3 Jon 1 - Madak

Lavapaase Axasep

¹ Nenia lamgomgo at lotu. A malagan na lovoang ti lentangas orong tarak, ne Gaius. Nenia a balamu ruturun u.

² Lentangas tinotno rak. Nia a sing ne Moroa do una momo mi lorooro avukat u ruuna ka i at labantuxu ram kerekngan loroonan taram i ruuna lorooro avukat.

³ Nenia aga lok momo aleng at loxonaleng leventaba at luvutneton dik diga rupot la diga vaase asuusu lorooro ram, do u ruturun amisik, i ngan do lorooro ram ik sixit emu mi levelinga ruturun at ne Moroa.

⁴ Ise nenia a ronga i do luvutnuruk di mumu asu luruturun, nenia a lok momo aleng.

Jon Ga Emi Asu Mi Ne Gaius

⁵ Lentangas orong tarak. At lugugu ram ti lok tooro luvutneton dik, uk lox ampana avukar i, keke i do nedi limixin dik taxoklen di.

⁶ Diga vaase asuusu labalamu ram to melamgo at limixin at lotu nade. La ba lox avukat do una lok tooro nedi at lavatpas atdi, mila loklok kerepmo i epovo at lavavara at ne Moroa.

⁷ Diga on basinge lara menemen atdi ri vaase asu laasen at ne Karisito la di goxo lok kaka tevempanga anan kopla tevempilas boro at lavamolon.

⁸ Kuren la i epovo rinotno do nedik limixin nuunu ata lok maraose mi nom luvuttadi kusu nedik axap ata gugu eburu ti tong asu levelinga ruturun.

Diotrepis Mi Ne Demitrius

⁹ Aga malagan pam lovoang ti limixin nuunu at lotu mumu i na lavanga; ketla ne Diotrepis neni laradi i vavara aleng i do na lok ngan lamgomgo atdi, la neni ixo mu asu levelinga atnama.

¹⁰ Kuren la do nenia ana vot saparap nimi, anaba tong asu axap lempanga neni ira lok pam i, mo i lok kapmek; ik lok levempapaase ren mumu nama ua i lok kapmek aleng. Neni xopmen nak lok mene nga mo loklok, ketla neni ixok lok tooro bok luvuttadi vavang do dit pot to at lemenemen teren la neni ip sep pepe limixin at lotu mo di vavara nak lok tooro mo luvuttadi vavang; la ik lok kepe bok mo limixin basinge lixitkis keneng at lotu.

¹¹ Lentangas tinotno rak. Nemen gat uguta mu asu loklok at luvuttadi xapmek; ketla una mu asu leveloklox avukat. Do nege i lok leveloklox avukat, neni at ne Moroa; la do nege i lok laxakapmek, neni kovisi na ven kibis ne Moroa.

¹² Limixin axap di paase levelinga avukat mumu ne Demitrius la lorooro ren ik sixit epovo mi levelinga ruturun. Nema bok ma paase levelinga avukat mumu i, la nenu uklen i do na levelinga atnama i ruturun.

Levempapaase Avit

¹³ A ruuna laxalinga solo xusu ana tong i ru, ketla a xopara i xusu ana malagan i mi lempanga mamalagan.

¹⁴ Am doma alii i do aba ven ba u melemu la ataba epentu la ata epaase.

¹⁵ Limila na nemen eburu minu; nedi larapen tangas axap taram nade di lox aonon levelinga momo ru. Nenu xa una raba levelinga momo ri larapen tangas atnama medo. I ruturun.