Roma 6 - Ṉa Alaofua Falu 1923 1949

¹ Sui si ta na kuki sorea? Kuki abula taa ṉado, fasi lea la kai oro alaa?

² Si do ka ai neri. Kulu na kulu mae naa faisia abula taa la, nifana ade lana fasi kuki to lau ania?

³ Mulu dora ania si kula eri suli kulu sui boo na kera babataesi kulu atha Christ Jesus, na kera babataesi kulu ana mae la nia?

⁴ Mania kera kwaiṉei kulu ofu bi nia ana babataesi la eri ana maea: fasi talafana na kera tataea tha Christ faisia toa mae ki uria inotoa ṉa Maka, alafana lau boo ni kulu kuka abula ana marukia ne falu.

⁵ Sulaania mada sa kulu ofu bi nia ana tee do ana nuna mae lana, kuki ofu lau boo bi nia ana tee do ana nuna tatae lana;

⁶ Uria na kulu thaitoomana si do eri neri, wane totonao kulu kera fota fafia ofu bi nia, fasi keki faaaia seedo eri ana abula taa la, fasi ita asi maṉa eri kesi suuwai kulu kuki roo lau sulia abula taa la;

⁷ Sulaania wane ne mae naa e luke naa faisia abula taa la.

⁸ Ma sui mada sa kulu mae ofu naa bia tha Christ, kulu fitoona si kula eri na kuki maruki ofu bi nia;

⁹ Uria na kulu thaitoomana si do eri, kera tataea tha Christ faisia toa mae ki, sui so ka mae lau ana ta si maṉa e ai; ṉa maea ka ai si inoto lau fafi nia.

¹⁰ Sulaania ana mae la ne mae ania, e mae tee si maṉa boo ana abula taa la: ma marukia ne maruki ania, e maruki ifatha God.

¹¹ Alafana lau boo manatamulua na ni kamulua mulu mae lau boo ana abula taa la, ma muka maruki ifatha God atha Jesus Christ na Lord kulu.

¹² Mania musi alamatania abula taa la si inoto fafia seemulua na toto kai mae, fasi muki ade sulia si thathami la taa nia ki:

¹³ Bia musi falea si do na ana seemulua ki ifana abula taa la ana do ni ra la ki asi lio ne ai si kokoto; muki fale kamulua ifatha God, ’uria toa na muka maruki faisia toa mae ki, ma si do na ana seemulua ki na do ni ra la ki ana kokoto la ifatha God.

¹⁴ Sulaania abula taa la so ka inoto fafi kamulua e ai: uria na musi to ifara ṉa lo, mulu i fara lea la.

¹⁵ Sui ta si ta lau? kuki abula taa, uria na kusi to ifara ṉa lo, kulu i fara lea la? Si do ka ai neri.

¹⁶ Musi thaitoomana si kula eri neri, wane na muki fale kamulua ifana ana toa ni ra la ki ana ade la sulia, kamulua na toa ni ra la ana wane eri na mulu ade suli nia; mado ana abula taa la ifana maea, mado ana ade la sulia si ṉata ifana kokoto la?

¹⁷ Ma sore lea la ifatha God uri kamulua, ni kamulua toa ni ra la ana abula taa la, sui ruruumulua e thathamii ade sulia si do na mulu lio uria ana kwaifamanatai la na kera fale kamulua ania;

¹⁸ Ma uria na kera adea na mulu tonee to faisia abula taa la, kamulua toa ni ra la ifana kokoto la.

¹⁹ Nau ku ṉata ana ṉata lana imole ki sulaania feda lana seemulua: uria na talafana na mulu falea si do na ana seemulua ki ana do ni ra la ki ana manata taa la ma asi do na kera lufia ifana si do na kera lufia, alafana lau boo si maṉa eri muki falea si do na ana seemulua ki ana do ni ra la ki ana kokoto la ifana faaabu lamulua la.

²⁰ Sulaania si maṉa ba ni kamulua toa ni ra ki ana abula taa la, mulu tonee to faisia kokoto la.

²¹ Sui foee do ta na mulu rikia asi maṉa ba asi do ba ki na mulu seenoni ania si maṉa eri? sulaania gwauna si do eki na ṉa maea.

²² Ma si maṉa eri na kera adea na muka tonee to faisia abula taa la, ma kamulua toa ni ra la atha God, mulu rikia foee do kamulua ana faaabu lamulua la, ma gwauna na ṉa marukia tatha.

²³ Sulaania na foli lana abula taa la ṉa maea; ma si do na tha God e tona falea bana na ṉa marukia tatha ni atha Christ Jesus na Lord kulu.