Roma 2 - Ṉa Alaofua Falu 1923 1949

¹ Mania, kale ena, ni tei bana no ṉata mala wane ni kotu, e ai lau ta si do ana suusi lana abula taa la oe: sulaania asi kula no ṉata mala wane ni kotu sulia ta wane lau, o sorea kwae lamu i talaamu; uria ni oe no ṉata mala wane ni kotu o ilia lau boo si do ne ilia.

² Ma kulu thaitoomana na tha God na Wane ni Kotu kai sorea sulia si do ne mamana kwae lana toa na kera ilia si do una eki.

³ Ma kale ena, no ṉata mala wane ni kotu sulia toa ba ki na kera ilia si do una eki, mo ilia lau boo si do na kera ilia, manatamu soki thaka faisia si do eri na tha God kai sorea?

⁴ Mado o fare faekwa ana lea la nia ne baita asia naa ma mamasoro la ma si lio ni doanita tatha la nia, uria nosi thaitoomana sulia lea la tha God eri ne tole oe mai uria manata akele la?

⁵ Ma sulia ruruumu ne sadi ma manatamu ne ai si akele, o alua rakeiria kai to maakwali oe afa boṉi eri ana rakeiria, maṉa na keki fatai nia si do kokoto eri na tha God na Wane ni Kotu kai sorea;

⁶ Nia na kai folia imole ki sui, ta wane boo foli lana, ma ta wane boo foli lana, maana si ra nia ki i talaana:

⁷ Ifana toa eki na kera rofe, asi lio ni susuu ṉado ana ili lana lea la, uria inotoa ma fare baita la ma si do na toto si fufura, kai falea marukia tatha:

⁸ Ma ifana toa eki na kera thathamii firu, ma kesi ade sulia mamana la eri, kera ade bada sulia ade la ne ai si kokoto, kai falea rakeiria ma rakeaṉoṉoa,

⁹ Taa la ma unii fualaṉa, ifana maṉona wane eki sui boo na kera ilia si do ne taa, ṉa Ju totonao, ma ṉa wane i Girisi lau boo:

¹⁰ Ma inotoa ma fare baita la ma enenoa ifana wane eki sui boo na kera ilia si do ne lea, ṉa Ju totonao, ma ṉa wane i Girisi lau boo:

¹¹ Sulaania tha God e rikia imole e totoo bana.

¹² Uria na toa eki sui boo na kera abula taa ṉa lo e ai faisida, toto keki sui ṉa lo ka ai faisida: ma toa eki sui boo na kera abula taa ifara ṉa lo, Wane ni Kotu kai ṉata sulida sulia ṉa lo;

¹³ Sulaania toa na kera roṉoa ṉa lo e ai na kera ala fafia kokoto lada inaofatha God, keki ala boo fafia toa na kera ade sulia ṉa lo:

¹⁴ Uria na si maṉa na Jenetaele ki ne ai ada ta lo keka tala ilia si do sulia ṉa lo ki, toa eki ne ai ada ta lo, kera lo kera i talaada bana;

¹⁵ Asi kula eri, na kera fatai nia si ra ana ṉa lo ki na kera keda i la ruruuda, si maṉa na lioda i talaada kai faamamanea si do ṉa lo e sorea, ma manatai lada na kera manata sulia bi kera i talaada kai sorea kwae lada mado kai suusia abula taa la kera;

¹⁶ Afa boṉi eri na tha God na Wane ni Kotu kai sorea si do na kai uria wane ki maana si do thaufuni kera ki, atha Jesus Christ, sulia si faaroṉoa lea nau.

¹⁷ Rikia fasi, kera alaṉi oe ana thatana Ju, mo kwaitakofale ana ṉa lo, mo faabaita oe atha God,

¹⁸ Mo thaitoomana si do nia thathamia, mo ala fafia si do lea ka tatha ki, uria na kera tooa si do ana ṉa lo ki isamu,

¹⁹ Mo thaitoomana lea no wane ni fatai lana tala ifana toa maade rodo, laafa ifana toa na kera to i la maerodo,

²⁰ Wane ni faamanatai lana toa oewanea ki, wane ni kwaifamanatai la isana wela faekwa ki, no rikia seena manata lea la ma mamana la eri la lo;

²¹ Mania, wane no tooa si do ki isata wane lau, osi tooa si do eki sani oe i talaamu? oe na ṉata lamu e lufia wane si bili, osi bili?

²² Oe no lufia wane si oe, osi oe? oe no mamagu ana god eeta ki, osi bilia si do ana biu tha God ki?

²³ Oe no faabaita oe ana ṉa lo, ana ade garo lamu faisia ṉa lo osi fare faekwa atha God?

²⁴ Sulaania kera ṉata ni faretoliṉi lana thatana tha God i maalutana Jenetaele ki uri kamulua, ’uria lau boo kera keda na ba.

²⁵ Uria na kwai kakali la ka kwaiadomi mamana boo, mado so wane ni ade la sulia ṉa lo: sui mado so wane ni ade la faisia ṉa lo, kwai kakali la oe eri e ’uria sa kesi kwai kali oe.

²⁶ Mania mada sa ta wane na kesi kwai kali nia kai ade sulia si ṉata fifi ana ṉa lo, seena na kesi kwai kakalia e ai si ’uria sa kera kwai kakalia?

²⁷ Ma mada sa kai ade sulia ṉa lo, seena na kesi kwai kakalia e ai si ṉata mala wane ni kotu suli oe, wane no rikia naa si do eri na kera keda ma kwai kakali la, ma una ena mena o ade garo faisia ṉa lo?

²⁸ Sulaania nia Ju e ai, na riki lana seena e ’uria Ju; ma kwai kakali la ne to fatai i seena wane, kwai kakali la mamana e ai:

²⁹ Wane eri molo e Ju, na ruruuna kai ’uria Ju; ma kwai kakali la mamana na ṉa kwai kakali la ana rurui wane, asi do tha Spirit, asi do na kera keda fetei e ai; si do wane ki keki taṉoa e ai neri, tha God ana.