Sam 99 - Madak

Moroa Ni Loorong Silok Ik Lok Pana Axap

¹ Leeme Silok, neni Loorong Silok; la limixin di deede. Neni it kis at linin orong teren mavana at lempanga raptava (cherubim) la lavatbung menemen ing nengne.

² Leeme Silok neni Lanaraavuk to xeneng Saion, neni ik lok mavana xasep tinotno ri larabung mixin axap.

³ Limixin axap dinaba emi asu mi mo laasen silok teren la dinaba tong i do, neni i melemelengan!

⁴ Loorong Silok nenu Lanaraavuk, u vavara aleng leveloklok in manton; ugara vaxaru vam leventaangas manmanton kusu limixin diba mumu asu i ro xeneng Israel; ugara xip pot pam mi loklok mokmokso la levelinga rurutun.

⁵ Leemi asu ri Leeme Silok ne Moroa atnedik. Mina ngising tin to melamgo at loxot kitkis teren! Neni i melemelengan!

⁶ Moses mi ne Aron duga gugu ngan lumaasa ren, la ne Samuel neni ga ngising tin. Diga ngising ti Leeme Silok la neni ga lox epovo levesingising atnedi.

⁷ Neni ga paase ridi boro xeneng at lovotakabu; digang tonga res at Lenavolo la levelinga neni gam taba nedi min.

⁸ O Leeme Silok, nenu ne Moroa atnema, uga lox epovo lodoxoma at limixin taram; uga lox asuusu i ridi do nenu ne Moroa umdoma xepe lengkakapmek, la uga lox asongot nedi mumu levengkakapmek atdi, ketla melemu uga doxoma xepe laxakapmek atnedi.

⁹ Leemi asu ri Leeme Silok ne Moroa atnedik, la ata ngising tin to at loxongkaana xaala Saion! Leeme Silok ne Moroa atnedik i melemelengan.