Sam 86 - Madak

Lisingising Ti Loklok Tooro

¹ Leeme Silok, una ronga ia; una sep siam mu ia, atla ara molos axap la axo epovo ri lok tooro axa ia.

² Una lox asepsu ia basinge lanmet, atla nia a ruturun amisik tu; una lox aroo ia, atla nia lasaxaruki ram la a nuunu saga ram.

³ Nenu ne Moroa rak, kuren la una belemumu ia; at levenaleng axap, a ngising tu.

⁴ O Leeme Silok, una lox aklek ia, lasaxaruki ram, mila levesingising tarak i ruturun amisik tu.

⁵ Uk lok luvukat tinema la um doxoma xepe laxapmek atnema, la u umsu mi labalamu lexen tinedi axap no di ngising parav u.

⁶ Leeme Silok, una ronga i na levesingising tarak; una ronga na lerengteng tarak ti loklok tooro.

⁷ A toro ru xeneng at levenaleng at levenmumuat, atla up sep siam at levesingising tarak.

⁸ O Leeme Silok, kopmen bok ba temoroa go i lok ngan u, la xopmen tino teta go ga lok tavanga silok ngan mo lempanga nenu ga lox i.

⁹ Mo laranep silok ua nenu uga rudum li di, dinaba xis tintiding to melamgo ram; la dinaba emi asu mi laasen taram.

¹⁰ Nenu Lanaraavuk la uk lok lempanga maraanu; nenu xusuk mun ne Moroa.

¹¹ Leeme Silok, una anasa ia mi lempanga u vara i xusu ana lox i, la anaba ronga res amisik taram; una anasa ia xusu anaba gugu taba u mi lorooro axap tarak.

¹² O Leeme Silok ne Moroa rak, anaba emi asu minu mi lavatpeeve axap tarak. Anaba vavang asu lununuan taram at levenaleng amisik la noxo xap.

¹³ Labalamu lexen taram tia i silok aleng! Ugara lox asepsu vam ia basinge lamaut.

¹⁴ O Moroa, limixin loklok papavas nga mo dit pas tangarang ia; la libinam tadi longlong kuxurung mo di lok do dina sev amer ia, nedi limixin ua dixok mulus ka levelinga ram.

¹⁵ Ketla nenu ne Moroa la Leeme Silok tarak, u ruuna lebelemumu la labalamu lexen, uk lox atnaasan, uk belen tuntun, la u ruturun amisik ti limixin taram.

¹⁶ Una repukus mu ia la una belemumu ia; lox alolos ia la una lox aroo ia, atla nia a gugu taba u ngan lasaxaruki rinotno ram.

¹⁷ Leeme Silok, una lox asuusu mo luvukat taram tia, kusu nedi ua dingolong angtungun tia, dinaba mangan at loxonaleng dina ven i do ura lox aratao xaka ia la ura lok tooro ia.