Roma 15 - Ṉa Alaofua Falu 1923 1949

¹ Sui ni kulu na kulu sukwai e kokoto na kuki fanasia si do ana feda lana toa feda ki, e ai si kokoto na kuki faalea kulu i talaakulua.

² Kulu sui, ta wane si ei boo, kuki faalea wane kulu ki uria si do ne lea, ana faasukwai lakulua la.

³ Uria tha Christ lau boo e ai si faalea nia i talaana; ma, ’uria si do na kera keda, Faretoliṉi la na kera ṉata ania ana faretoliṉi lamu la e kulua fafi nau.

⁴ Sulaania si do eki sui bana na kera keda dini mai inao kera keda uria faamanatai lakulua la, fasi asi lio ni susuu la ma ana inamaruki la na kekeda la abu eki ka faainamaruki kulu ania, kuki manatatoo ṉado uria si do ne lea.

⁵ Sui ṉa God ana si lio ni susuu la ma ana faainamaruki lana imole, kai falea si kula eri ifamulua, muki to kwailiu ana tee si manata sulia tha Christ Jesus:

⁶ Fasi ana tee si lio ma ana tee si ṉata muki faainoto nia ne God ṉa Lord kulu tha Jesus Christ ma Maka nia.

⁷ Mania muki thathagoni kamulua kwailiu, ’uria lau boo tha Christ e thathagoni kulu isana ana faainoto lana tha God.

⁸ Sulaania ku sorea kera alua tha Christ ṉa wane ni ra la ana kwai kakali la ifana mamana la tha God, fasi kai faaṉadoa alaṉaia eki ana maka ba inao ki,

⁹ Ma fasi Jenetaele ki keki faainotoa tha God uria tatakomia nia; ’uria si do na kera keda, Mania kwai taṉo oe i maalutana Jenetaele ki, Ma kwai ṉu ana thatamu.

¹⁰ Me sorea lau, Kamulua Jenetaele ki, muki seethathala ofu bia toa nia ki.

¹¹ Ma ta si lau, Muki taṉoa tha Lord, kamulua Jenetaele ki sui bana; Ma kulee toa ki sui boo, muki taṉo nia.

¹² Ma ta si lau, tha Aisaia e sorea, Laila na tha Jesi kai to bana, Ma Wane eri na kai tae mai fasi kai inoto fafia Jenetaele ki; Jenetaele ki keki manatatoo ṉado uri nia.

¹³ Sui ku thathamia ṉa God na kera manatatoo ṉado uria kai faafuṉu kamulua ana seethathala la faamau ma enenoa si maṉa na muki fitoo, fasi muki manatatoo ṉado faamau uria si do ne lea, ana sukwaia tha Spirit Abu.

¹⁴ Ma ni nau lau boo ku thaitoomana boo suli kamulua, doora kera, ni kamulua mulu fuṉu ana lea la, mulu thaitoomana lea maalutana si do ki sui bana, mulu talaana lau boo faamanatai lamulua la kwailiu.

¹⁵ Una ena mena, doora kera, ku suka tatha ana seeraa la ana kekeda la kau isamulua, ’uria wane na ku faaroṉo kamulua lau muki onotoona si do eki, sulaania lea la eri na tha God e falea mai iaku.

¹⁶ Kwa wane ni ra tha Jesus Christ uria Jenetaele ki, kwa ra asi faaroṉoa lea tha God, fasi fale lana Jenetaele ki ’uria do ni foa la keki ala fafia, uria na tha Spirit Abu e faaabua.

¹⁷ Mania ku rikia si do ana faabaita laku la ania atha Jesus Christ asi do uria tha God ki.

¹⁸ Sulaania e ai kwasi seeraa ana ṉata la sulia tei si do eeta lau, talitoona bana si do eki na tha Christ e ilia ani nau, fasi Jenetaele ki keki ade sulia, si do ana bae laku ma abula laku neri,

¹⁹ Ana sukwaia bala si do ki ma do ni kwele la ania, na sukwaia Spirit tha God; adedea ita mai ana Jerusalema ma fanua ni kakalia, ka fula mena ana Ilirikama, ku ṉata teefau sulia si faaroṉoa lea tha Christ;

²⁰ Iu, ku alua manataku ana tee si lio fasi kwa ṉata sulia si faaroṉoa lea, asi kula na kera thaitoomana naa thatana tha Christ e ai, fasi e ai kwasi thauwaibiu fafia gwa fau totonao ki na ta wane eeta lau e alua maakwali nau;

²¹ Ma ’uria si do na kera keda, Toa eki ne ai kesi fafaaroṉoda ani nia, keki rikia, Ma toa eki ne ai kesi roroṉoa, keki thaitoomana maalutana.

²² Ma sulia si kula eri lau boo kera susuusi nau asi maṉa oro ba ki kwasi lae kau isamulua:

²³ Ma si maṉa eri, uria ne ai lau ta si kula si ni u maakwali nau ana fanua eki, ma uria sulia fa ṉali oro ki naa ku thathamia ṉado sa kwa fula isamulua,

²⁴ Atona bana ta si maṉa na nau kwai lae uri Sipena, kwai lae kau isamulua: uria nau ku thathamia kwai riki kamulua si maṉa nau kwai lae, nau kwai to totonao ka suka ni tau isamulua, sui muki bii adomi nau ana lae laku kau uria fanua eri:

²⁵ Ma si maṉa eri kwai lae uri Jerusalema, uria ra la ifana toa abu eki.

²⁶ Sulaania toa nai Masedonia ma i Akaia thathami lada na keka ofumalefo ana tee si maṉa uria tei toa na kesi rikii do ana toa abu nai Jerusalema.

²⁷ Iu, kera thathamia boo; ma lea na keki faledo maana si do na kera ṉalia. Sulaania mada sa Jenetaele ki kera ṉalia tei si asi do tha Spirit ki i abana toa eri, e kokoto na keki ra ifana toa eri asi do fanua nei iano ki.

²⁸ Mania lalae ku ilia si do eri ka sui naa, ma ku faaṉadoa si foee do eri ifada, kwai lae, kwa tatha i fanua kamulua fasi kwai fula i Sipena.

²⁹ Ma nau ku thaitoomana, si maṉa kwai fula isamulua, kwai fula ana lea la baita ka tatha na ni asi faaroṉoa lea tha Christ.

³⁰ Ma nau ku ṉata kwaitakoi, kwa soree isamulua, doora kera, uria na Lord kulu tha Jesus Christ, ma uria liothau la eri na ni atha Spirit, muki aṉasi ofu bi nau ana foa la kamulua ki atha God uri nau;

³¹ Fasi nia kai lau nau faisia toa eki nai Judia na kera fitala, ma fasi toa abu keki ala fafia ra nau ba na nau kwai ra ania uria Jerusalema;

³² Fasi kwai fula isamulua ana seethathala la sulia si do na tha God e thathamia, ma kwai fulatoona mamalo la bi kamulua.

³³ Ma ṉa God ana enenoa kai to bi kamulua sui boo Emeni.