Roma 13 - Ṉa Alaofua Falu 1923 1949

¹ Kamulua sui muki roo sulia toa gwauwai ki: sulaania e ai ta do gwauwai si to lau, talitoona bana si do eki ne ita mai atha God; ma toa eki na kera gwauwai asi maṉa eri tha God e faainotoda.

² Mania wane na kai suusia wane gwauwai eri, kai firu bia si do na tha God e gwalua: ma toa na keki firu una eri toto keki roṉoa toa na keki sorea kwae lada.

³ Sulaania toa inoto ki do ana faamau lana ra lea ki e ai, ra taa. Sui oki thathamia mau la uria wane gwauwai eri kei ei faisi oe? oki ilia si do ne lea, ma nia kai taṉo oe:

⁴ Sulaania wane eri na wane ni ra tha God ifamu uria si do ne lea. Ma mada soki ilia si do ne taa, oki mau; uria ne ai si tonee rau ana nini ni firu: sulaania wane eri na ṉa wane ni ra tha God, wane na kai duua ana rakeiria abula taa lana wane na kai abula taa.

⁵ Mania muki roo suli nia e ai si ei boo, talitoona uria rakeiria eri e ai, uria liomu ne lea lau boo.

⁶ Uria na sulia si kula eri muki falea lau boo takisi ki iada; sulaania ni kera toa ni ra tha God ki, na keka seemabe ṉado asi do eri boo.

⁷ Mania oko falea si do ne kokoto oki faledaki ifana toa eki sui boo: takisi ki ifana wane ne kokoto oki falea takisi ki ifana; tei do ana do oe ki ifana wane ne kokoto oki falea tei do ana do oe ki ifana; mau la ifana wane ne kokoto oki mau ania; fare baita la ifana wane ne kokoto oki fare baita ani nia.

⁸ Osi ṉaṉali laṉa asi do ta wane, talitoona bana liothau la uri kamulua kwailiu: uria wane na kai liothau ana wane nia e ilia naa si do eki sui bana na ṉa lo e sorea.

⁹ Sulaania si ṉata eri, Osi oee, Osi thathauwane, Osi bibili, Osi lolole fafia imole, Osi thathathamia si do kera ki, ma mada sa ta si ṉata fifi to u bana, kera ofua ana tee si do asi baea eri neri, Oki liothau ana wane oe ’uria oko liothau ani oe i talaamu.

¹⁰ Ṉa liothau la e ai si ilia ta si do ne taa uria wane nia: mania liothau la e ilia naa si do eki sui bana na ṉa lo e sorea.

¹¹ Ma muki ilia si do eri, uria na mulu thaitoomana maalutana si maṉa eri, na si maṉa kamulua neri ana tharai la faisia biṉa liu la: uria asi maṉa eri marukia kulu e kwaikaraṉi ka tatha asi maṉa ba na kulu bii fitoo.

¹² Baita lana fa rodo e sui naa, si maṉa eri karaṉi dani naa: mania kuki naṉa ania si ra ana maerodo ki, ma kuki alua rauma ana lalaa la fafia seekulua.

¹³ Kuki abula kokoto, ’uria i la thato; ana malasaole la ma si bula la na kafo bubula kai buloa imole e ai, ana moosuiluma ma daidei la e ai, ana firu la ma uga la ka ai lau boo.

¹⁴ Muki tooni fafia seemulua atha Lord Jesus Christ, ma musi beta ta si do maakwalia see imole, ifana si thathami la taa nia ki.