Taetasi 3 - Ṉa Alaofua Falu 1923 1949

¹ Oki faaroṉo kera lau keki onotoona na keki roo sulia toa gwauwai ki, ma toa inoto ki, keki ade sulia si ṉata, keki fifarao asi ra lea ki sui bana,

² Kesi ṉaṉata taa seena ta wane, kesi thathathamii oli susuu, keki abula thathaore, keki abula marabibi uria wane ki sui boo.

³ Uria ni kulu lau boo inao mai kulu oewanea, kulu adede faisia si ṉata, kera lole kulu, kulu ra ifana si thathami la taa tataka ki ma si do oro ki ne faalea kulu, kulu toto asi lio ne taa ma ana uga la, kulu do kera mamagu ania, kulu riki kulu kwailiu ka taa.

⁴ Ma sui si maṉa na ade lea lana tha God ne faamaruki kulu, ma liothau la nia uria imole ki, e fula mai,

⁵ Asi ra ana kokoto la na kulu tala ilia e ai, ana tatakomia nia, e faamaruki kulu, ana do ni sisiu la ana thauwai falu la ma ana to lea la lau atha Spirit Abu,

⁶ Ne kiki faamau ania ani kulu, atha Jesus Christ ne faamaruki kulu;

⁷ Fasi, uria na kera ala fafia kokoto lakulua uria lea la nia, kuki inamaruki ana Maka kulu asi do na kulu manatatoo ṉado uria na ṉa marukia tatha.

⁸ Si ṉata eri e mamana, ma nau ku thathamia oki ṉata seeraa sulia si do eki fasi toa na kera fitoona tha God keki beta suli kera fasi keki seemabe asi ra lea ki. Si do lea ki neri na kai adomia imole ki:

⁹ Ma oko keto faisia soetoona la ki toa na kera ṉata oewanea, ma talisibara ki, ma oli susuua ki, ma firu la ki sulia ṉa lo, uria na do eki sa ka kwaiadomi e ai, tonee do ki bana.

¹⁰ Wane na ka to’oa si do ne ai si kokoto, buriana no ṉata fifi isana ma ruana o ṉata fifi lau, oki keto faisia.

¹¹ Uria no thaitoomana na wane una eri kera faataalia naa, ma si maṉa nia abula taa, liona i talaana ka alaṉi nia ania.

¹² Si maṉa nau kwai arasia kau tha Atemasi isamu, mado tha Tikikasi, oki lakwasia mai isaku uri Nikopolisi: uria manataku sa kwai to sulia unii gwagwaria i fanua eri.

¹³ Oki seemabe ana adomi lana kau tha Sinasi, wane ni kwaifamanatai ana ṉa lo, ma tha Apolosi sulia laea kera, fasi e ai kesi rofea ta si do.

¹⁴ Ma toa kulu ki lau boo keki too uria seemabe la asi ra lea ki na kai talaana si do na keki rofea e ai si ei boo, fasi e ai kesi ’uria ’ai ne ai si fuṉu.

¹⁵ Toa eki sui boo na kera to isaku kera thathamia kwai ṉata isamu ’uria sa ni kera keka ṉata. Oko ṉata isana toa na kera liothau ani kamilia ana fitooa ’uria sa ni kamilia mika ṉata. Lea la kai to bi kamulua sui boo. Emeni.