1 Korintus 12 - Muna Southern Dialect

Kapooli nedawuꞌaono Rohino Lahataꞌala 12:1-11

¹ Bhahitieꞌiku, aitu amugauꞌao kapooli nedawuꞌaono Rohino Lahataꞌala; gaoku mpuu mandeꞌaaneomu sakotu-kotuꞌuno.

² Ingka pandeꞌaaneomu wakutuuno miinaꞌo mandeꞌaoꞌomu Lahataꞌala, taꞌokaangka-angkamoomu dofekakolilinokoomu sabhaha barahala tapa kosuahano.

³ Dadiꞌanomo naetaa amohatokoomu putae o manusia neatono Rohino Lahataꞌala paise bhe kapoolia nabhatataꞌiao Yesus. Pedamo dua aitu miina bhe manusia so pugauno putae Yesus maitu o Ompu ane pae namatoe Rohino Lahataꞌala.

⁴ O kapooli nedawuꞌaono Rohino Lahataꞌala tanofegiu, tamaka bhahi-bhahiꞌae sekamaiꞌao, o Rohino Lahataꞌala.

⁵ Taka kaꞌondofao so Ompu tanofegiu, tamaka seemie kaowu Ompu.

⁶ Nekahadhaano Lahataꞌala tanofegiu, tamaka kumahadhaano bhahi-bhahiꞌae naꞌa mangkano ne sabhaha manusia, ingka Lahataꞌala Kaseemie-mieꞌano.

⁷ Tamaka ne manusia seemie-seemie notiwoha kapooli nedawuꞌaono Rohino Lahataꞌala so kaetaaꞌantoomu.

⁸ Seemie nowaꞌane kapooli nokotimbangi pugauno, o Rohi fowaꞌaono. Seemieno nowaꞌane kapooli nokokapande pugauno, o Rohimo dua anaꞌa fowaꞌaono.

⁹ Seemieno nowaꞌane kapooli foliuno kamatangka kaparasaeano, o Rohimo dua aitu fowaꞌaono. Seemieno nowaꞌane kapooli naefekaꞌosa mie mosaki, o Rohimo dua anaꞌa fowaꞌaono.

¹⁰ Ne seemieno nowaꞌane kuasa naehabu tanda timenteꞌaono, bhe ne seemieno nowaꞌane kapooli nakosuaha peda seemie anabii. Ne sigaoꞌano nowaꞌane kapooli namande napoꞌalatiꞌao rohi modai bhe rohi metaa. Ne sigaoꞌano dua nowaꞌane kapooli napugauꞌao sabhaha wambano Rohi, maka seemieno nowaꞌane kapooli namaꞌanaki wambano Rohi naꞌa.

¹¹ Tamaka bhahi-bhahiꞌae kamaiꞌaoꞌano seꞌise kaowu, senaꞌa-naꞌa kahadhaano Rohino Lahataꞌala. Ne seemie-seemie manusia nowaꞌanda kapooli noposahataa bhe kapoindalono Wutono.

Dobhahi katokano tamaka sembadha kaowu 12:12-31

¹² O mbadha seꞌise, katokano nobhahi; mahinggamo nobhahi katokano, ingka sembadha kaowu. Pedamo dua aitu Kristus.

¹³ Kapaꞌamo Rohino Lahataꞌala padamo nokadiu sarani kosasawintoomu mbalimo sembadha, naetaa miendo Yahudi naetaa miendo Yunani, naetaa o bhatua naetaa mie bebasi, saneamo dua kao-kaomo dofowaꞌao dofohoꞌu ne Rohi anaꞌa.

¹⁴ O mbadha miina nasekatoka kaowu, tamaka nobhahi.

¹⁵ Ane ibahano o aꞌe napugau, “Idi ini suano lima, dadiꞌanomo miina atilentu katokano mbadha,” ingka mahinggamo nopugau peda anaꞌa, sadaa-daaꞌe katokano mbadha.

¹⁶ Ane ibahano o tingala napugau, “Idi ini suano mata, dadiꞌanomo miina atilentu katokano mbadha,” ingka mahinggamo nopugau peda anaꞌa, sadaa-daaꞌe katokano mbadha.

¹⁷ Ane kosembadhaꞌae saneamo mata, ne amai bhahaa so kafofetingkeꞌa? Ane saneamo tingala ne amai bhahaa so kaefewonoꞌa?

¹⁸ Tamaka Lahataꞌala padamo noꞌatoroe kaeateꞌando, sehonda-sehonda katoka bhe takano weo mbadha peda kapoindalono Wutono.

¹⁹ Ane kosasawiꞌae katoka nasehonda kaowu, ne amai bhahaa o mbadha?

²⁰ Daanumo nobhahi katokano, tamaka ampamo sembadha.

²¹ Dadiꞌanomo o mata paise naembali napugau ne lima, “Miina amaraluukoa,” tawa o fotu napugau ne aꞌe, “Miina amaraluukoa.”

²² Bhahamoa katokano mbadha foliuno kanale wohaꞌano, foliunomo dua kafaraluu.

²³ Sabhaha katokano mbadha tapa seaꞌe metaaꞌano ne pomatando manusia sedhuluꞌa dofosibhalae, sabhaha katokano mbadha modaino bhangu sedhuluꞌa dua doꞌondofaane.

²⁴ Kaꞌondofao pedando naꞌa miina damaraluuꞌe katokano mbadha metaaꞌano bhangu. Lahataꞌala padamo nopotudu-tudumiane mbadhantoomu ini sampe sabhaha katoka tapa nefosibhala sedhuluꞌa dofosibhalae.

²⁵ Patudhuno keana nonandoo powengke-wengkeꞌa weo mbadha, tamaka sabhaha katoka poꞌala-alano maitu napototo kapoꞌondo-ondofaondo.

²⁶ Dadiꞌanomo ane sehonda katoka nokadee-dee, kosasawindo dokadee-dee; ane sehonda katoka dofosibhalae kosasawindo doꞌia.

²⁷ Hintimiu itu saneamo mbadhano Kristus, seemie-seemie ingka o katokanomo.

²⁸ Lahataꞌala padamo nefotantu mie weo umati: kabhao-bhaono nandoo membalino rasulu, kahaa iseno nandoo membalino anabii, katolu iseno nandoo membalino guru. Pada anaꞌa nandoo metahimano kapooli dehabu tanda timenteꞌaono, kapooli defekaꞌosa mie mosaki, kapooli dotulumi mie bhaindo, kapooli dembali neangka, bhe kapooli dopugauꞌao sabhaha wambano Rohi.

²⁹ Bhahaa andoa maitu saneamo rasulu, saneamo anabii, saneamo guru? Bhahaa saneamo meꞌawano kapooli dehabu tanda timenteꞌaono?

³⁰ Bhahaa saneamo meꞌawano kapooli defekaꞌosa mie mosaki, saneamo dopugauꞌao wambano Rohi, tawa saneamo demaꞌanaki wambano Rohi naꞌa? Ingka miina.

³¹ Dadiꞌanomo uleiꞌeomu totono lalomiu so meꞌawaꞌaoꞌomu sabhaha kapoolino Rohi foliuno kataa. Tamaka idi ini amosusuangkoomu kaangkaꞌa sedhuluꞌa dua kataano.