1 Korintus 1 - Muna Southern Dialect

Kalengkano suha 1:1-3

¹ Suha aini nomaiꞌao ne idi Paulus, mie nebhasi membalino rasuluno Kristus Yesus hampano kapoindalono Lahataꞌala, bhe nomaiꞌao dua ne Sostenes bhahitientoomu.

² Suha aini so hintimiu umatino Lahataꞌala we Korintus, umati nefekopuuni so Lahataꞌala weo kaseꞌise bhe Kristus Yesus. Nobhasikoomu membaliomu umati mongkilono poowa-owaomu bhe sabhaha mie metondalano ne Ompuntoomu Yesus Kristus ne amai maka dua. Anoamo Ompundo bhe Ompuntoomu dua.

³ Sio-siomo sadhia napobhaiangkoomu kabarakati bhe katohopono dadi maiꞌao ne Lahataꞌala Amantoomu bhe Ompu Yesus Kristus.

Katumpuno lalono 1:4-9

⁴ Sadhia aefoampe katumpuno lalo ne Lahataꞌala hampano padamo nofosampuangkoomu rahamatino noangka ne Kristus Yesus.

⁵ Weo kaseꞌisemiu bhe Kristus dadimiu nohangkaeamo tanofegiu: ibahatino nelangkemo kapandemiu bhe nembalimo fofoinaꞌuomu.

⁶ Aini katandainomo putae bhihitano Kristus neowa mani nokopahakamo weo totono lalomiu.

⁷ Dadiꞌanomo miinamo bhe kapooli nedawuꞌaono Rohino Lahataꞌala nemokaeꞌaomiua maka taanta-antagimoomu oleo so katiwohaꞌano Ompuntoomu Yesus Kristus ne sabhaha mie.

⁸ Wutono Kristus namekamatangkakoomu ampa we kafetompaino, neanomo pae kodengoomua ne oleo kahatoꞌano Ompuntoomu Yesus Kristus naꞌaa.

⁹ Lahataꞌala nokampuu-mpuu ne dhandino. Ingka Anoamo bhasikoomu seꞌiseomu bhe Anano, Yesus Kristus Ompuntoomu.

Katangahi keana bhe powengke-wengkeꞌa weo umati 1:10-17

¹⁰ Bhahitieꞌiku! Aesalo mpuu ne hintimiu weo neano Ompuntoomu Yesus Kristus, sekakolaloomu! Koise bhe powengke-wengkeꞌa ne olotamiu, tamaka fekamatangka kaseꞌisemiu, sefekihiomu.

¹¹ Kapaꞌamo bhahitieꞌiku, dofohato kanau mieno polambuno Kloe putae nandoo potaga-tagaliꞌa ne olotamiu itu.

¹² Nepulaoꞌaoku peda aini: hintimiu itu seemie-seemie nopugau, “Idi ne wetano Paulus”, “Idi ne wetano Apolos”, “Idi ne wetano Petrus”, bhe nandoo dua mugauno, “Idi ne wetano Kristus.”

¹³ Bhahaa Kristus maitu nopodawu-dawu? Bhahaa Paulus nekantai te sau salipu so hintimiu? Bhahaa hintimiu dokadiu saranikoomu weo neano Paulus? ⸤ Ingka miina.⸥

¹⁴ Notumpu sepaliꞌa laloku hampano kabhahimiu itu bhe naseemie miina bhe nekadiuku, mpahinomo Krispus bhe Gayus.

¹⁵ Dadiꞌanomo bhe naseemie pae bhe so mugauno putae anoa maitu akadiu saranie weo neaku.

¹⁶ Uumbe gahaꞌa, polambuno dua Stefanus akadiu saranida idi, tamaka we simbalino andoa ini miinamo amandeꞌaanea bhahaꞌi nandoo dua nekadiuku.

