1 Korintus 14 - Muna Southern Dialect

Kapooli dopugauꞌao wambano Rohi bhe dokosuaha peda anabii 14:1-25

¹ Ambaeꞌomu kanini kaasi, uleiꞌeomu dua lalomiu so tumahimaꞌaoꞌomu sabhaha kapooli nedawuꞌaono Rohino Lahataꞌala, mangke-mangkemo kapooli so kosuahaꞌaoꞌomu peda anabii.

² Laꞌae mepakeno wambano Rohi, miina napotula-tula bhe manusia tamaka nopugau bhe Lahataꞌala. Kapaꞌamo miina bhe manusia lumosangino maꞌanano wambano, hampano nokowambaꞌao rahasia peda nefohatoꞌaono Rohino Lahataꞌala.

³ Tamaka laꞌae kosuahano peda anabii, nopugau ne manusia, nofofekamatangka kaparasaea, nofotangahi, bhe nofolawesi lalo.

⁴ Laꞌae mepakeno wambano Rohi, nofekamatangka kaowu kaparasaeano wutono, tamaka laꞌae kosuahano peda anabii nofekamatangka kaparasaeando umatino Lahataꞌala.

⁵ Gaoku mpuu hintimiu kosasawimiu mepakeomu wambano Rohi, tamaka fofoliuꞌano gaoku kosuahaomu peda anabii. Kapaꞌamo nokofahalaa mie kosuahano peda anabii bhe mie mepakeno wambano Rohi, simbali nomaꞌanakie dua wambano naꞌa, so notifekamatangkaꞌao kaparasaeando umati sigaoꞌano.

⁶ Dadiꞌanomo bhahitieꞌiku, ane ibahano amai ne hintimiu maka aepake wambano Rohi, o ae bhahaa fahalaano so hintimiu? Ingka kaneꞌo nakofahalaa ane amohatoangkoomu powoha netahimaku ne Lahataꞌala, tawa amosampeangkoomu nepandeꞌaoku, tawa akosuahaangkoomu nada anabii tawa amoinaꞌukoomu.

⁷ Nopototo bhe sabhaha katoka pata koinawa tamaka nokondii. Peda ibahano o suli bhe kusapi, nada amai damandeꞌaane bhahaa lagu nepokalalambuꞌaono ane pae napoꞌala ndiino?

⁸ Pedamo dua duhulele nepakendo tantara, ane ndiino miina namantenaa, laꞌae bhahaa so mokanuno dapopahisa?

⁹ Pedamo dua hintimiu mepakeno wambano Rohi, ane pae mepakeomu wamba tilosangino, nada amai damandeꞌaane bhahaa maꞌanano wambamiu? Wambamiu itu ingka nasumia-sia, tanapoangka kawea.

¹⁰ Fenaiku nobhahi mpuu wamba ne dhunia ini, tamaka miina bhe nasehonda tapa komaꞌananoa.

¹¹ Tamaka ane miina amandeꞌaane maꞌanano wamba nefetingkeku, mie aitu aabhiemo dua mie koliwuno tapa popandeꞌaono wamba, pedamo dua anoa ne idi.

¹² Pedamo dua hintimiu, daanumo uleiꞌeomu lalomiu meꞌawaomu kapooli nedawuꞌaono Rohino Lahataꞌala, tamaka fofoliuꞌano uleiꞌeomu lalomiu so mekamatangkaꞌaoꞌomu kaparasaeando umati.

¹³ Dadiꞌanomo laꞌae mepakeno wambano Rohi naetaa nasumambahea naesalo damaꞌane dua bhe kapooli namaꞌanakie.

¹⁴ Kapaꞌamo ane asambahea aepake wambano Rohi, ingka o alusuku sumambaheano tamaka miina napoangkafi bhe fekihiku.

¹⁵ Kaowu aeafamo? Asumambahea maiꞌao ne alusuku, tamaka asumambahea dua aepake wamba tilosangino maiꞌao ne fekihiku. Aelagu amudhi Lahataꞌala maiꞌao ne alusuku, tamaka aelagu amudhi dua Lahataꞌala aepake wamba tilosangino maiꞌao ne fekihiku.

¹⁶ Kapaꞌamo ane sumambaheaꞌao kaowu nomaiꞌao ne alusumu, nada amai mie buꞌou mangkafino sambaheamu natumobhoosi “Amin” namada sambaheano katumpuno lalomu naꞌa? Ingka miina namandeꞌaanea o ae maꞌanano pugaumu naꞌa.

¹⁷ Mahinggamo sambahea katumpuno lalomu naꞌa netaa sepaliꞌa, tamaka miina namekamatangka kaparasaeano mie bhaimu.

¹⁸ Notumpu laloku ne Lahataꞌala hampano idi aepake wambano Rohi afoliukoomu kosasawimiu itu.

¹⁹ Tamaka weo pohompu-hompuꞌando umati naetaa apugau lima wobha kaowu tilosangino so amoinaꞌuꞌao mie bhaiku, bhe apugauꞌao hewu lasa wambano Rohi.

