Roma 5 - Ṉa Alaofua Falu 1923 1949

¹ Mania uria na kera ala fafia kokoto la kulu uria fitooa, kulu kwaimani bia tha God ana Lord kulu tha Jesus Christ;

² Wane na kulu idu karaṉi lau bomai ani nia uria fitooa ana lea la eri na kulu takwe ania si maṉa eri; ma kulu seethathala ana manatatoo ṉado la uria inotoa tha God.

³ Ma ana talitoona bana si do eri e ai, kulu seethathala ana taa la eki lau boo na kulu to ania: uria na kulu thaitoomana to la ana taa la kai ṉalia mai si lio ni susuu la;

⁴ Ma si lio ni susuu la kai ṉalia mai si lio ana thaitoomana lana si do ne ilitoodaki sui naa; ma si lio eri kai ṉalia mai manatatoo ṉado la uria si do ne lea:

⁵ Ma manatatoo ṉado la eri e ai si faaseenoni kulu; uria na kera kikira liothau la tha God i la ruruukulua atha Spirit Abu na kera falea ifakulua.

⁶ Sulaania si maṉa na sukwaia e ai u faisi kulu, tha Christ e mae asi maṉa nia uria toa na kera fare faekwa atha God.

⁷ Sulaania e afetai sa imole kai mae uria wane ne kokoto: sui bota ana sa mado e ai ta imole kai seeraa uria mae la mena ifana wane na abula lane lea.

⁸ Ma tha God ana kai ṉata ifana liothau la nia uri kulu, uria si kula eri, si kada na kulu abubula taa u mena, tha Christ e mae uri kulu.

⁹ Sui si maṉa eri na kera ala fafia kokoto la kulu uria abuna, e kwaiakaori ka tatha na keki faamaruki kulu faisia rakeiria eri ani nia.

¹⁰ Sulaania mada sa, asi kada na kulu maalimae ki u, kera ilia na kulu kwaimani lau bia tha God ana mae lana Kaluwane nia, e kwaiakaori ka tatha na keki faamaruki kulu ana marukia nia, si maṉa eri na kera ilia na kulu kwaimani naa bia tha God;

¹¹ Ma talitoona bana si do eri e ai, kulu faabaita kulu lau boo atha God ana Lord kulu tha Jesus Christ, Wane na kulu ṉalia kwaimani la eri na kulu kwaimani lau ania ani nia.

¹² Mania, ’uria lau boo abula taa la e thafali mai i fanua nei iano ana tee nonii wane, ma ṉa maea sulia abula taa la eri; ma sui ṉa maea e to fafia wane ki sui bana, uria na kia sui kia abula taa:—

¹³ Sulaania si maṉa na lo ni u mai, abula taa la e to bana i fanua nei iano: sui kesi alaṉi kera ana abula taa la eri si maṉa ne ai ta lo.

¹⁴ Una ena mena, ita mai atha Adam ka fula atha Mosesi, ṉa maea e inoto, fafia toa eki mena ne ai kesi abula taa ’uria ade garo la tha Adam, wane ne iliṉia nuna Wane eri ne too fasi kai lae mai.

¹⁵ Ma si do na kera tona falea e ai si ’uria ade garo la eri. Sulaania mada sa toa oro eki kera mae uria ade garo lana tee nonii wane, lea la tha God, ma si do na kera tona falea ana lea la uria tee Wane boo, tha Jesus Christ, e baita faamau ka tatha uria toa oro eki.

¹⁶ Ma si do eri na kera tona falea e ai si ’uria si do ne fula mai ana wane eri ne abula taa: uria Wane ni Kotu e ṉata sulia imole me sorea kwae lada uria tee si do boo, ma si do na kera tona falea ana ala la fafia kokoto lana imole, kera falea buriana abula taa la oro ki.

¹⁷ Sulaania mada sa, ana ade garo lana tee wane boo, ṉa maea e inoto uria tee nonii wane eri; e kwaiakaori ka tatha na toa eki na keki ṉali baita ana lea la ma kokoto la eri na kera tona falea, keki inoto ana marukia uria tee wane boo, tha Jesus Christ.

¹⁸ Mania talafana ana tee ade garo la boo si do eri e fula fafia wane ki sui bana ana sore lana kwae lada; alafana lau boo ana tee si do kokoto na kera ilia, si do kera tona falea e fula fafia wane ki sui bana fasi keki ala fafia kokoto lada ana marukia.

¹⁹ Sulaania talafana ana ade lana tee nonii wane ne ade faisia si ṉata kera ilia na toa oro eki kera toa ana abula taa la, alafana lau boo ana ade lana tee nonii wane ne ade sulia si ṉata keki ilia na toa oro eki keki kokoto.

²⁰ Ma ṉa lo e lae lau bomai, fasi ade garo la eri kai oro alaa; ma asi kula na abula taa la e oro alaa, lea la e oro faamau ka tatha:

²¹ Fasi, talafana abula taa la e inoto fafi kia ana maea, alafana lau boo lea la kai inoto uria kokoto la ana marukia tatha atha Jesus Christ na Lord kulu.