Roma 11 - Ṉa Alaofua Falu 1923 1949

¹ Sui ku sorea, Tha God e usutania toa nia ki faisi nia? Si do ka ai neri. Uria ni nau wane Isirela lau boo, ana kwalafa tha Aberahamo, ana kulee toa tha Benijamini.

² Tha God e ai si usutania toa nia ki ne thaitoomada totonao. Musi thaitoomana si do ba na kekeda la abu eri e sorea sulia tha Elaeja? ne lae isatha God, ka alaṉia Isirela, ka una eri,

³ Lord, kera thauṉia porofeta oe ki, kera ogea fulii era ni foa la oe ki: ma tee nau bana ku to, ma kera rofe uria thauṉi laku la.

⁴ Ma si ta na tha God e soree isana ana luu lana mai? Fiu tooni wane to u isaku, toa na kesi boururu isatha Beala.

⁵ Sui alafana asi maṉa eri lau boo ṉadee toa ni u isana sulia fili la eri ana lea la.

⁶ Ma mada sa si do ana lea la neri, do ana si ra ki e ai lau: uria mada se filida maana si ra ki, lea la eri na ṉa lea la mamana e ai bana: ma mada sa si do asi ra ki neri, do ana lea la e ai lau: uria mada se filida ana lea la, ra eki ṉa ra mamana ki e ai bana.

⁷ Si ta ni lau? Si do Isirela e rofe uria, e ai si fulatoona; toa eki ne filida kera fulatoona boo, ma kera faarorodoa maana oroṉana toa:

⁸ ’Uria si do na kera keda, Tha God e falea si lio ana moosu la ifada, maada na kesi lio ania, ma aliṉada na kesi roṉo ania, ka fula afa boṉi eri.

⁹ Ma tha Defeta ka sorea, Tatafe ni faṉa la kera kai ’uria aikwai ifada, ma ausigi, Ma do na keki taofai kera ania, ma kwae la:

¹⁰ Keki faarorodoa maana toa eki, fasi e ai kesi rikia fanua, Ma oki adea sulida kai lolosi ṉado.

¹¹ Sui nau ku sorea, Kera taofai kera na ba fasi keka asi kera? Si do ka ai neri: ma uria asi la eri na kera asi kera ania marukia e fula mai ifana Jenetaele ki, fasi keki faaelu kera ana lalakwatai lana toa eeta keki ṉalia si do ki faisi kera.

¹² Ma sui mada sa asi la eri na kera asi kera ania na ṉa do ifana inotoa toa na fanua nei iano, ma si do na kera ṉalia faisida na ṉa do ifana inotoa Jenetaele ki; inotoa kera na toto keki fuṉu ania e kwaiadomi si tatha?

¹³ Uria nau ku ṉata isani kamulua Jenetaele ki. Sulaania nau aposela Jenetaele ki, nau ku fare baita ana ra nau:

¹⁴ Sa mado e ai kwa faaelua ina laku kera ana lalakwatai lana toa eeta keki ṉalia si do ki faisi kera, ma kwa faamarukia ta toa iada.

¹⁵ Sulaania mada sa lalakwatai la eri na kera lalakwatai kera ania na ṉa do ifana alu lana toa na fanua nei iano keka kwaimani lau bia tha God, ṉa ta ni ana thathagoni lada la keki lae lau mai? Ta na sa do eri na ṉa to ni marukia la faisia toa mae ki, mado?

¹⁶ Uria mada sa foee do totonao e abu, kumu eri sui boo e abu lau boo: ma mada sa lalii do e abu, tharee ’ai ki e abu lau boo.

¹⁷ Ma mada sa kera oea tei tharee ’ai ana ’ai eri, ma ni oe, no olife kwasi, kera raofai oe oki ni ana ’ai eri i maalutada, mo ṉalia ofu bi kera ta si ana lalii olife ma sula;

¹⁸ Osi faabaita oe fafia tharee ’ai eki: ma mada sa oko faabaita oe neri, oe no faaṉadoa lalii do eri e ai, lalii do eri ne faaṉado oe.

¹⁹ Sui oki sorea, Kera oea tei tharee ’ai ka ai naa, fasi keki raofai nau kwai ni ana ’ai eri.

²⁰ Do mamana neri; sulia fitala lada na kera oeda, mo takwe sulia fitooa oe. Osi fare baita ani oe i talaamu, oki mau:

²¹ Sulaania mada sa tha God e ai si suusia taa la faisia tharee ’ai eki na do ana ’ai eri i talaana, sa ka suusia taa la faisi oe ka ai lau boo.

²² Mania oki rikia fasi lea la tha God ma susuala la nia: uria tharee ’ai eki na kera asi kera, susuala la; ma uri oe, lea la, mada sa oki to ṉado ana lea la nia: mada sa osi to ṉado una eri keki kwaemusi oe lau boo.

²³ Ma ni kera lau boo, mada sa kesi to ṉado ana fitala la kera, keki raofai kera keki ni ana ’ai eri: uria na tha God e sukwai fasi kai raofai kera lau ania.

²⁴ Sulaania mada sa kera kwaemusi oe faisia ’ai na marukia nia na ṉa marukia olife kwasi, ma kera raofai oe oki ni ana olife lea ana marukia ne eeta lau: e ai si kwaiakaori ka tatha keki raofai nia do eki, na marukia kera e ai si eeta faisia, keki to ana olife kera italaada?

²⁵ Sulaania ku lalakwa, doora kera, na muki dora ania maalutana si do eri ne toto thaufuni, ada manatamulua ka sorea na liomulua ka too i talaamulua, si do eri neri, kera faarorodoa maana tee bali toa ana Isirela, maakwalia si maṉa na inotoa Jenetaele ki kai fuṉu;

²⁶ Ma sui keki faamarukia Isirela ka sui boo: ’uria si do na kera keda, Wane ni Kwaifamaruki kai ita mai i Saeono; Nia kai bulasia si lio ni fare faekwa la atha God ka ai naa faisia Jekofo:

²⁷ Ma alaofua na nau kwai kania bida neri, Si maṉa kwai ṉalia abula taa la kera ki ka ai faisida.

²⁸ Sulia si faaroṉoa lea, kera maalimae ki uri kamulua: sulia fili la eri molo, kera liothau anida uria maka ba inao ki.

²⁹ Uria tha God ka ai si akeletania manatana faisia si do ne tona faledaki ma aili la ne ailia mana imole.

³⁰ Uria talafani kamulua dini mai inao musi fitoona tha God, ma sui si maṉa eri mulu fulatoona tatakomia uria fitala lada,

³¹ Alafani kera lau boo keki fitala si maṉa eri, fasi ana tatakomia eri na kera tatakomi kamulua ania, toa eki keki fulatoona lau boo tatakomia.

³² Sulaania tha God e fono faisi kera sui ana fitala la fasi kai tatakomi kulu sui boo.

³³ Sifo ladoa lana inotoa ma liotooa ma thaitoomana la tha God bonaa e baita ka tatha! kesi talaana rofe la maalutana si do nia sorea na kai uria imole, ma lae lana sulia tala nia ki sule lana e afetai!

³⁴ Sulaania ni tei ne thaitoomana si do ni manatana tha Lord? mado ni tei ne faaroṉo nia asi do ne lea kai ilia?

³⁵ Mado ni tei ne fale totonao ifana, fasi keki duua ifana?

³⁶ Uria si do ki sui bana ita mai ani nia, ma ka uri nia, ma ani nia. Keki fare inoto ani nia toto si sui. Emeni.