Nehemiah 6 - Ṉa Alaofua Falu 1923 1949

¹ Ma lalae mai si maṉa na tha Sabalata, ma tha Tobaea, ma tha Gasemu, wane eri i Arebia, ma oroṉana maalimae kamilia ki, kera roṉoa naa thauwaia na nau ku thauwai nia ana sulufau eri, ne a’i ta si kula na kera ogea si laa naa (boro so ka fula mena asi maṉa ba nau kwasi takwelaṉania u baba ana maethakaa eki);

² Tha Sabalata ma tha Gasemu keko kwaiarasi mai isaku, keko una eri, Lae si mai, kuki ofu fasi laala ta toaa faekwa ana toaa faekwa nei ki i fanua dedema i Ono. Ma sui manatadaroa sa kekoi faare taa iaku.

³ Ma nau ku arasia wane ni ṉali‐ṉataa ki isada, ku una eri, Nau ku oga asi ra baita si maṉa eri, kwasi tonee to uria sifo la kau: ra nei kai sui uria ta, si maṉa ni nau kwa ekwa ania, kwa sifo kau isamulua?

⁴ Una ena mena, fai si maṉa keka kwaiarasi una eri isaku; ma ni nau ku luuda unei.

⁵ Sui limana fa arasi la, tha Sabalata ka arasi una eri ana wane ni ra nia isaku fafia ta leta na kesi kosua, na ka ni abana;

⁶ Ma kekeda la i laala nai nia, Faaroṉoa nei ka talo imaalutana toa ithara, ma tha Gasemu ka sorea, ni oe bia Ju ki mulu manatatoona firu la bia kiṉa nei; ma sulia si kula eri oki uia sulufau ba, fasi kiṉa kera na ni oe. Bae lada neri.

⁷ Mo alua lau bamua tei porofeta na keki ṉata suli oe i Jerusalema, keki una eri, Tee kiṉa kai to bana i Juda: ma toto keki faaroṉoa kiṉa nei asi baea eki. Mania, lae si mai asi maṉa eri, kuki tamani ofu fasi.

⁸ Sui ni nau ku kwaiarasi isana, ku una eri, E a’i kesi ilia ta tona si do asi do no soredaki na ba; e ita mai i ruruumu italaamu, mo ṉata ni lole la neri.

⁹ Sulaania ni kera sui sa keka faamau kamilia, keka una eri, Kuki faafedaa abada faisia si ra eri, ada keka ilia ka mamana. Mania, God ae, oki faasukwaia ro aba nau ki.

¹⁰ Buriana si ade la eri, ku fula isana maafera tha Semaea, kaluwane tha Dilaea, kaluwane tha Metabelo, na kera fono fafi nia; ma nia ka sorea, Kulu ofu fasi la biu tha God, i laala biu baita eri, kuki fonoa baba ana biu eri: uria na toa eki keki lae mai uria thauṉi lamu; iu, keki lae mai la rodo uria thauṉi lamu.

¹¹ Ma nau ku una eri, E farana wane ’uri nau sa ka thaka, mado? ma ni tei neri ne ’uri nau, una ena mena, kai kotho i la biu baita tha God sa kai faamaruki nia italaana? Nau sa kwa kotho iei, e a’i.

¹² Ma, lio fasi, nau ku riki filoa asi kula eri, tha God e a’i, ne arasi nia mai: nia e tala ṉata mala porofeta asi lio taa uri nau: tha Tobaea ana ma tha Sabalata kero usi nia uria.

¹³ Kero usi nia ada uria si kula nei, fasi mado e a’i kwa mau, kwa ade sulia bae lana, kwa abula taa, ma sui adaroa ta si do taa sa kekoi faaroṉo ania, kekoi faare faekwa iaku fafia.

¹⁴ God nau ae, manatatoona fasi tha Tobaea ma tha Sabalata sulia si ra keroa nei ki, ma ni Noadaea na porofeta kini lau boo, ma oroṉana porofeta eki na kera thathamia sa keki adea kwa mau.

¹⁵ Mania mili uia sulufau eri ka fono naa ana ruana taṉafula ma limana fa boṉi afa madami Ilu, ana lima tafulu ma ro fa boṉi neri.

¹⁶ Ma lalae mai, si maṉa na maalimae kamilia ki sui boo kera roṉoa ma toa ithara ki sui bana, kera rikia naa si ade la eki, maada ka asia faamau: uria na kera thaitoomana filoa God kamilia ana ne ilia si ra nei.

¹⁷ Ma sui lau boo afa boṉi eki wane inoto Juda ki keka kedaa kau leta oro ki satha Tobaea, ma leta tha Tobaea ki ka fula mai isada.

¹⁸ Uria na toa oro i Juda kera kania alaofua ana othi la bi nia, sulaania ni nia fuṉao tha Sekanaea, kaluwane tha Ara; ma kaluwane nia, na tha Joanana, e folia thari tha Mesalama kaluwane tha Berekaea.

¹⁹ Keka faaroṉo lau asi ra lea nia ki inaofaku, ma keka falea kau bae laku isana. Ma tha Tobaea ka falea mai leta ki fasi mado e a’i kai adea kwa mau.