1 Korintus 15 - Muna Southern Dialect

Kawanuꞌano Kristus maiꞌao ne mate 15:1-11

¹ Bhahitieꞌiku! Aitu ameꞌulaiangkoomu Bhihita Metaa kafosampeꞌaku ne hintimiu bhe netahimamiu. Bhihita Metaa aini ingka kaengkohaꞌanomo kaparasaeamiu.

² Noangka ne Bhihita Metaa aini dofosalamatikoomu, sumanomo fekatangka fintahakieꞌomu, peda toka nefosampeku. Ane paise, ingka nosia-siamo kaparasaeamiua.

³ Fofoliuꞌano kafaraluu padamo afohatoangkoeꞌomu, pedamo dua netahimaku wutoku, putae Kristus padamo nomateꞌao dhosantoomu, noposahataa bhe wambano Kitabi.

⁴ Padamo dua afohatoangkoeꞌomu putae Kristus padamo dokobuhue, maka ne katolu oleono dofowanue maiꞌao ne mate, noposahataa bhe wambano Kitabi.

⁵ Pada anaꞌa nofotiwoha Wutono ne Petrus maka ne anaguhuꞌino ompulu hoduano.

⁶ Kaowu sewakutuu nofotiwohamo dua Wutono ne bhahitieꞌi marasaeano dolima moꞌono labhi, ampa aini nandoo dobhahi dumadino tamaka sigaꞌa dofohunsamo.

⁷ Palusi anaꞌa nofotiwoha Wutono ne Yakobus, maka ne kosasawindo rasulu.

⁸ Maka panda-pandano nofotiwoha dua Wutono ne idi ini, ingka aembalimo peda anaꞌi sumalalenteno.

⁹ Kapaꞌamo idi ini foliunomo kandidiki ne olotando rasulu, sakotuꞌuno pae namantasia dakumona kanau rasulu hampano padamo afodee-dee umatino Lahataꞌala.

¹⁰ Tamaka hampano rahamatino Lahataꞌala idi ini ingka pedamo aini, maka rahamatino ne idi miina nasumia-siaꞌa. Idi padamo akahadhaa mobhie afoliuda kosasawindo rasulu, ampamo kaowu suano kaꞌosano wutoku tamaka rahamatino Lahataꞌala pobhai kanau.

¹¹ Dadiꞌanomo naetaa idi naetaa andoa, tafosampemo bhihita aini; bhihitamo dua aini neparasaeamiu.

Kawanuꞌando manusia maiꞌao ne mate 15:12-34

¹² Ane taefebhihitaiꞌao putae Kristus dofowanue maiꞌao ne mate, nada amai bhahaa nandoo dua ne olotamiu itu mugauno putae miina bhe kawanuꞌando mie mate?

¹³ Ane ibahano pae bhe kawanuꞌando mie mate, tantumo Kristus pae dua namanu maiꞌao ne mate.

¹⁴ Tamaka ane ibahano Kristus pae namanu maiꞌao ne mate, ingka nosia-sia bhihita nefolele mani, nosia-sia dua kaparasaeamiu.

¹⁵ Ane nada anaꞌa, ingka nentaleamo insaodi ini taembalimo sakusii kopahano Lahataꞌala, hampano padamo tasakusiiane putae Lahataꞌala nofowanumo Kristus. Gahaꞌaitumo miina namanua, ane kotu-kotuꞌu miina bhe kawanuꞌando mie mate.

¹⁶ Kapaꞌamo ane kotu-kotuꞌu mie mate miina damowanuda, Kristus pae dua damowanuea.

¹⁷ Ane ibahano Kristus paise namanu maiꞌao ne mate, maka miina nakofahalaa kaparasaeamiua, hintimiu sadaa-daa dadiomu weo dhosa.

¹⁸ Aini nokomaꞌana dua mie marasaeano ne Kristus toka mateno, ingka dobinasamo.

¹⁹ Ane kaposahunaꞌaontoomu ne Kristus so kaowu dadintoomu te dhunia ini, maka nofoliu kadaino kolauntoomu bhe sabhaha manusia.

²⁰ Tamaka kumotuꞌuꞌano peda ini, Kristus padamo dofowanue maiꞌao ne mate, mbalimo titiisando mie mate so sumuli dumadino.

²¹ Kapaꞌamo o mate nomai ne dhunia ini noangka ne seemie manusia, pedamo dua aitu kawanuꞌando mie mate nohato ne dhunia ini noangka dua ne seemie manusia.

