Nehemiah 9 - Ṉa Alaofua Falu 1923 1949

¹ Ma sui ana ruana taṉafula ma faina fa boṉi ana madami eri, kwalafaa tha Isirela keka ofu mai, keka abu ana faṉa, ma tooni kera ki asi maku rarasieila, ma gegeona theegano ni fafia seeda.

² Ma kwalafaa tha Isirela kera dua eeta ani kera faisia kulee toa eeta ki sui bana, keka takwe, keka faaroṉo lalaa ana abula taa la kera ki ma abula garo lana maka kera ki.

³ Ma keka takwe asi kula kera, keka teemai la buka ana ṉa lo tha Jihova na God kera sulia faina kadee thato eri; ma faina kadee thato lau keka faaroṉo lalaa ana abula lada, ma keka faare baita atha Jihova na God kera.

⁴ Sui tei Lifaete ki keka takwe ada ifafona kasi kula dedema eri ne ni iaa; tha Jesua neri, ma tha Baani, tha Kamiele, tha Sebanaea, tha Bani, tha Senani; keka ’ai thatana tha Jihova na God kera ana ’ai la baita.

⁵ Sui Lifaete eki, tha Jesua, ma tha Kamiele, tha Baani, tha Asanaea, tha Serebaea, tha Odaeja, tha Sebanaea, ma tha Betaea, keka una eri, Muka takwe iaa, taṉoa fasi tha Jihova na God kamulua toto si sui: taṉo la e farana thatamu ne inoto faamau me ni iaa ka tatha asi do eki sui bana na kera faare baita ania ma keka taṉoa.

⁶ Tha Jihova na ni oe, talifili oe italaamu; o thauwai nia thalo lo ma fanua eki fafia thalo lo ki, bia omea baita kera ki sui bona, fanua na i iano ma si do ki sui boo na ni fafona, amali eki ma si do ki sui boo na ni laala, ma ni oe neri noko lio sulaania si do eki sui bana; ma omea baita i thalo lo keka faare baita iamu.

⁷ Ni oe tha Jihova, ṉa God no filia tha Aberamo, mo talai nia mai na ba faisia i A, na fanua toa i Kaladia, mo alaṉia thatana atha Aberahamo;

⁸ Mo rikia naa ruruuna ne mamana inaofamu, mo kania alaofua bi nia soki falea fanua Kenanaete ki, Hitaete ki, Amoraete ki, ma Berisaete ki, ma Jebusaete ki, ma Gagasaete ki, soki falea boo fanua eri ifana kwalafaa nia; mo ade naa sulia bae lamu neri; sulaania abula lamu e kokoto.

⁹ Mo rikia taa la eri ne thauṉia maka totonao kamilia ki i Ijifi na ba, o roṉoa ’ai lada i ninimana Amali Memenaa ba;

¹⁰ Mo fatai nia bala si do ki ma do ni kwele la ania ki fafia tha Fero ma fafia toa ni ra nia ki sui bana, ma fafia toa eki sui bana na kera ni fanua nia; uria no thaitoomana na kera fafakao kera italaada uria toa oe eki. Asi ade la eki o adea thatamu ka talo, ’uria lau boo itaraena.

¹¹ Sui o adea amali eri ka to ro bali inaofada, adedea keka lae nada i fanua raraṉea i initoona amali; ma toa eki na kera tari buriada, o naṉa anida uri la matakwa eki, talafana gwa fau na kera u ania uri la kafo sukwai ki.

¹² Ma sui lau boo o talaida afa thato asi datha ne fane ’uria beta tekwa; mafa rodo asi era ne fane una eri lau boo, fasi kai laafi kera ana tala ne farada keki lae sulia.

¹³ Mo sifo lau bomai i gwauna gwa tolo eri i Saenae, mo ṉata bida faisia thalo lo, mo falea si ṉataa fifi kokoto ki iada, ma lo mamana ki, ma si ade la no gwaludaki ne lea, ma si ṉataa lea ki:

¹⁴ Mo faaroṉoda ana fa boṉi mamaloa abu oe, mo ṉata fifi isada ana kwaifamanataia, ma si ade la no gwaludaki, ma ṉa lo, ana abana wane ni ra oe eri na tha Mosisi:

¹⁵ Mo falea mai si berede i thalo lo ada keka thaofa, mo faataea si kafo iada faisia gwa fau eri ada lioda ka lalaṉa, mo soree isada sa keki lae mai, keki nalia fanua eri no othi naa sulia, o sorea soki falea mai iada.

