Roma 4 - Ṉa Alaofua Falu 1923 1949

¹ Sui si ta na kuki sorea tha Aberahamo, na maka kamilia sulia seena imole e fulatoona?

² Sulaania mada sa kera ala fafia kokoto lana tha Aberahamo uria si ra ki, nia rikia si do ana faabaita lana la fafia; ma inaofatha God e ai.

³ Uria si ta na kekeda la abu eri e sorea? Tha Aberahamo e fitoona tha God, ma kera alua si do eri ifana uria kokoto la.

⁴ Ifana wane ne ra fetei, kesi alua kwaiara nia ’uria do na kera falea ana lea la, do nia i talaana ne lio uria neri.

⁵ Ifana wane eri molo ne ai si ra, sui e fitoona ni nia na kai ala fafia kokoto lana toa na kera fafare faekwa atha God, kera alua fitooa nia ’uria kokoto la.

⁶ Uria tha Defeta lau boo e sorea lea la kai to fafia wane eri, na tha God ka alua kokoto la ifana, si ra ki ka ai faisia,

⁷ Be una eri, Lea iada, toa eki na kera manata lubea naa abula lada asi do na kera lufia, Ma kera thu fafia abula taa la kera ki.

⁸ Lea iana, wane eri na tha Lord ka ai si alua abula taa la ifana.

⁹ Kera sorea lea la eri kai to fafia toa ana kwai kakali la, mado fafia toa eki lau boo na kesi kwai kali kera? sulaania kulu sorea, Ifatha Aberahamo kera alua fitooa nia uria kokoto la.

¹⁰ Sui nifana ade lana na kera alua fitooa eri ifana? si maṉa na kera kwai kali nia, mado si maṉa ne ai kesi kwai kali nia? Si maṉa na kera kwai kali nia e ai, si maṉa eri na kesi kwai kali nia u:

¹¹ Ma nia ṉalia fafuilala, na kwai kakali la neri, si do ana faaṉado lana kokoto la eri ana fitooa ne fitoo ania si maṉa ne ai kesi kwai kali nia u: fasi nia maka ana toa eki sui boo na kera fitoo, toa na kesi kwai kalida mena, fasi keki alua kokoto la fani kera lau boo;

¹² Ma nia maka ana kwai kakali la ana toa eki na toa ana talitoona kwai kakali la e ai, kera sulea lau boo lae lana maka kulu tha Aberahamo ana fitooa eri ne fitoo ania si maṉa ne ai kesi kwai kali nia.

¹³ Sulaania alaṉaia eri atha Aberahamo ma ana kwalafa nia, na nia kai fulatoona inotoa fafia fanua nei iano, si do uria ṉa lo e ai, uria kokoto la eri ana fitooa.

¹⁴ Sulaania mada sa toa eki ana ṉa lo keki fulatoona inotoa eri, kera faaaia ṉa fitooa, ma keka adea alaṉaia eri na ṉa tonee do:

¹⁵ Uria ṉa lo ka ṉalia mai rakeiria; ma si maṉa ne ai ta lo, e ai lau boo ta ade garo la faisia.

¹⁶ Mania do eri kai fula mai ana fitooa uria si kula eri, fasi nia do ana lea la; fasi alaṉaia eri kai mamana ifana kwalafa eki sui boo; talitoona bana toa eki ana ṉa lo e ai, ifana toa eki lau boo ana fitooa tha Aberahamo, ne maka ani kulu sui

¹⁷ (’Uria kera keda, Nau ku alu oe ṉa maka ana kulee toa oro ki) inaofani nia ne fitoona, tha God neri, na ka faamarukia toa mae ki, ma ka ṉata sulia si do ne ai si to ki, ’uria sa do eki e to naa.

¹⁸ Ma wane eri i maalutana si do eki sa kai tofea si do ne manatatoo ṉado uria, e fitoo, me manatatoo ṉado uria si do eri, fasi nia maka ana kulee toa oro ki, alafana si do na kera sorea na ba, Kwalafa oe kai una eri.

¹⁹ Me ai si feda faisia fitooa nia eri si maṉa ne rikia seena ne ’uria seena ta wane mae (uria na tee taleṉee fa ṉali e sui iana), ma rakena ni Sera ’uria se mae naa:

²⁰ E ai si to ana ro si lio uria fitala la sulia alaṉaia tha God; e sukwai alaa ana fitooa, ka faainotoa tha God,

²¹ Me thaitoomana mamana, na si do eri ne alaṉai nia, e talaana ili lana lau boo.

²² Mania kera alua si do eri ifana uria kokoto la.

²³ Sui uria talifili nia e ai, na kera keda na ba na kera alua si do eri ifana;

²⁴ Uri kulu lau boo, na keki alua si do eri ifakulua, toa na kulu fitoona ni nia ne tataea tha Jesus na Lord kulu faisia toa mae ki,

²⁵ Wane eri na kera alamatania uria ade garo lakulua ki, ma kera tatae nia ana ala la fafia kokoto la kulu.