Nehemiah 8 - Ṉa Alaofua Falu 1923 1949

¹ Ma toa eki sui bana ada tee si lio ma tee si manata la, keka figu isana tala eri ne ni otofana maethakaa kafo; ma keka soree isana wane ni kekeda eri na tha Esera sa kai ṉalia mai buka ana lo tha Mosisi, lo eri na tha Jihova e ṉata fifi sulia na ba isana Isirela.

² Ma wane ni foa eri na tha Esera e ṉalia mai ṉa lo inaofana ofu lana wane ki ma kini ki lau boo, ma toa eki sui bana na kera talaana thaitoomana lana maalutana si ṉataa na keki roṉoa; afa boṉi totonao ana fiuna madami eri.

³ Ma nia ka teemai nia si ṉataa ne ilaala sulia tala eri ne ni otofana maethakaa kafo, ka thafalia i la si uusuwadia u boo, ka fula i initoona thato, inaofana wane eki, ma kini eki, ma toa eki na kera talaana thaitoomana lana maalutana; ma toa eki sui bana keka fafuroṉoa si baea ne i la buka ana ṉa lo.

⁴ Ma wane ni kekeda eri na tha Esera e takwe ifafona kasi kula dedema ne ni iaa, na kera thauwai nia ifana asi rebee ’ai ki; ma wane na kera takwe isana i aba aola nia nai nida, tha Matitaea, ma tha Sema, ma tha Anaea, ma tha Uraeja, ma tha Ilikaea, ma tha Masaea; ma i aba mauli nia, tha Bedaea, ma tha Maesele, ma tha Malakaea, ma tha Asama, ma tha Asabadana, tha Sakaraea, tha Mesalama.

⁵ Ma tha Esera ka ifinia buka eri inaofana maana toa eki sui boo (uria ne to iaa inaofana toa eki sui bana); me ifinia naa, toa eki sui bana keka bii tatae iaa:

⁶ Ma tha Esera ka taṉoa tha Jihova na God baita. Ma toa eki sui bana keka luua ṉata lana, keka una eri, Emeni, Emeni, bia tafo lana abada: ma keka gwau toli, keka faare baita atha Jihova, maada ka lio uri theegano.

⁷ Tha Jesua lau boo, ma tha Bani, ma tha Serebaea, tha Jamini, tha Akaba, tha Sabetae, tha Odaeja, tha Maasaea, tha Kelita, tha Asaraea, tha Josabada, tha Anana, tha Belaea, bia Lifaete ki, keka inifitaa ṉa lo fasi toa eki keki thaitoomana maalutana: ma toa eki keka to bada asi kula kera.

⁸ Mania keka teemai la buka, keka faaroṉo fatai asi ṉataa ana lo tha God, keka inifitaa, adedea toa eki keka thaitoomana filoa si do na kera teemai nia.

⁹ Ma tha Niimaea, ṉa wane gwauwai gafumanu, ma wane ni foa eri na tha Esera na wane ni kekeda, ma Lifaete ki na kera kwaifamanatai isana toa eki, keka soree isana toa eki sui bana, Fa boṉi nei fa boṉi abu ifatha Jihova na God kamulua; musi tatao, ma musi aṉiṉi. Uria na toa eki sui bana kera aṉi si maṉa na kera roṉoa si ṉataa ana ṉa lo.

¹⁰ Sui nia ka soree isada, Lae namulua, ania fasi si do gwagwarurutaa ki, kuu fasi ana si kafo gwagwaria, muki falea kau moriṉa kera ki ifana toa eki na kesi betaa ta si do iada: uria na fa boṉi nei e abu ifana Arai kulu: ada muka liliodila; uria na sukwaia kamulua ni ana seethathala la atha Jihova.

¹¹ Mania Lifaete ki keka faaenoa toa eki sui bana, keka una eri, Bona amulua, uria na fa boṉi nei e abu; i la ruruumulua si tataa.

¹² Ma toa eki sui bana keka lae fasi keki reree ada, keki kuu, keki falea kau moriṉa ki ifana tei toa lau, keki seethathala faamau, uria na kera thaitoomana maalutana si ṉataa eki na kera faaroṉoda mania.

¹³ Ma ana ruana fa boṉi, wane na kera inoto ki ana kwalafaa maka kera ki ana toa eki sui bana, bia wane ni foa ki, ma Lifaete ki, keka ofu mai sana wane ni kekeda eri na tha Esera, fasi keki thaitoomana filoa neri maalutana si ṉataa ana ṉa lo.

¹⁴ Ma keka fulatoona na kera kedaa i la lo eri na tha Jihova e ṉata fifi sulia na ba me falea mai ana abana tha Mosisi, be una eri, Kwalafaa tha Isirela ki keki to ada i la ooba ki sulia fafaṉaa eri ana fiuna madami.

¹⁵ Ma keki faarono faladoa fasi ania, keki ’ai taloṉania i la toaa susu kera ki sui boo ma i Jerusalema, keki una eri, Muki lae uri la tolo, muki ṉalia mai tharee olife ki, ma tharee olife kwasi ki, ma tharee matele, ma tharee niu ki, ma tharee ’ai ululua ki, fasi muki thauwai nia ooba ki, sulia si do na kera kedaa na ba.

¹⁶ Mania toa eki keka lae nada, keka ṉalia mai, keka thauwai nia ooba kera ki, wane boo ifafona maafera nia, ta wane boo ifafona maafera nia, ma i la labata kera ki, ma i la labata ki ana biu tha God, ma sulia tala rerebaa isana maethakaa kafo, ma sulia tala rerebaa isana maethakaa i Ifiremu.

¹⁷ Ma ofu lana toa eki sui bana na kera oli mai faisia fanua eki omea ne lauda kera aluda iei, keka thauwai nia ooba ki, keka ono ada ifara ooba eki: uria na ita mai afa boṉi eki tha Jesua na kaluwane tha Nana, lalae ka fula afa boṉi eri, kwalafaa tha Isirela ki kesi adede una eri. Ma ele la baita faamau ka ni isada.

¹⁸ Ma sui lau boo sulia boṉi, ita afa boṉi totonao, ka fula afa boṉi iisi eri, nia ka teemai la buka ana ṉa lo tha God. Ma keka faaabua fafaṉaa eri sulia fiu fa boṉi; ma ana kwaula fa boṉi tee ofu la abu, sulia si do na kera gwalua na ba.