²² Kosasawindo manusia domate hampano kaseꞌisendo bhe Adam, pedamo dua itu kosasawindo manusia damodadida hampano kaseꞌisendo bhe Kristus.

²³ Ampamo kaowu seemie-seemie doangkafi tulu-tulungano: Kristus mbalimo titiisa, maka mie membalino fehebuano Kristus ne oleo kahatoꞌano.

²⁴ Pada aitu nahumatomo kafetompaino dhamani. Namada namobinasa sabhaha kafopahintaꞌa, mintahano kuasa bhe kosodano, Kristus namosipuli kafopahintaꞌano ne wutono Lahataꞌala Amano.

²⁵ Kapaꞌamo Kristus tetewei namahinta kansuhu nada omputo ampa kosasawindo kaewano namolongkoda Lahataꞌala te wawono aꞌeno.

²⁶ Kaewa kapu-kapuliaono so nefobinasano ingka o mate.

²⁷ Kapaꞌamo ⸤ notibuhi weo Kitabi⸥ , “Bhahi-bhahiꞌae padamo nofolongkoe te wawono aꞌeno.” Ane notibuhi putae bhahi-bhahiꞌae nofolongkoe te wawono aꞌeno, maka nentaleamo miina natilentua wutono Lahataꞌala molongkono bhahi-bhahiꞌae naꞌa.

²⁸ Mada kaowu namolongkoda bhahi-bhahiꞌae ne wiseno Kristus, maka wutono Anano Lahataꞌala nalumongko ne Lahataꞌala molongkono bhahi-bhahiꞌae ne Anoa. Nadamo anaꞌa Lahataꞌala naembalimo Fofoliuno Kuasa kumabubungino sabhaha ndumandoono ne amai maka dua.

²⁹ Ane pae bhe kawanuꞌando mie mate, o ae bhahaa fahalaano mie mefekadiu saranino so mie toka mateno? Ane mie mate pae sepaliꞌa damanu, so dua ae defekadiu saraniꞌao so mie mate?

³⁰ Pedamo dua insaodi, noafa bhahaa sadhia taꞌundaꞌao tapowise bhe balaa?

³¹ Seꞌo-seꞌoleo aewiseki mate. Bhe kawoseno bhakeku ne hintimiu bhahitieꞌiku, pugauku ini nokotuꞌu, hampano weo Kristus Yesus Ompuntoomu nowoseangkoomu bhakeku.

³² Ane tadamekihi kaowu kamanusia, o ae fahalaano ⸤ apoewangi bhe mie bhaiku⸥ we Efesus, kao-kaomo apoewangi bhe kaꞌuhi fohumaano? Ane mie mate pae damowanuda, ⸤ tadamangkafimo wamba aini,⸥ “Humaa fohoꞌu kaitaomu, kapaꞌamo naewine damatemo.”

³³ Koise dofobhohe-bhoheꞌikoomu, doposabhangka bhe mie modai nedai-dai kanea metaa.

³⁴ Pandeꞌao toha lalomiu, fetumpuomu mehabuomu dhosa! Ingka nandoo ne olotamiu itu tapaꞌo mandeꞌaono Lahataꞌala. Kapugauꞌaku peda ini neanomo mepandeꞌaoꞌomu dua bhe kaambano.

Kawanuꞌano mbadha 15:35-58

³⁵ Tamaka bheanea nandoo meenano, “Nada amai mie mate damowanuda? Daepake mbadha ae bhahaa?”

³⁶ Kabhohemiu! Ingka ane meꞌewiomu wine, tantumo miina natumumbu bhe nadumadi ane miina namate kadeki.

³⁷ Neꞌewimiu ingka suano puꞌuno kantisa tamaka onuno kaowu, peda katuno onuno pae tawa wine sigaoꞌano dua.

³⁸ Tamaka Lahataꞌala nowaꞌane bhe puꞌuno, peda kapoindalono Wutono; sehonda-sehonda wine nowaꞌane bhe puꞌuno wutono.

³⁹ Sabhaha mbadha miina napototo-totoa; mbadhando manusia nopoꞌala bhe mbadhano kadadi, nopoꞌala dua bhe mbadhano kaꞌuhi lumola, nopoꞌala dua bhe mbadhano kenta.

