1 Korintus 10 - Muna Southern Dialect

Koe desandaha ne podiundo umatino Israel 10:1-13

¹ Bhahitieꞌiku, gaoku mpuu mandeꞌaaneomu kadhadhia netompaloindo awuaꞌintoomu ⸤ wakutuuno noatoda anabii Musa domaiꞌao we Mesir⸥ . Ne naꞌa kosasawindo nokaolumida olu, bhe kosasawindo dosalamati delempagi teꞌi.

² Olu bhe teꞌi naꞌa nembalimo dua kakadiundo sampe kosasawindo doseꞌisemo doangkafi anabii Musa.

³ Kosasawindo dohumaa oti pototoꞌano, sanea oti maiꞌaono te surugaa.

⁴ Kosasawindo dofohoꞌu oe pototoꞌano, sanea oe maiꞌaono te surugaa. Kosasawindo dofohoꞌu oe maiꞌano ne kabhawono dempa pobhaianda; dempa anaꞌa ingka o wutonomo Kristus.

⁵ Tamaka mahinggamo peda naꞌa dobhahi ne olotando pata mekaꞌiano lalono bhe mekaꞌiano lalono Lahataꞌalaa, sampe maeatindo tadokombahaꞌa te pandaso bhalano.

⁶ Bhahi-bhahiꞌae kadhadhia anaꞌa saneamo sandaha so intaodiomu, saneamo kafeꞌulai keana depoindalo sabhaha modaiꞌano peda nepoindalondo andoa naꞌa.

⁷ Koise desombaiꞌomu barahala peda nehabundo seemie hodua ne olotando andoa naꞌa. Aini noposahataa bhe tibuhino weo Kitabi, “Bansano liwu andoa maitu dengkoha maka dohumaa dofohoꞌu, pada anaꞌa doehe maka dopokalinda-linda te wiseno barahala.”

⁸ Koise dopokawite-witeomu peda nehabundo andoa maitu, sampe dohaa fulu tolu hewu mateno seꞌoleo ⸤ hampano podiu pedando naꞌa⸥ .

⁹ Koise dosolo-soloomu Ompu peda nehabundo seemie hodua ne olotando andoa naꞌa, sampe domate dotitida ule kobisa.

¹⁰ Koise dua dokamuntu-muntuomu peda nehabundo seemie hodua ne olotando andoa naꞌa, sampe nopongkoda Malaꞌekati Fofekamateno.

¹¹ Bhahi-bhahiꞌae naꞌa nokadhadhia ne andoa so nembaliꞌao sandaha ne mie bhaindo. Bhahi-bhahiꞌae naꞌa notibuhi dua so kafodhaga ne intaodiomu dumadino ne pandano dhamani ini.

¹² Mie mabhino wutono notangka eheno, tabeano naposiꞌondo bhahasaa notifondole.

¹³ Sabhaha kasoba netompaloimiu saneamo kasoba moneaꞌano netompaloindo manusia. Lahataꞌala nokampuu-mpuu ne dhandino, paise nakumatahokoomu meꞌawaomu kasoba sampe nalumiuꞌe kaꞌosamiua. Ane metompaloiꞌomu kasoba tetewei namaꞌangkoomu dua dhala, sampe naembali potaamiomu.

Kafoinaꞌu pokaiꞌano bhe haroano barahala 10:14—11:1

¹⁴ Dadiꞌanomo, bhahitieꞌiku timoasiꞌaono, fekakodoꞌo wutomiu ne sombaiꞌano barahala.

¹⁵ Apugau peda ini ne hintimiu mie kotimbangi, tatimbangimoomu wutomiu wambaku inia.

¹⁶ Wakutuuno dofohoꞌuomu angguru poowa defoampe katumpuno lalo ne Lahataꞌala hampano kampohoꞌuꞌa anaꞌa, ingka tandanomo kaseꞌisentoomu bhe heano Kristus. Wakutuuno dopobheha-bhehaomu roti maka dohumaaꞌe, ingka tandanomo kaseꞌisentoomu bhe mbadhano Kristus.