¹⁶ Ma ni kera bia maka totonao kamilia ki kera fafakao kera italaada, keka adea luada ka gaga ’ai kesi gwau toli, kesi alamatai nia aliṉada ifana rono lana si ṉataa fifi oe eki,

¹⁷ Kera lalakwee ade sulia bae lamu, ma kesi onotoona si do baita ba ki no ilia imaalutada, ma keka adea luada ka gaga ’ai kesi gwau toli, ma asi lio kera ni ade la faisia bae lamu, kera alua wane sa kai tatha inaoda, sa keki oli lau uria si ra na kilu suuwanida kera tona ulafu ania na ba: una ena mena, ni oe God no thathai uria manata lube la, si lio oe ni kwaiofei la ma tatakomia, osi rakeiri fofoa, ma ade lea lamu e baita; mania e a’i osi luka faekwa ani kera.

¹⁸ Iu, si maṉa ba na kera thauwai nia kalee buloka ana golu na kera faamausia i la era na ba, ma kera una eri, God oe nai nia, ne talai oe o tae mai faisia Ijifi, ma kera faaome oe faamau neri;

¹⁹ Una ena mena, ana ade lea lamu ne oro ka tatha, ni oe osi luka faekwa ani kera i la fanua kwasi eri: si datha ba, ne fane ’uria beta tekwa, ne talaida sulia tala, e a’i si akwasida afa thato; ma si era ne fane ’uria beta tekwa e ’ai si akwasida afa rodo, e laafida, ka fatai nia tala ne farada keki lae sulia.

²⁰ O falea lau boo Spirit le oe kai kwaifamanatai isada, mosi lufia mana oe ba faisia fokoda, mo falea mai si kafo ada lioda ka lalaṉa.

²¹ Iu, sulia fai tafulu fa ṉali eki o thareda i la fanua kwasi, ma kesi to ana rofe la uria atona bana ta si do; tooni kera ki si lafu, ma aaeda si ubu.

²² Ma sui lau boo o falea fanua kiṉa ki ma kulee toa ki ifada, o ukalia si kula eki ifada: mania ifada fanua tha Saeona, ma fanua kiṉa ba i Esebona, ma fanua tha Oga na kiṉa i Besana.

²³ Ma kwalafaa kera ki o adea keka oro faamau ka lae alaa, ka ’uria bubuluna thalo lo, mo talaida mai uria fanua eri no alaṉai nia ifana maka totoṉao kera ki, sorea sa keki lae uria, keki ṉalia ifada italaada.

²⁴ Mania kwalafaa kera eki kera lae uri la fanua eri, kera ṉalia ifada italaada, mo adea sii kera e tatha ana toa ne i fanua eri, Kananaete ki neri, o ekwatai nia toa eki i abada, bia kiṉa kera ki, ma kulee toa eki ne i fanua eri, fasi keki ilia iada si ade la na manatade thathamia.

²⁵ Ma kera ṉalia toaa susu sukwai ki, ma fanua ana abusua, ma ifada maafera ki ne fuṉu ana ogogonia ni sui bana, malaui kafo na kera ’ilidaki naa, oolee faene ki, ma oolee olife ki, ma ’ai oro faamau ne fuṉu ana foee do ki: mania kera reree ada, kera abusu, keka kobu, kera seethathala faamau ana ade lea lamu ne baita ka tatha.

²⁶ Una ena mena, keka ade faisia bae lamu, keka firu bi oe, ma lo oe keka nana ania iburiada, ma keka thauṉia porofeta oe ki na kilu faamamanea si do taa na kilu thaitoomana suli kera, sa mado e a’i kiku akeletanida uri oe, ma keka faailu oe asi ade la oro ne faarakeiri.

