Sam 136 - Madak

Loxompixan Ti Tong Avukat

¹ Ata tong avukat ti Leeme Silok, atla neni i lox avukat; kopmen tekavaxap at labalamu ren.

² Ata tong avukat ti ne Moroa mo i silok ti leven moroa axap; kopmen tekavaxap at labalamu ren.

³ Ata tong avukat ti Lanaraavuk i lolos silok polo nedi lavaeme silok axap; kopmen tekavaxap at labalamu ren.

⁴ Neni xusuk mun ik lok lempanga sangsangu i silok aleng; kopmen tekavaxap at labalamu ren.

⁵ Neni ga rudum li laxalibet mi mo lakleklen teren; kopmen tekavaxap at labalamu ren.

⁶ Neni ga vaxaxis li laxangka to mavana at laras; kopmen tekavaxap at labalamu ren.

⁷ Neni ga rudum laxangking mi lagaaling; kopmen tekavaxap at labalamu ren.

⁸ La mo laxangking ti lok tatao levenaleng kangking; kopmen tekavaxap at labalamu ren.

⁹ La lagaaling mi laxam penti rik lok tatao levenaleng kanimin; kopmen tekavaxap at labalamu ren.

¹⁰ Neni ga sev amet laxamdak temes avot at leme Isip; kopmen tekavaxap at labalamu ren.

¹¹ Neni ga lam asu limixin me Israel basinge lenep silok Isip; kopmen tekavaxap at labalamu ren.

¹² Neni ga lox i mo mi lolos silok teren atla lekngen i lolos aleng; kopmen tekavaxap at labalamu ren.

¹³ Neni ga lok langas to xantubu at loxontas memele; kopmen tekavaxap at labalamu ren.

¹⁴ Neni ga lam avolo limixin teren go xantubu at laras; kopmen tekavaxap at labalamu ren.

¹⁵ Ketla ni gak mit axong loorong mi luvuttadi esep me Isip; kopmen tekavaxap at labalamu ren.

¹⁶ Neni ga lam avolo limixin teren to at lamatbin; kopmen tekavaxap at labalamu ren.

¹⁷ Neni ga sev amet lavaorong lolos; kopmen tekavaxap at labalamu ren.

¹⁸ Neni ga sev amet bok mo lavaorong ua limixin axap digak leklen di (mi levenasen silok); kopmen tekavaxap at labalamu ren;

¹⁹ ngan ne Sion bok loorong at leme Amor; kopmen tekavaxap at labalamu at ne Moroa.

²⁰ Ga sep bok ne Ok loorong me Basan; kopmen tekavaxap at labalamu at ne Moroa.

²¹ Neni ga raba limixin akmokso ren mi levennep kangka atnedi na lavaorong; kopmen tekavaxap at labalamu ren.

²² Neni ga raba levennep kangka ri limixin akmokso ren me Israel; kopmen tekavaxap at labalamu ren.

²³ Neni goxo domampe nama at levenaleng limixin munepen digap sep nama; kopmen tekavaxap at labalamu ren.

²⁴ Neni ga lox asepmus nema basinge lavamunepen atnama; kopmen tekavaxap at labalamu ren.

²⁵ Im taba luxa lempanga axap di rooro; kopmen tekavaxap at labalamu ren.

²⁶ Ata tong avukat amisik ti ne Moroa boro vana at laxalibet; kopmen tekavaxap at labalamu ren.