1 Korintus 11 - Muna Southern Dialect

¹ Angkafiomu sandahaku ini, tapedamo idi ini aangkafi sandahano Kristus.

O hobhine daekantutu wakutuuno dosambahea 11:2-16

² Apudhikoomu, kapaꞌamo sadhia feꞌulai kanauꞌomu bhe sadhia fintahakieꞌomu kafoinaꞌu nefosampeku.

³ Tamaka gaoku mandeꞌaaneomu dua sehondano ini, putae sasuka moꞌane nofefotuane Kristus, sasuka hobhine nofefotuane moꞌaneno, maka Kristus nofefotuane Lahataꞌala.

⁴ Ane seemie moꞌane nekantutu wakutuuno nosambahea tawa nokosuaha peda anabii, mie aitu nofekaꞌaebu mefotuane.

⁵ Ane seemie hobhine miina naekantutu wakutuuno nosambahea tawa nokosuaha peda anabii, mie aitu nofekaꞌaebu mefotuane. Tanopototomo hobhine aitu dokuhue.

⁶ Kapaꞌamo ane seemie hobhine nokiido naekantutu, naetaa dagumuntie wuluno fotuno. Tamaka ane seemie hobhine dokuhue tawa doguntie wuluno fotuno, ingka o kafekaꞌaebu. Dadiꞌanomo naetaa naekantutu.

⁷ O moꞌane miina namaraluua naekantutu, hampano nofotiwohamo sifatino Lahataꞌala bhe neowa kakalabhiano Lahataꞌala. Tamaka o hobhine neowa kakalabhiano moꞌane.

⁸ Kapaꞌamo o moꞌane miina damokonandooꞌe maiꞌao ne hobhine, tamaka o hobhine nomaiꞌao ne moꞌane.

⁹ O moꞌane miina dua damokonandooꞌe so hobhine, tamaka o hobhine dofokonandooꞌe so moꞌane.

¹⁰ Dadiꞌanomo seemie hobhine tabeano naekantutu peda tanda anoa maitu nofefotuane moꞌaneno, so doꞌiaꞌao dua malaꞌekati.

¹¹ Mahinggamo peda anaꞌa weo Ompu o hobhine nefaraluu moꞌane, o moꞌane nefaraluu hobhine.

¹² Kapaꞌamo mahingga o hobhine kabhao-bhaono nomaiꞌao ne moꞌane, ingka pada anaꞌa o moꞌane dolente maiꞌao ne hobhine. Tamaka kosasawiꞌae nomaiꞌao ne Lahataꞌala.

¹³ Tiisangiꞌao wutomiu, nopantasi bhahaa seemie hobhine nasumambahea pae naekantutua?

¹⁴ Ingka dopandeꞌaane ne kanandoono alamu ini, ane seemie moꞌane newanta wuluno fotuno miina seaꞌe namantasia.

¹⁵ Tamaka ane seemie hobhine newanta wuluno fotuno nembalimo kakalabhiano, hampano wuluno fotu aitu dowaꞌane mbalimo kasahibumbuno.

¹⁶ Ane bhe so tumagano, naetaa amohatokoomu putae insaodi tawa umatino Lahataꞌala sigaoꞌano, suano kanea mani ⸤ o hobhineꞌi⸥ dosambahea ⸤ miina daekantutu⸥ peda anaꞌa.

Kanea umala weo haroano Ompu 11:17-34

¹⁷ Ne tubho sehondano so nefeꞌulaiꞌaoku ini miina amudhikoomua. Poꞌawa-awaꞌamiu weo sambahea miinamo naeowa metaaꞌano tamaka neowamo modaiꞌano.

¹⁸ Kabhao-bhaono, ingka afetingke ane poꞌawa-awaomu weo hompuꞌando umati nandoo bhe powengke-wengkeꞌa ne olotamiu, maka fenaiku bhihita aini nandoo kumotuꞌuꞌano.

¹⁹ Ingka nokesa itua nandoo powengke-wengkeꞌa ne olotamiu itu! Ane paise, nada amai natipandeꞌao laꞌae kumampuu-mpuuno weo kaparasaeano?

²⁰ Tamaka ane pohompu-hompuomu, ingka suanomo haroano Ompu nehumaamiu.

²¹ Kapaꞌamo seemie-seemie neagoi oti so wutono, sampe nandoo moꞌahono tamaka nandoo dua mololanuno.

²² Bhahaa miina kolambuomu so momaa mohoꞌuꞌaoꞌomu? Bhahaa mekaꞌaebu umatino Lahataꞌala bhe mekaambanoomu kaowu tapa kokanandoono? Kaowu amugaumo nada amai bhahaa ne hintimiu itu? Amudhikoomu bhahaa? Teteweimo paise!

²³ Kapaꞌamo nefosampeku ini atahimae ne wutono Ompu. Ne alono Ompu Yesus doowae ne limando kaewa, nealamo roti.

²⁴ Pada nefoampe katumpuno lalo ne Lahataꞌala, roti anaꞌa nobhebhehaemo bhe nopugau ambano, “Mbadhakumo inia, newaꞌaoku so hintimiu. Habuomu nada aini so kafeꞌu-feꞌulaiku.”

²⁵ Pedamo dua anaꞌa pada dohumaa, nealamo kampohoꞌuꞌa bhe nopugau ambano, “Kampohoꞌuꞌa aini o podhandiꞌa buꞌouno Lahataꞌala bhe manusia, dofekatangkaane tuhuno heaku. Taenomo mohoꞌueꞌomu, habueꞌomu somo kafeꞌu-feꞌulaiku.”

²⁶ Kapaꞌamo taenomo humaaꞌomu roti bhe fohoꞌuomu ne kampohoꞌuꞌa peda aini, ingka mefoleleomu bhihita mateno Ompu, ampa oleo so kahatoꞌano.

²⁷ Dadiꞌanomo laꞌae maka momaano roti bhe mohoꞌuno ne kampohoꞌuꞌano Ompu tamaka dhalano miina namantasia, mie aitu nokodhosamo ne mbadha bhe heano Ompu.

²⁸ Seemie-seemie tabeano namahakesaa kadeki totono lalono, maka naembali naomaa roti bhe naohoꞌu ne kampohoꞌuꞌano Ompu.

²⁹ Ane o mie tanaomaamo tanaohoꞌumo pae nalumosangi maꞌanano mbadhano Ompu, ingka humaano bhe fohoꞌuno naꞌa neowa kahukumuno Lahataꞌala ne wutono.

³⁰ Kanandooꞌanomo ne olatamiu itu dobhahimo mosakino bhe monaleno, nandoomo dua momateno.

³¹ Tamaka ane maꞌindulu datumiisangi totono lalontoomu, paise daeꞌawa kahukumuno Lahataꞌala.

³² Ampamo kaowu ane daeꞌawa kahukumuno Lahataꞌala, ingka nofotangahi keana deꞌawa kahukumu ⸤ suhue dhamani⸥ dapoowa-owa bhe dhunia ini.

³³ Dadiꞌanomo, bhahitieꞌiku, ane pohompu-hompuomu so haroano Ompu, poanta-antagiomu.

³⁴ Ane bhe moꞌahono, naetaa naomaa kadeki se lambuno, neanomo poꞌawa-awamiu paise naeowaangkoomu kahukumu. Kafoinaꞌu sigaoꞌano madaꞌo aꞌumatoroangkoeꞌomu humato amai.