Sam 24 - Madak

Loorong Silok.

¹ Lavatbung menemen la levempanga axap di nemen keneng teren, ni at Leeme Silok. Lavatkangka mi levempanga axap di rooro, ateren mun.

² At lurutu kaxat, neni ga lok li laxangka ro mavana at lamaxat. La ni ga lok li bok levenamkumkun to xa maxopok at lisimaramain.

³ Loklok atnege i lox avukat kusu neni ba epovo na vas urut uto vana at lakaana at Leeme Silok ti lotu saparav i? Loklok atnege i lox avukat kusu neni ba epovo na vubeles uto xeneng at loogu laplavang teren i xaala?

⁴ Nedi mene di dadat at loklok atnedi la lodoxoma atnedi, la kopmen dina lotu saparap laxampoovo moroa la kopmen dina tong asu levengkakaape xaxarang.

⁵ Leeme Silok naba lox anarong di. Moroa ni Lunto atdi la naba tong atkatla li atdi do nedi limixin sepse.

⁶ Limixin kerepmo di ngaongao ri ne Moroa, la dit pas amisik ti lotu saparap ne Moroa at ne Jakop.

⁷ Mina suang soso mene lempatban at langas uat, mina suang axap lempatban megano kusu Loorong Silok na vubeles.

⁸ Nege na Loorong i silok solo? Ni Leeme Silok la ne Lanaraavuk; lolos teren i volo la ik sak tup mi lavamunepen teren at levenaleng at leesep. Neni Leeme Silok.

⁹ Mina suang soso mene lempatban at langas uat, mina suang axap lempatban megano, kusu Loorong Silok na vubeles.

¹⁰ Nege na Loorong i silok solo? Neni Leeme Silok, neni Lanaraavuk. Neni Loorong Silok.