⁴⁰ Pedamo dua anaꞌa sabhaha katu ndumandoono te lani bhe sabhaha katu we dhunia ini. Kakesano sabhaha katu te lani segaatiꞌa dua bhe kakesano sabhaha katu te dhunia ini.

⁴¹ Kakesano oleo nopoꞌala bhe kakesano wula, nopoꞌala dua bhe kulipopo. Pedamo dua kakesano kulipopo seꞌonu-seꞌonu nopoꞌala-ala.

⁴² Pedamo aini kawanuꞌando mie mate. Peda wine neꞌewi, o mbadha nekobuhu ingka o mbadha binasano, tamaka mbadha nefodadi o mbadha so tapa binasano.

⁴³ Nekobuhu, ingka o mbadha pata mokesa, nefodadi o mbadha kumalabhiano. Nekobuhu o mbadha monale, nefodadi o mbadha kokuasano.

⁴⁴ Nekobuhu ingka o mbadha maiꞌaono ne dhunia, nefodadi o mbadha maiꞌaono ne Rohino Lahataꞌala. Ane bhe mbadha maiꞌaono ne dhunia, tantumo nandoo dua mbadha maiꞌaono ne Rohino Lahataꞌala.

⁴⁵ Nandoo tibuhino weo Kitabi, “Manusia kabhao-bhaono, nekonando Adam, bhe inawano dumadino,” tamaka Adam mbuhumaino ⸤ patudhuno Kristus⸥ , bhe Rohino fofodadino.

⁴⁶ Humatono wawo suano mbadha maiꞌaono ne Rohino Lahataꞌala, tamaka mbadha maiꞌaono ne dhunia; pada anaꞌa kaneꞌomo mbadha maiꞌaono ne Rohino Lahataꞌala.

⁴⁷ Manusia kabhao-bhaono nomaiꞌao we dhunia, mbadhano nomaiꞌao we bungahasi; manusia mbuhumaino nomaiꞌao te surugaa.

⁴⁸ Sabhaha mie dumadino ne dhunia ini, nopototo mbadhando bhe manusia kabhao-bhaono maiꞌaono ne bungahasi. Sabhaha mie so dumadino te surugaa napototo mbadhando bhe manusia maiꞌaono te surugaa.

⁴⁹ Pedamo dua intaodiomu ampa aitu dopototoomu bhe Adam, maiꞌao ne bungahasi, namada kaowu dapototoomu dua bhe Kristus maiꞌaono te surugaa.

⁵⁰ Bhahitieꞌiku, nepulaoꞌaoku peda aini: o dagi bhe hea pae bhe kapooli namesua weo Kafopahintaꞌano Lahataꞌala; o mbadha so binasano pae bhe kapoolia naeꞌawa dawu ne dadi so pata binasano.

⁵¹ Kotu-kotuꞌu amohatoangkoomu seꞌise rahasia: intaodiomu ini paise damisimate-mateꞌa, tamaka kosasawintoomu dafobhalii.

⁵² Kadhadhiano nasetolindaꞌa, nasepihuꞌa mata, napoangka bhe ndiino duhulele bhalano kafetompaino dhamani. Kapaꞌamo duhulele bhalano nakondii maka mie mate damowanuda daepake mbadha tapa binasaꞌano maka intaodiomu dafobhalii.

⁵³ Hampano mbadha binasa tetewei natibhalii ne tapa binasaꞌano; mbadha momate tetewei natibhalii ne tapa momateꞌano.

⁵⁴ Namada mbadha binasa natibhalii ne tapa binasaꞌano, namada mbadha momate natibhalii ne tapa momateno, ingka nakoꞌulamo bhoasaono Ompu tibuhino peda aini, “O mate dotoloemo, o kafotalo nosangkamo.”

⁵⁵ “Hintu o mate, nandoo bhahaa kafotalomua? Ne amai bhahaa tifumua?”

⁵⁶ Tifuno mate ingka o dhosa, kuasano dhosa ingka o tubhono agama.

⁵⁷ Tamaka foampe kaitaomu katumpuno lalo ne Lahataꞌala fowaꞌaono kafotalo noangka ne Yesus Kristus, Ompuntoomu.

⁵⁸ Dadiꞌanomo, bhahitieꞌiku timoasiꞌaono, fekatangka kofindamiu, koise meando-andoa, sadhia foma-fomaiꞌomu lalomiu weo kahadhaano Ompu! Ingka pandeꞌaaneomu weo kaseꞌisemiu bhe Ompu kawulemiu pae nasumia-siaꞌa.