahunaꞌao ane bhe kalalesano Ompu, naompona seendai aeate bhe hintimiu.

⁸ Tamaka nandoo aeate we kota Efesus ini ampa ne oleono hohaeaꞌano Pentakosta,

⁹ kapaꞌamo we ini nobhahi kasalawa aehabu kahadhaa kofahalaa, mahinggamo dobhahi dua mewangi kanau.

Sehonda haa honda kafohato 16:10-18

¹⁰ Ane Timotius namai te hintimiu, uleiꞌeomu lalomiu keana nokateꞌi-teꞌi naeate bhe hintimiu, hampano anoa itu nokahadhaa so Ompu peda dua idi ini.

¹¹ Dadiꞌanomo koe bhe misakiea. Tulumieꞌomu neanomo nasumalamati namopansuhu kala-kalano, sampe nasumuli ne idi. Aitu nandoo aanta-antagie we ini bhe bhahitieꞌi dua sigaoꞌano.

¹² Pedamo dua bhahitientoomu Apolos, ingka afendu-fenduaꞌemo afeꞌulaiane namai we hintimiu napoowa-owa bhe bhahitie sigaoꞌano, tamaka miina sepaliꞌa naꞌumundaa namai haꞌoleo ini. Ane bhe kasalawa metaa tetewei namai dua.

¹³ Kodhagaomu! Fekamatangka kofindamiu weo kaparasaeamiu! Membaliomu moꞌane! Fekaꞌosa totono lalomiu!

¹⁴ Habueꞌomu sabhaha kahadhaamiu weo kanini kaasi.

¹⁵ Bhahitieꞌiku, tasehonda dua kamesaloku. Ingka pandeꞌaaneomu Stefanus bhe polambuno; andoamo mie kabhao-bhaono marasaeano we Akaya, dokahadhaa sampuu-mpuuno lalondo doꞌondofao umati marasaeano sigaoꞌano.

¹⁶ Dadiꞌanomo aesalo meangkaomu ne mie pedando andoa itu, bhe sabhaha mie kumahadhaa moꞌosano bhe andoa itu.

¹⁷ Aoꞌia sepaliꞌa dohato kanau Stefanus, Fortunatus, bhe Akaikus, kapaꞌamo andoa dofosangka katulumi nemekaemimiu.

¹⁸ Andoa dolawesi totono laloku bhe totono lalomiu dua. Fosibhaladaomu mie pedando andoa itu!

Kasongkono suha 16:19-24

¹⁹ Afosampeangkoomu salam maiꞌaono ne tombu-tombudo umati we kadieno Asia ini. Akwila, Priskila bhe kosasawindo umati humompuno we lambudo dofosampeangkoomu dua salam weo Ompu.

²⁰ Kosasawindo bhahitie ne ini defosampeangkoomu dua salam. Pofea-feabhaomu bhe pomoni-moniniꞌaoꞌomu peda bhahitie pomoa-moasiꞌaono.

²¹ Aini abuhiane limaku wutoku: salam maiꞌao ne idi, Paulus.

²² Laꞌae pata moasiꞌaono Ompu, nobalaamo! Maranata!

²³ Sio-siomo kabarakatino Ompu Yesus sadhia napobhaiangkoomu.

²⁴ Kanini kaasiku nopobhaiangkoomu kosasawimiu weo kaseꞌisentoomu bhe Kristus Yesus.