Nehemiah 2 - Ṉa Alaofua Falu 1923 1949

¹ Ma lalae mai ana fa madami Nisana ana ruana taṉafula fa ṉali kiṉa nei na tha Atasasisi, ta si waene ni inaofana: ma nau ku tafoa si waene eri, ku falea isana kiṉa nei. Ma inao mai maaku si lilio ni liodilaa inaofana.

² Sulia si kula eri kiṉa nei ka soree isaku, Uria ta na maamu ka lio ni liodilaa, mado sosi matai mena? e a’i lau ta si do si uri oe, talitoona bana i la ruruumu ka taa. Sui nau ku aanu faamau.

³ Ma nau ku una eri sana kiṉa nei, Kiṉa nei kai to ladoa: nifana ade lana fasi maaku si lio ni liodilaa, asi maṉa na toaa susu, na si kula ana kwaiṉeia maka nau inao ki, kera labatania, ma baba eki ana maethakaa nia ki era e akofi teefau naa ania?

⁴ Sui kiṉa nei ka una eri isaku, Ta neri noko gani nau uria? Mania nau ku foa ana thatana tha God na i thalo lo.

⁵ Ma nau ku una eri sana kiṉa nei, Mado so e lea iana kiṉa nei, ma mada sa wane ni ra oe e fulatoona kwaiofei la i maamu, nau ku thathamia soki arasi nau kwai lae uri Juda, uria toaa susu eri ana kwaiṉeia maka nau inao ki, fasi kwai kasia.

⁶ Ma kiṉa nei ka soree isaku (gwaulii ei eri na kwaina ka ono lau boo isana), Laea oe eri sulia ta fita fa boṉi? ma oki oli mai iaṉita? Mania do lea iana kiṉa nei kai arasi nau kwai lae; ma nau ku gwalua ta si maṉa ifana.

⁷ Ma nau ku sorea lau isana kiṉa nei, So e lea iana kiṉa nei, keki falea akua tei leta isana wane eki na keka gwauwai ibali labaa ana kafo baita nei, keki adomi nau kau lalae kwa fula i Juda;

⁸ Ma akua ta leta isatha Esafa, na wane ni beta la sulia masuu kiṉa nei, ’ai oro ki ni iei, fasi kai falea akua tei rebee ai ki fasi kwai thauwai nia ma’e ’ai ki ifana baba maethakaa ki i la labata ana biu baita eri, ma ifana sulufau kakalia toaa susu eri, ma ifana maafera ni nau kwai kotho isana. Ma kiṉa nei kai falea boo si do eki sulia abana God nau ne lea fafi nau.

⁹ Sui lalae ku fula isana wane eki na kera gwauwai ibali labaa ana kafo baita eri, ku falea leta eki iada ne ita mai ana kiṉa nei. Ma kiṉa nei e arasia wane inoto ki ana omea, ma wane na keka ono i suila hosi ki, keka lae bi nau.

¹⁰ Si maṉa na tha Sabalata ṉa Horonaete, ma wane ni ra eri na tha Tobaea ṉa Amonaete kero roṉoa, keko bii liodila faamau, sulaania wane ne fula mai fasi kai adomia kwalafaa tha Isirela ki.

¹¹ Mania ku fula i Jerusalema, kwa to sulia ulu fa boṉi.

¹² Ma nau ku tatae afa rodo, ni nau bia ṉadee wane na kera abetai nau; me a’i kwasi faaroṉoa ta wane asi do na tha God e alua i ruruuku kwa ilia i Jerusalema: me a’i lau ta hosi bi nau, talitoona bana hosi eri na nau ku ono i suila.

¹³ Ma nau ku kotho kau afa rodo ana maethakaa i la kurua, otofana malaui kafo koito kwasi, lalae ku fula ana maethakaa do eki na kera naṉa ania i la taerau, ku lio tete uria sulufau eki i Jerusalema na kera ogea naa, ma baba eki ana maethakaa nia ki era e akofi teefau ania.

¹⁴ Sui ku lae uria maethakaa ruka‐mauri eri, ma ma’e kafo kiṉa: sui e a’i ta si kula si tonee to sa hosi eri ifaraku kai tatha iei.

¹⁵ Sui ku tae kau afa rodo i ninimana darigwaugwau eri, ku lio tete uria sulufau; ku akele buri, ku kotho lau ana maethakaa eri la kurua, ku oli lau bomakua.

¹⁶ Ma wane gwauwai ki kera dora asi kula ku lalae uria, ma si ade la ku ilia na ba; me a’i kwasi faaroṉoa u Ju ki, mado wane ni foa ki, mado wane inoto ki, mado wane gwauwai ki, mado oroṉana toa na keki ilia ra eri.

¹⁷ Sui ṉau ku soree isada, Kamulua mulu rikia taa la na kulu ni ania neri, kera labatania Jerusalema, ma baba eki ana maethakaa nia ki era e akofi teefau naa ania: lae si mai, kulu uia lau sulufau i Jerusalema, fasi kusi toto lau ana faare faekwa la iakulua neri.

¹⁸ Sui nau ku faaroṉoda ana abana God nau ne lea fafi nau; ma ana ṉata lana kiṉa nei ne ṉata lau bana sulia isaku na ba. Ma keka una eri, Kulu tae fasi, kuki uia boo. Mania keka faasukwaia abada uria si ra lea eri.

¹⁹ Ma si maṉa na Sabalata ṉa Horonaete, ma wane ni ra eri na tha Tobaea ṉa Amonaete, ma tha Gasemu na wane i Arebia, kera roṉoa, keka waela, keka aefara iamilia, keka faare faekwa ani kamilia, keka una eri, Si ta neri na ni kamulua muki ilia? muki firu bia kiṉa nei, mado?

²⁰ Ma ni nau ku luua ṉata lada, kwa soree isada, Tha God ana i thalo lo, ni nia kai alua mamanaa fafi kamilia; uria si kula eri ni kamilia na wane ni ra nia ki miki tae, miki uia sulufau: ni kamulua molo, e a’i amulua ta si kula, mado ta si do thatamulua, mado ta si ade la sa keki manatai kamulua ania i Jerusalema.