¹⁷ Kapaꞌamo Kristus notudu kanau suano so afokadiu saraniꞌao, tamaka so aefoleleꞌao Bhihita Metaa; sanginomo aini tabeano adhumalangie pae atumangkaꞌao kapandeku apugau, keana nosia-siaꞌao kuasano mateno Kristus te sau salipuno.

Kuasa bhe kapandeno Lahataꞌala noꞌonumo ne Kristus 1:18—2:5

¹⁸ Mbali mie so binasano, bhihitano mateno Kristus te sau salipu daanumo dokonae bhohe, tamaka so intaodiomu nefosalamati bhihita amaitu katiwohaꞌanomo kuasano Lahataꞌala.

¹⁹ Nandoo tibuhino weo Kitabi peda aini, “Timbangindo mie kotimbangi amobinasae, kapandedo mie kokapande amosalie.”

²⁰ Kaowu somo ae bhahaa mie kokapande? Somo ae bhahaa mie melangkeno sikolaa? Somo dua ae bhahaa mie kofekihi ne dhunia ini? Kapaꞌamo Lahataꞌala ingka padamo nofotiwohae putae sabhaha kapandeno dhunia ini sanea bhohe.

²¹ Hampano kapandeno Lahataꞌala, nofotantuemo putae manusia miina naembalia namandeꞌao Lahataꞌala nomaiꞌao ne kapandeno wutono. Tamaka Lahataꞌala nokopatudhu namosalamati mie marasaeano noangka ne bhihita nefolele mani, gahaꞌaitumo bhihitamo aini nekonando dhunia sanea bhohe.

²² Miendo Yahudi desalo tanda timenteꞌaono ⸤ so bukutiino⸥ , bhe miendo Yunani deꞌondofi kapande.

²³ Tamaka insaodi ini taefolele bhihitano Kristus mateno te sau salipu. Bhihita aini nodaiane lalondo miendo Yahudi, mie suano Yahudi dokonae tula-tula bhohe.

²⁴ Tamaka mbali mie toka nebhasino Lahataꞌala, naetaa mieno Yahudi naetaa suano Yahudi, Kristus katiwohaꞌanomo kuasa bhe kapandeno Lahataꞌala.

²⁵ Kapaꞌamo wohaꞌano kabhoheno Lahataꞌala ingka nofoliuꞌe kapandedo manusia, wohaꞌano kanaleno Lahataꞌala ingka nofoliuꞌe kaꞌosando manusia.

²⁶ Bhahitieꞌiku! Soba feꞌulaiꞌeomu pakatibhasimiu ne Lahataꞌala. Ne pomatando manusia, dofeemie bhahaa mandeno? Dofeemie bhahaa kokuasano tawa maiꞌaono ne kaomu? Ingka miina dabhahia.

²⁷ Kapaꞌamo Lahataꞌala nepili mie bhohe ne pomatando manusia so daoambanoꞌao mie mande, nepili dua mie monale ne pomatando manusia so daoambanoꞌao mie moꞌosa.

²⁸ Mie mepandano kaengkohaꞌa we dhunia ini, mie nepisaki, bhahamo mie tapa kofaha-fahalaano ne pomatano dhunia, nopilida Lahataꞌala so namosaliꞌao melangkeno kaengkohaꞌa ne pomatando manusia.

²⁹ Patudhuno keana bhe so sumangke-sangkeno wutono ne wiseno Lahataꞌala.

³⁰ Tamaka hampanomo Lahataꞌala, hintimiu seꞌisemoomu bhe Kristus Yesus. Anoa itu kaꞌonuꞌano kapandeno Lahataꞌala so intaodiomu, fopometaaꞌaono bhe Lahataꞌala, fofekangkilono dadi bhe fofobebasino maiꞌao ne dhosa.

³¹ Dadiꞌanomo naposahataa bhe tibuhino weo Kitabi peda ini, “Mie sumangke-sangkeno wutono, naetaa namowose bhakeno hampano nehabuno Ompu.”