¹⁷ Mbaꞌinomo o roti seꞌonu kaowu bhe kosasawintoomu dopombali-mbaliꞌao roti seꞌonuno naꞌa, maka intaodiomu bhahino ini dosembadhamoomu.

¹⁸ Soba ondoomu miendo Yahudi. Mie momaano oti kapopanga ingka saneamo doseꞌise deala dawu weo kasombai ne Lahataꞌala.

¹⁹ O ae bhahaa maꞌanano wambaku naꞌaa? O barahala bhe oti nepopanga so barahala naꞌa ingka miina nakomaꞌa-maꞌanaa.

²⁰ Tamaka o ae nepopanga so barahala miina damoampee ne Lahataꞌala, tamaka ne sabhaha rohi modai. Maka akiido moseꞌise wutomiu bhe sabhaha rohi modai.

²¹ Hintimiu paise naembalia mohoꞌuomu ne kampohoꞌuꞌano Ompu poangka mohoꞌuomu dua ne kampohoꞌuꞌando sabhaha rohi modai. Pedamo dua anaꞌa paise naembalia momaaꞌomu ne medhano Ompu bhe ne medhano sabhaha rohi modai.

²² Bhahaa dokopatudhuomu damekakondua lalono Ompu? Kunaꞌemiu doꞌosamo intaodi ini bhe Ompu?

²³ Nandoo mugauno, manusia nobebasi nehabu o ae maka dua. Anoamo, tamaka ambaku miina kosasawiꞌae nehabundo manusia nokofahalaa. O manusia nobebasi nehabu o ae maka dua, tamaka miina kosasawiꞌae nehabundo manusia maitu naefekamatangka totono lalo.

²⁴ Koise ondofao kaowu kafaraluuno wutomiu, tamaka ondofaoꞌomu dua kafaraluundo mie bhaimiu.

²⁵ Hintimiu naembali momaaꞌomu sabhaha neaso we daoano dagi, miina namaraluua dofee-feenaꞌao kamaiꞌaoꞌano dagi anaꞌa ⸤ bhahaꞌi padamo depopangaane ne barahala kaa miina⸥ , keana nosabha totono lalomiu kumatanga-tangano.

²⁶ ⸤ Weo Kitabi notibuhi,⸥ “Dhunia ini bhe kosasawiꞌae iꞌino sanea fehebuaꞌano Ompu.”

²⁷ Ane dobhasikoomu momaaꞌomu ne lambuno mie tapa marasaeano ne Kristus, maka kumalaomu, tahumaamoomu ampa netaganando. Koemo fee-feenaꞌao kamaiꞌaoꞌano oti aitu, keana nosabha totono lalomiu kumatanga-tangano.

²⁸ Tamaka ane bhe mohatokoomu, “Oti aini padamo dopopangae ne barahala!” koemo humaa, keana nondidiki lalono mie mohatokoomu itu bhe keana dua nosabha totono lalo kumatanga-tangano.

²⁹ Nepulaoꞌaoku suano totono lalomiu, tamaka totono lalono mie mohatokoomu itu. ⸤ Bheanea bhe so meenano dua,⸥ “Noafa bhahaa kabebasiku tabeano dotieneane dua totono lalondo mie bhaiku?

³⁰ Ane ahumaa poowa aefoampe katumpuno lalo ne Lahataꞌala, noafa gahaꞌa dobihidhingi kanau mbaꞌinomo ahumaa oti anaꞌa, ingka padamo aefoampeane katumpuno lalo ne Lahataꞌala?”

³¹ ⸤ Katobhoosiku peda aini:⸥ ane momaa tawa mohoꞌu, tawa o ae maka dua nehabumu, habue bhahi-bhahiꞌe naꞌa so kakalabhiano Lahataꞌala.

³² Ne kodadimiu koise mehabuomu kakodhosaꞌando mie bhaimu, naetaa miendo Yahudi, naetaa miendo Yunani, tawa umatino Lahataꞌala.

³³ Dadiomu peda idi ini. O ae maka nehabuku sadhia aꞌuleiꞌe laloku afekaꞌia lalondo sabhaha mie, miina aeꞌondofi so kaetaaꞌano wutoku, tamaka so kaetaaꞌando mie bhahi, neanomo dasumalamati.