Nehemiah 4 - Ṉa Alaofua Falu 1923 1949

¹ Ma lalae mai, si maṉa na tha Samabalata e roṉo kamilia, na mika uia sulufau eri, nia ka rakeiri, ka rakeaṉoṉo faamau, ka aefara ana Ju ki.

² Ma nia ka ṉata inaofana doorana kera ma omea i Sameria, ka una eri, Si ta neri na Ju nei na kesi sukwai ki keki ilia ada? keki lakali faisi kera, mado? keki falea do ni foa la ki? keki ili teefau ana ra eri ana tee fa boṉi boo, mado? keki adea gwa fau eki kai lea lau bana faisia ofu lana tonee kadee fau ki na era e akofia bonaa?

³ Ma tha Tobaea na Amonaete ne to isana, ka una eri, Kasi kula mena na kera thauwai nia, koito kwasi, sa kai raa mai, kai ogea bana sulufau kera.

⁴ God kamilia ae, oko roṉoi fasi; uria na kera faare faekwa iamilia: oko bulasia kau faare faekwa la eri isana gwauda italaada, oko fale kera ana do maalimae ki keki lagua i la fanua omea na kai lauda kai talaida uriei:

⁵ Ada oko thu agwa fafia abula lada ne garo; ada oko usua kau abula taa la kera ki na ni inaofamu neri: uria na kera faaome oe inaofana toa ni thauwai, nai nida.

⁶ Mania asi ade la nei mili uia sulufau; ma kera ladoa sulufau eri tee bali do ka fono: uria na manatana toa eki e thathamii ra.

⁷ Ma lalae mai, si mana na tha Samabalata, ma tha Tobaea, ma toa eki i Arebia, ma Amonaete ki, ma toa na i Asadodo, kilu roṉoa sulufau i Jerusalema ki kera uia ka tae, ma keka thafalii ladoa si kula eki ne aga, toa eki kiku bii rakeiri faamau;

⁸ Ma kilua sui boo kiku furi ṉataa sa kikui lae mai, kikui alasia Jerusalema, kikui suusia si ra eri.

⁹ Una ena mena, ni kamilia mili foa ana thatana God kamilia, mika alua toa na keki fono toi afa thato mafa rodo faisia wane eki.

¹⁰ Ma toa i Juda keka una eri, Sukwaia wane eki na kera ṉali kulua ka oli toli, ma tonee kadee fau ki e oro; adedea misi talaana ui lana sulufau nei.

¹¹ Ma maalimae kamilia ki keka una eri, Kera sa keki thaitoomana e a’i, sa keki rikia e a’i, maasia si kademaṉa na kuka lae, kuka fula imaalutada, kuka thauṉida, kuka adea si ra eri kai sui boo.

¹² Ma lalae mai, si maṉa na Ju eki na keka to bada karaṉi kera kera fula naa, tafulu fa sore lana keka soree isamilia faisia fanua eki sui bana, E a’i si e’i muki oli bomai isamilia.

¹³ Sulia si ade la eki, asi kula na iano ki buriana sulufau eri, ma asi kula ne fane ki, ni nau ku alua toa eki keki takwe sulia ina lana kera ki, fafia nini ni firu kera ki, ma sua kera ki, ma basi kera ki.

¹⁴ Ma nau ku lio, kwa tatae kau, kwa soree isana wane inoto ki, ma wane gwauwai ki, ma oroṉana toa eki, Musi mau ani kera: onotoona fasi Arai Lo, ne inoto me kwaifamaui; muki firu faisia dooramulua kera, ma kaluwane kamulua ki, ma thari kamulua ki, ma kwaimulua ki, ma maafera kamulua ki.

¹⁵ Ma lalae mai, si maṉa na maalimae kamilia ki kera roṉoa na mili thaitoomana naa si ade la na kera manataia na ba, ma tha God ka faaa’ia naa si ṉataa eri na kera furia, kamilia sui bana mika oli sana sulufau eri, wane boo isana ra nia italaana, ta wane boo isana ra nia italaana.

¹⁶ Ma lalae mai, ita asi maṉa eri, ta bali ana wane ni ra nau ki keka ra asi ra nei, ma ta bali iada keka rau ana sua ki, ma talo ki, ma basi ki, ma tooni thalo ki; ma wane gwauwai ki keka to bada iburiana ina lana toa eri sui bana i Juda.

¹⁷ Wane eki na keka uia ada ifafona sulufau, ma wane eki na keka ṉali kulua, bia wane na keka alua si do ki maasida, toa eki sui boo keka ra asi ra nei ata bali aba, ma ata bali aba keka rau ana do ni firua.

¹⁸ Uria na toa ana thauwai la, ta wane si e’i boo, kai kania nini ni firu nia i litana asi maṉa nia kai ra ana thauwai la. Ma wane ana ufi lana buṉu ka to bana isaku.

¹⁹ Ma nau ku una eri isana wane inoto eki, ma wane gwauwai ki, ma oroṉana toa eki, Ra nei e baita ma ka tekwa, ma ni kulu kuka to asi kula oro eeta ki fafia sulufau nei, kuka ni da faisi kulu kwailiu.

²⁰ Atona bana si kula na toto muka roṉoa keki ufia buṉu iei, muka bii ofu mai isamilia uria si kula eri: God kulu kai firu ifakulua.

²¹ Mania mika ulafu asi ra nei: ma ta bali iada keka rau ana sua eki, ita asi maṉa fanua ka bii dani, ka fula asi maṉa bubulu lo ki kai maṉo mai.

²² Asi ade la unei asi maṉa eri, nau ku soree isana toa eki, Kera sui boo bia wane ni ra kera ki, keka to bada i la toaa susu i Jerusalema, fasi keki fono toi kali kulu afa rodo, ma keki ulafu ana ra la afa thato.

²³ Mania ni nau, ma dooraku kera, ma wane ni ra nau ki, ma wane eki ana fono toi la kali nau na kera lae buriaku, e a’i bana ta wane ani kamilia si tanusia tooni nia ki; kamilia sui bana mili lae uria kafo fafia rauma kamilia ki.