1 Korintus 13 - Muna Southern Dialect

Kanini kaasi 13:1-13

¹ Mahinggamo naembali apugauꞌao sabhaha wambado manusia bhe wambado malaꞌekati, tamaka ane pae bhe kanini kaasiku ne mie bhaiku, ingka taꞌapototomo bhe mbololo menduu-nduuno tawa ndengu-ndengu mendii-ndiino.

² Mahinggamo aeꞌawa kapooli akosuaha peda anabii, alumosangie sabhaha rahasia bhe amandeꞌaane sabhaha kapande, namatangka kaparasaeaku sampe naembali aefogampi kabhawo, tamaka ane pae bhe kanini kaasiku, ingka miina bhe faha-fahalaakua.

³ Mahinggamo sabhaha kanandooku adumawu-dawuandae mie mokae, bhahamoa amotawakala wutoku datumunu kanau, tamaka ane pae bhe kanini kaasiku, ingka miina sepaliꞌa bhe fahalaanoa so idia.

⁴ O kanini kaasi maitu nokosabaha, netaa lalono; o kanini kaasi maitu miina nakondua lalono. Kanini kaasi miina nasumangke-sangke wutono bhe miina naelangke diuno.

⁵ O kanini kaasi miina naehabu tapa mantasiꞌano bhe miina naeꞌondofi kafaraluuno wutono; o kanini kaasi miina namansolumbua bhe miina naefeꞌu-feꞌulai kaꞌalando mie bhaindo.

⁶ O kanini kaasi miina naoꞌiaꞌao modaiꞌano, tamaka noꞌiaꞌao kabanara.

⁷ O kanini kaasi nesongkowi bhahi-bhahiꞌae, noparasaea bhahi-bhahiꞌae, noposahunaꞌao ne bhahi-bhahiꞌae, bhe nokosabaha netaami bhahi-bhahiꞌae.

⁸ Nekosuahaꞌaondo anabii nakotompa, wambano Rohi nametumpu, o kapande naosali, tamaka o kanini kaasi pae bhe kapulia.

⁹ Kapaꞌamo kapandentoomu miina nasumangkaa, nekosuahaꞌaonto peda anabii miina naoponoa.

¹⁰ Tamaka nahumato kaowu fofoliuno kasumangka, pata sumangkaꞌano naosalimo.

¹¹ Nandoo kaanaꞌiku ingka pugauku peda seemie anaꞌi, ponamisiku peda anaꞌi, fekihiku peda dua anaꞌi. Ampa aitu akolalomo, ahunsaemo lalo kaanaꞌikua.

¹² Ampa aitu tapedamo deꞌondo-ondoomu ondula pata mentalea weo paeasa mohawu, tamaka namada kaowu dapowise. Ampa aitu kapandeku miinaꞌo nasumangkaa, tamaka namada kaowu kapandeku naoponomo, pedamo wutono Lahataꞌala nosangka mpuu nopandeꞌa kanau.

¹³ Dadiꞌanomo tamo tolu hondano ini ⸤ so nefintahakintoomu⸥ : o kaparasaea, o posahunaꞌao, bhe kanini kaasi; tamaka fofoliuꞌano o kanini kaasi.