Nehemiah 5 - Ṉa Alaofua Falu 1923 1949

¹ Ma toa eki bia kwaida keka ’ai ana ’ai la baita, keka alaṉia ina lada kera na ṉa Ju ki asi abula la ne taa.

² Uria na tei toa keka una eri, Ni kamilia bia kaluwane kamilia ki ma thari kamilia ki mili oro: mania, falea mamilia tei fa koni miki ania, fasi mika maruki.

³ Tei toa keka sorea lau bada, Kamilia mili usi ana bali gano kamilia ki, ma oolee faene ki, ma maafera kamilia ki, fasi mika usiah mai tei fa koni sulaania unii thaofaa nei.

⁴ Tei toa keka soree lau bada, Kamilia mili ṉali laṉa ana malefo maana bali gano kamilia ki ma oolee faene ki, fasi mika falea kau takisi ki ifana kiṉa nei.

⁵ Una ena mena, seemilia ka totoo bia seena ina lamilia kera, wela kamilia ki keka totoo bia wela kera ki: ma, lio fasi, mika usi ana kaluwane kamilia ki ma thari kamilia ki, keka tona ra ifada, ma tei thari ana thari kamilia eki mili usi sui naa ani kera si maṉa eri: ma misi talaana tae la faisida; uria na tei wane eeta lau kera ṉalia naa bali gano kamilia ki ma oolee faene kamilia ki.

⁶ Ma nau ku roṉoa ’ai lada ma ṉata lada neri, ku rakeiri faamau.

⁷ Sui nau ku ṉata uri nau i ruruuku italaaku, ku bii sorea wane inoto eki ma wane gwauwai eki, ku una eri isada, Mulu suuwai nia, wane boo doorana, ta wane boo doorana, keka falea tei malefo lau ka safua si do na kera ṉali laṉa ania. Ma nau ku gwalua ofu la baita, ku alaṉi kera ania.

⁸ Ma nau ku una eri isada, Sulia si do na mili talaana ili lana, mili tae faisia ina lakulua ba ki na ṉa Ju, eki na kera usi ana kera isana toa na ithara; ni kamulua molo mulu thathamii usi mena ana dooramulua kera, mado? muka usi ani kera isakulua, mado? Sui keka bona bada, e a’i kesi rofetoona ta si ṉataa ana luu lana bae laku.

⁹ Nau kwa una eri lau bakua, Si do e a’i si lea na mulu ilia neri: e a’i si faramulua sa muka abula ana faare baita la ana God kulu, mado? sulaania faare faekwa la na maalimae kulu ki, na ṉa toa ithara, kera faare faekwa ani kulu.

¹⁰ Ni nau lau boo, ma dooraku kera, ma wane ni ra nau ki, mili talaana suuwai lada keka falea mai malefo ma tei fa koni. Nau ku thathamia sa kuki ekwa ana ṉali lana si do na ka safua si do na kera ṉali laṉa ania.

¹¹ Nau ku thathamia afa boṉi eri boo sa muka oli fafia bali gano kera ki, ma oolee faene kera ki, ma oolee olifi kera ki, ma maafera kera ki, muki oli lau bamulua fafia taṉafula taleṉee do ana malefo eri, ma koni eri, ma waene eri, ma gwai eri na mulu suuwanida kera falea na ba.

¹² Sui keka una eri, Miki oli boo fafia, misi suuwanida sa keka falea mai ta si do; miki ade boo sulia bae lamu neri. Sui nau ku ailia mai wane ni foa ki, keka alaṉai isaku ana othi la sa keki ade boo sulia alaṉaia nei.

¹³ Nau ku tagaraṉai nia lau boo tooni nau, ku una eri, ’Uria si ade la eri tha God kai tagaraṉai nia kau, kei e’i naa faisia maafera nia, ma faisia ra nia ne ulafu ania, ni tei bana ne a’i si ade sulia alaṉaia nei; ’uria si ade la nei keki tagaraṉai nia kau ka a’i naa. Ma ofu lana toa eki sui bana keka sorea, Emeni, ma keka taṉoa thatana tha Jihova. Ma toa eki keka ade boo sulia alaṉaia eri.

¹⁴ Ma sui lau boo ita asi maṉa na gafumanu e alu nau ku gwauwai ani kera i la fanua i Juda, ka thafali mai ana ruana taṉafula fa ṉali kiṉa nei na tha Atasasisi, lalae ka fula ana ula taṉafula fa ṉali ma ruana, sulia tee tafulu ma ro fa ṉali neri, ni nau bia dooraku kera misi ania si faṉa na keka falea ana wane gafumanu ne gwauwai.

¹⁵ Wane gafumanu ki na kera gwauwai, na kera toto inaoku, kera suuwai nia toa eki keka usida boo, keka ṉalia ta si faṉa ma ta si waene faisida, fai tafulu sekele ana silifa ka safua; iu, wane ni ra kera ki mena keka thasi naunau uria toa eki: ni nau molo, uria faare baita la na nau ku faare baita atha God, e a’i kwasi ade una eri.

¹⁶ Iu, ma ni nau ku susuu ṉado asi ra eri ana sulufau nei, ma ni kamilia misi usia mai ta bali gano: ma toa ni ra nau ki sui bana kera ofu mai sana ra eri.

¹⁷ Ma sui lau boo tee taleṉee wane ma lima akwala ana Ju ki ma wane gwauwai ki keka reree ada isana tatafe nau ni faṉa la; wane eki na kera fula mai isamilia faisia imaalutana toa ithara na kera ni kakali kamilia, keka safuda.

¹⁸ Ma faṉa na keka betaa ne talaana tee fa boṉi, nai nia, tee buloka ma ono sifi na kera filia ne lea; keka betaa thaaro ni ania ki ifaku lau boo, ma tee si maṉa ana too tee tafulu fa boṉi keka ofua si waene oro eeta ki: ku falea mena si do eki sui bana, nau e a’i kwasi sorea sa keki falea mai si fana ne farana wane gafumanu na ka gwauwai, uria na si do na kera suuwanida ana ili lana e kulua fafia toa nei.

¹⁹ Oko onotooku, God nau ae, asi lio ne lea, sulia si do eki sui bana na nau ku ilia naa ifana toa nei.