Roma 12 - Ṉa Alaofua Falu 1923 1949

¹ Mania ku ṉata kwaitakoi, ku soree isamulua, doora kera, uria si do ba ki na tha God e tatakomi kulu ania, muki falea seemulua na do ni foa la ne maruki, do abu, na tha God kai ala fafia, si ra na manatamulua kai sorea e kokoto neri.

² Ma musi abula ’uria abula lana unii wane nai maṉa eri: keki alu kamulua muki eeta uria manatamulua na kera adea e falu, fasi muki ilitoona si do na tha God e thathamia ne lea, ma do na kera ala fafia, ma ka sukwai teefau.

³ Sulaania ana lea la na kera falea ifaku, ku lufi kamulua sui, ta wane iamulua si manata baita ani nia i talaana ka tatha asi manata la ne kokoto ifana; manatana kai ’uria manatana wane ne seeeno, ’uria baita lana fitooa na tha God e ukalia ifamulua sui, ta wane si ei boo.

⁴ Sulaania talafana lau boo si do na ana seekulua ki e oro ma ka ofu ana tee see do, ma si kula eki sui bana kesi ra ana ta tee si ra:

⁵ Alafana lau boo ni kulu, na kulu oro, kulu ofu mai ana tee see do atha Christ, ma kulu tee si do na ana seekulua kwailiu.

⁶ Ma uria na si do na kera tona faledaki iakulua e eeta ’uria lea la eri na kera falea ifakulua, mada sa kera falea ṉata la mala porofeta, kuki ṉata mala porofeta ana ṉata la na kai talaana fitooa kulu;

⁷ Mado ra la asi ra ifada, kuki seemabe asi ra eri; mado wane na kai tooa si do ki isada, ana too lana si do eki;

⁸ Mado wane na kai kwaifamanatai, ana kwaifamanatai la nia: wane na kai tona falea si do ki, liona na kai ilia; wane na kai tatha inao, kai seemabe ania; wane na kai tatakomia ta imole, kai ilia ana seethathala la.

⁹ Olodola la kei ei faisia liothau la kamulua. Muki mamagu ania si do ne taa; muki rau ṉado asi do ne lea.

¹⁰ Ana liothau la uria baree wai doorana eki muki thathami kamulua faamau kwailiu; ana fare baita la muki fare baita faamau kwailiu ani kamulua;

¹¹ Ana seemabe la musi seedadaola; spirit kamulua kai ’uria kafo ne lugaluga; muki ra ifatha Lord;

¹² Muki seethathala ana manatatoo ṉado la uria si do lea ki; muki susuu ana taa la na muka to ania; muki seemabe ṉado ana foa la;

¹³ Muki falea si do na kai adomia toa abu eki ana rofe la kera; muki beta ṉado sulia toa kwaita ki.

¹⁴ Muki falea lea la ifana toa na kera tona ilamatai kamulua; muki falea lea la, musi alua taa la kai to fafida.

¹⁵ Muki seethathala ofu bia toa na kera seethathala; ma muki aṉi ofu bia toa na kera aṉi.

¹⁶ Muki to kwailiu ana tee si lio. Manatamulua si toto ana si do ana inotoa ki, kai oli uria si do ana thafee to faekwa la ki. Musi ala fafia liotooa kamulua i talaamulua.

¹⁷ Musi duua abula taa lana ta wane ana abula taa la. Muki aṉasi fasi muki ilia si do ne kokoto inaofana wane ki sui bana.

¹⁸ Mada sa ta si do imole kai talaana, sulia si do na ni ani kamulua, muki to ana enenoa bia wane ki sui bana.

¹⁹ Toa liliothaua nau ki, musi duduu i talaamulua, muki alamatania rakeiria tha God kai ra: uria na kera keda, Ra nau na duu lana si do ki; nau kwai falea kwae la, tha Lord e sorea.

²⁰ Mania mada sa maalimae oe kai thaofa, oki fale ifana kai faṉa; mada sa liona kai lalaṉa, oki fale ifana kai kuu: uria na si maṉa noki ade una eri oki ofua si era ana makeo i la gwauna.

²¹ Musi alamatania taa la si nia kai tatha iamulua, si kamulua kai tatha ana taa la uria si do ne lea.