2 Jon 1 - Madak

Lavapaase Axasep

¹ Nenia lamgomgo at lotu. A malagan na levelinga ru, latkin soksoxolik at ne Moroa la ti laxaalik mi laxamdak taram. Nia a balamu ruturun nimi. Kopmen nenia xusuk mun, ketla nedi axap diklen levelinga ruturun at ne Moroa di balamu bok nimi,

² mila levelinga ruturun at ne Moroa i nemen keneng at lorooro atdik la naba nemen amisik eburu midik.

³ Letaba nabalamu, lebelemumu, la lenmila rinedik boro at ne Temen dik, la ne Iesu Karisito, Nitna ne Moroa; la lorooro atdik naba lox asuusu levelinga ruturun la labalamu.

Levelinga Ruturun La Labalamu At Limixin Lotu

⁴ Nenia a lok momo aleng mila nia aga ronga i do lentaba at laxamdak mi laxaalik taram di mumu asu levelinga at ne Moroa, kerekngan ne Temen dik ga tong taba dik min.

⁵ La monga a sing u, latkin orong, do dik tana ebalamu ela. Na xopmen leretere maxat a malagan i ru. Na leretere dik taga ronga ka i ap mo laaleng nedik taga lok ka lorooro maxat at ne Iesu Karisito.

⁶ Lavasuun at na labalamu i lok keretna. At lorooro axap atdik tana ronga res at levelinga at ne Moroa. Mo leretere, nemi miga ronga i ap mo laaleng miga lok ka lorooro maxat i lok keretna. Lorooro atnimi na umsu mi labalamu.

⁷ Buaang nedi luvuttadi sosolo arup diga vas epeseves su uto at na lavatbung menemen. Mo limixin kopmen na tong asu i dola Iesu Karisito ga vot ngan laradi ruturun. Luvuttadi xerepmo nedi lavaanat sosolo arup, la di munepen mi ne Karisito.

⁸ Mina rooro eburu mi loklok tatao, kusu nemi xopmen mi noxo ke aie mo lunuunu atnimi, migara gugu vam tin; la miba ruuna xobot luunun.

⁹ Do tara ixo mumu asu levenanasa at ne Karisito, la i lox epasum i mi levenanasa vetpes, neni xopmen nat kis esogo mi ne Moroa. Ketla do tara i mumu asu levenanasa at ne Karisito, neni it kis esogo mi ne Temen dik la ne Nitna.

¹⁰ Do tara i vot pasa nimi la i vaase asu levenanasa kopmen at ne Karisito, keket mita mulus ka i. La keket mita lok maraose min la mina seega rangarang i.

¹¹ Do tara i mulus ka i, naba lok ngan dola neni i tu eburu min keneng at lempanga xakapmek teren.

Levempapaase Avit

¹² A ruuna buaang lempapaase xusu ana tong i rinimi. Ketla axo vara i xusu ana malagan i at lovoang mi lavanga mamalagan; kusuk mun a doxoma i do aba vosiga nimi, la ana epaase eburu minimi kusu nedik taba lok momo aleng.

¹³ Laxamdak mi laxaalik at netam orong di lox aonon lomomo rinimi. I ruturun.