Sam 113 - Madak

Leemi Asu Ri Lununuan At Leeme Silok

¹ Nedik ata emi asu mi Leeme Silok. Nemi luvuttadi gugu at Leeme Silok, mina emi asu mi laasen teren.

² I lox avukat do limixin dina emi asu min mo la at levenaleng axap i tu melamgo.

³ Limixin axap boro at lavanuet mera manman at na lavatbung menemen, mina emi asu mi Leeme Silok.

⁴ Leeme Silok mun im gomgonga mavana at larabung mixin axap, la lisisixam teren i umsu rovana at laxalibet.

⁵ Kopmen tara i lok ngan Leeme Silok ne Moroa atdik, neni mo it kis at loxonin orong teren pana.

⁶ La mo ik milik si ukopok ti reven lamavangkap mi lavatkangka.

⁷ Neni ik lox axatu nedi luvuttadi banbalo basinge laxakup la iram tebeng luvuttadi pakpakes basinge laxakup at lempat balangkao,

⁸ la irak lox asilok nedi kusu dina etangas eburu mi lavanarong at loorong, nedi di silok kantubu at limixin teren.

⁹ Neni ik lox amenemen lodoxoma at lavakin kopmen dina pisik, la im taba nedi mi laxamdak mi laxaalik. Ata emi asu mi Leeme Silok.