²⁷ Sulia si kula eri o fale kera i abana maalimae kera ki, na kilu faare taa iada: ma asi maṉa ana unii taa la kera ki, si maṉa na kera ’ai kau isamu, o roṉoa ṉata lada i thalo lo; ma sulia si lio oe ana tatakomi la oro ki, o falea wane ni faamaruki la ki iada, na kilu faamaruki kera faisia abana maalimae kera ki.

²⁸ Ma sui buriana na kera to bada ana enenoa, keka ilia lau si ade la ne taa inaofamu: sulia si kula eri o akwasida i abana maalimae kera ki, adedea sii kilua e tatha ani kera: una ena mena, asi maṉa na keka akeletania manatada ma keka ’ai kau isamu, o roṉoa ṉata lada i thalo lo; ma asi maṉa oro ki bana o faamarukida sulia si lio oe ana tatakomi la ki;

²⁹ Mo faamamanea si do taa no thaitoomana suli kera, sa mado e a’i oki oli fafi kera isana lo oe eri: una ena mena, kera fafakao kera italaada, ma kesi roṉoa si ṉataa fifi oe ki, keka ade faisia si ṉataa oolo oe ki (na do eki wane na kai ilia kai maruki inunufana), ma kera idua kau gwau‐aba kera ki, keka adea luada ka gaga ’ai kesi gwau toli, ma keka lalakwee roṉoi.

³⁰ Sui o manata lube kera sulia fa ṉali oro ki bana, mo faamamanea ana Spirit oe ana porofeta oe ki si do taa no thaitoomana suli kera: ma sui kera lalakwee roṉoa ana aliṉada: sulia si kula eri o fale kera i abana kulee toa ki ana fanua eki.

³¹ Una ena mena, inunufana si lio oe ana tatakomi la baita ki, e a’i osi faafunuida sa keka funu teefau, me a’i osi luka faekwa ani kera; sulaania God ana kwaiofei la ma tatakomi la na ni oe.

³² Mania si maṉa eri, God kamilia ae, no baita, mo sukwai, mo kwaifamaui, God ae noko ade sulia alaofua no kania na ba, na amua si lio ni tatakomi la, osi sorea sa do faekwa neri na feda la ne fulatoomilia, ma kiṉa kamilia ki, ma wane inoto kamilia ki, ma wane ni foa kamilia ki, ma porofeta kamilia ki, ma maka kamilia ki, ma toa oe ki sui bana, ka thafali mai asi maṉa ana kiṉa eki i Asiria, lalae ka fula na itaraena.

³³ Ma sui si lio oe e oolo asi ade la eki sui bana na kera ilia iamilia neri, uria na ni oe o abula kokoto; ni kamilia molo mili abula taa boo:

³⁴ Ma kiṉa kamilia ki lau boo, ma wane inoto kamilia ki, ma wane ni foa kamilia ki, ma maka kamilia ki, e a’i kesi ade sulia lo oe ba, ma kesi roṉoa si ṉataa fifi oe ki, ma si faamamane la oe ki, no faamamanea asi do taa no thaitoomana suli kera.

³⁵ Uria ne a’i kesi ra ifamu i tooa kera, ma i ade lea lamu ne baita no falea iada, ma i la fanua baita ana unii abusua ki no falea mai inaofada, me a’i kesi akele faisia si ra taa kera ki.

³⁶ Rikia fasi, ni kamilia na wane ni ra ki itaraena, ma sulia fanua nei no falea na ba ifana maka kamilia ki fasi keki ania foana ma lea lana, rikia fasi, ni kamilia na toa ni ra ki iei.

³⁷ Ma fanua eri kai fuṉu ana foee do oro ki ifana kiṉa eki no aluda keki gwauwai iamilia inunufana abula taa la kamilia ki: ma sui lau boo keka nanao ana seemilia, ma katele kamilia ki, sulia si ade la ne lea i maada, ma taa la baita ka thauṉi kamilia neri.

³⁸ Ma inunufana si ade la eki sui bana, kamilia mika kania alaofua na kai ṉado bana, ma mika kedaa; ma wane inoto kamilia ki, ma Lifaete kamilia ki, ma wane ni foa la kamilia ki, keka faaṉadoa ana do kera ki ni faaṉado lana.