²⁰ Bhahitieꞌiku, koise kofekihiomu peda anaꞌi. Ne modaiꞌano membaliomu peda kaana-anaꞌi, tamaka weo fekihimiu membaliomu mie ngkolalo.

²¹ Weo Kitabino Musa notibuhi, “Namangka ne mie mepakeno wamba sigaoꞌano, namangka ne wiwindo koliwuno amugau ne umati aini, tamaka mahinggamo nada anaꞌa paise dametingke kanaua, bhoasaono Ompu.”

²² Dadiꞌanomo kapooli dopugauꞌao wambano Rohi seꞌisemo tanda, suano so mie marasaeano tamaka so mie tapaꞌo marasaeano. Pedamo dua kapooli dokosuaha peda anabii seꞌisemo dua tanda, suano so mie tapa marasaeano tamaka so mie marasaeano.

²³ Ane kosasawindo umati dapohompu-hompu maka seemie-seemie naepake wambano Rohi, gahaꞌa dahumatomo dua mie tapaꞌo marasaeano tawa mie buꞌou, ingka dakumonakoomu kabhee.

²⁴ Tamaka ane kosasawindo dakosuaha peda anabii, gahaꞌa dahumato dua mie tapaꞌo marasaeano tawa mie buꞌou, ingka pugaumiu kosasawimiu itu natumiisangi totono lalono sampe naꞌuminsafuane sabhaha dhosano.

²⁵ Sabhaha tifebuniꞌano weo totono lalono natilengka, sampe nalumongko nasumudhu ne Lahataꞌala bhe naꞌumakui ambano, “Kotu-kotuꞌu bhe Lahataꞌala ne olotamiu inia.”

Atora weo hompuꞌando umati 14:26-40

²⁶ Bhahitieꞌiku! Kaowu nadamo amai? Ane pohompu-hompuomu, naetaa seemie-seemie bhe taiꞌano: nandoo so melaguno, nandoo so fofoinaꞌuno, nandoo so mefosampeno powoha maiꞌao ne Lahataꞌala, nandoo so mepakeno wambano Rohi, nandoo dua so maꞌanakino wambano Rohi naꞌa. Ampamo kaowu bhahi-bhahiꞌae naꞌa tabeano sanea so kamatangkaꞌano kaparasaeando umati.

²⁷ Ane nandoo mepakeno wambano Rohi, hunsaꞌano dahodua somo kabhahindo datotolu, daposule-sule; maka bhe naseemie dua so maꞌanakino wambado.

²⁸ Ane paise bhe maꞌanakie, naetaa koemo dokadiu-diua weo hompuꞌando umati naꞌa, tadaetula-tulamo kaowu weo totono lalondo bhe ne Lahataꞌala.

²⁹ Mie kosuahano peda anabii, naetaa dahodua tawa datotolu so pugauno, maka sigaoꞌano somo tumimbangino pugaundo, ⸤ bhahaꞌi natitahima bhahaꞌi paise⸥ .

³⁰ Tamaka ane seemie ne olotamiu naꞌa nengkoha-ngkoha tambaꞌomo nokopowoha maiꞌao ne Lahataꞌala, maka mie tangasano pugauno nametumpu kadeki.

³¹ Kapaꞌamo kosasawimiu naembali kosuahaomu peda anabii posule-suleomu, neanomo kosasawimiu poguhuomu bhe namatangka kaparasaeamiua.

³² Mie kosuahano peda anabii ingka dopooli dofewanaki so nekosuahaꞌaondo naꞌa, ⸤ nembali dua doantagi waweꞌando⸥ .

³³ Kapaꞌamo Lahataꞌala miina namoindalo kahungga, tamaka nopoindalo dadi tiꞌatoro. Peda kaneano ne kosasawindo umatino Lahataꞌala ne amai maka dua,

³⁴ o hobhine koemo dokadiu-diua weo hompuꞌando umati. Andoa miina daꞌumundaꞌaanda dakosuahaa. Andoa tabeano tadatumuhu peda nekowambaꞌaono dua Kitabino Musa.

³⁵ Ane gaondo dakonifeenaꞌao, naetaa dameena ne moꞌanendo se lambu, kapaꞌamo notimoambanoꞌao ane seemie hobhine nakosuaha weo hompuꞌando umati.

³⁶ Bhahaa bhoasaono Lahataꞌala notanda ne hintimiu itu? Bhahaa ampamo hintimiu metahimano bhoasaono Lahataꞌala?

³⁷ Ane seemie noabhi wutono neꞌawamo kapooli nakosuaha peda anabii tawa neꞌawamo kapooli sigaoꞌano nedawuꞌaono Rohino Lahataꞌala, naetaa namahamue putae sabhaha nebuhiku ini sanea pahintano Ompu.

³⁸ Tamaka ane bhe pata madhulino wambaku ini, koemo dua fadhulieꞌomua mie aitua.

³⁹ Dadiꞌanomo bhahitieꞌiku, uleiꞌe wutomiu so meꞌawaꞌao kapooli kosuaha peda anabii, bhe koemo eleꞌaandaomu mie mepakeno wambano Rohi.

⁴⁰ Ampamo kaowu kosasawiꞌae ini tabeano namantasi dhalano bhe naeangkafi atora.