Sam 149 - Madak

Loxompixan Emi Asu

¹ Leemi asu ri Leeme Silok! Mina vixan loxom pixan maxat ti emi asu mi Leeme Silok; mina emi asu min to at lovotpot buru atnedi limixin ua di ruturun tin!

² Nemi leme Israel, minak lek mumu laradi runtudum li atnemi; nemi limixin me Saion mina momo mumu mo Loorong Silok atnemi!

³ Mina tii momo ri emi asu mi laasen teren; mina pasa levengkuvu eburu mi leven gita ri emi asu min.

⁴ Leeme Silok in tuuna ka lomomo mumu limixin teren; im taba asen silok tinedi ua dik lok atnaasan la imtaba di mi lolos ti sak tup mi lavamunepen atdi.

⁵ Limixin at ne Moroa dina momo mi leepang silok atla diga sev asi nedi, la dinak pixan momo maraanu rinotno at lengkanimin axap.

⁶ Naba lox avukat do dinap kup silok at loxonaleng dina emi asu mi ne Moroa, la dinam tebeng levenise esep sengsen atnedi,

⁷ kusu tik sak tup mi levenabung mixin petpes, la rik lox asongot di,

⁸ la kusu ri koxo lavaorong atnedi mi lempat sen, la mo lubung amgomgo atnedi bok mi lempat sen aen.

⁹ Na lempanga naba ravasu kusu ri lok li liina mavana at levenabung mixin petpes ngan ne Moroa gara vit li vam i. Nai i ngan lugugu at limixin at ne Moroa kuren la dinaba lok kaka laasen silok (lokox asinorong) teren. Leemi asu ri Leeme Silok!