Sam 11 - Madak

Laradi I Nuunu Lolos At Ne Moroa

¹ Nia a nuunu saga at Leeme Silok, ni laradi xumkubak pe ria. Kuren la a noxo ronga res at limixin tangtangku di tong i ria dola, “Una rava oo ngan lapka uto vana at lempatkaana,

² atla limixin kapmek di gagas kusu dina soo u mi levesoosoo atdi; di kuxut tangais luvuttadi avukat to at levengkot buxumin kusu do dina soosoo di.

³ Laradi avukat naba lok lavanga salai, dola limixin axap ding tonga xepe levelinga at lubung amgomgo la kerepmo lorooro at limixin ik lok kapmek aleng?”

⁴ Leeme Silok, mo it kis at loogu laplavang kaala ren; lixitkis orong teren ik lok toxun pana at lebelen laxalibet. I reven tatao limixin axap at lavatbung menemen la ikleklen axap levempanga dik lox i.

⁵ I viila mumu loklok at limixin avukat la limixin kapmek bok; neni ixo esuxun mi limixin di los polo Lenavolo ren.

⁶ Neni naba soli asi laxao bokbolot la nabak bolot limixin kapmek mi la salpa (sulfur); la naba lox asongot di mi lamanman kapmek iplivi aleng.

⁷ Loklok at Leeme Silok in manton la i vara mun leven gugu nunuan; nege ik lok lempanga avukat nabat kis esogo eburu min to at lemenemen teren.