Nehemiah 13 - Ṉa Alaofua Falu 1923 1949

¹ Afa boṉi eri, si maṉa na oroṉana toa eki keka roṉoi, keka teemai la buka tha Mosisi, ma keka fulatoona kekeda la nei, Wane ana Amonaete ki ma wane ana Moabaete ki, kera lufia ka a’i si lae mai sana ofu la toa tha God toto si sui;

² Uria ne a’i kesi toda na ba ana kwalafaa tha Isirela fafia ta si berede ma ta si kafo; kera folia tha Belama sa kai suusida, sa kai alua taa la fafida: una ena mena, God kamilia e bulasia taa la eri ka lioe lea la.

³ Ma lalae mai, roṉoa naa lo nei, keka bii lalakwatai nia malului wane eki na kwalafana toa na kera tole kini mado kera toowane ana toa ithara ki, sorea keki to eeta faisia Isirela.

⁴ Ma asi maṉa inaona si ade la eri, wane ni foa eri na tha Ilaesifu, na kera alua fasi kai nanao ana kadee biu eki ana biu God kamilia, e ado bia tha Tobaea;

⁵ Mania e betaa kadee biu baita ifana, asi kula eri na kera alua inao mai do ni foa la ki ana mila, ma si do inoto ki thasuna ka makwa lea, ma kwadee do eki, ma taṉafula koni eri, ma si waene, ma si gwai, na kera falea naa sulia si ṉataa fifi eri, ifana Lifaete ki, ma toa ni ṉu ki, ma wane ni fono toi kalia maethakaa ki; ma do ni foa la na kera tafoa iaa ki, si do ifana wane ni foa ki neri.

⁶ Ma sui asi maṉa eki sui bana ni nau e a’i kwasi to i Jerusalema: uria na ana ula taṉafula fa ṉali ma ruana ana to lana tha Atasasisi ṉa kiṉa i Babilone, nau ku lalae kau isana kiṉa nei, ma buriana tei fa boṉi ku gania kiṉa eri sa kai alamatai nau kwai oli:

⁷ Sui ku fula lau mai i Jerusalema, ku thaitoomana maalutana si ade la taa eri na tha Ilaesifu e ilia ifatha Tobaea, ne betaa kadee biu ifana i la labata ki ana biu tha God.

⁸ Ma si ade la eri ka taa faamau iaku: mania nau ku naṉa kania ithara faisia kadee biu eri si do nei ki sui bana ana maafera tha Tobaea.

⁹ Sui nau ku ṉata fifi, ma keka taua kadee biu eki ka faalu: sui kwadee do eki ana biu tha God, bia do ni foa la eki asi mila, bia si do inoto eki thasuna ka makwa lea, nau ku oli fafia uri la kadee biu eki.

¹⁰ Ma nau ku rikia ne a’i kesi falea moriṉa Lifaete ki ifada; adedea Lifaete eki ma toa eki ni ṉu la na kera ilia si ra eri, kera thaka naa, wane boo uria bali gano nia, ta wane boo uria bali gano nia.

¹¹ Sui nau ku ṉata ni firua bia wane gwauwai ki, ku una eri, Kera luka faekwa ana biu tha God uria ta? Ma nau ku ofua wane eki, ku aluda asi kula ne talaada.

¹² Sui toa Juda ki sui boo keka ṉalia mai taṉafula koni eri, ma si waene, ma si gwai, isana si kula eki ana ogogonia ki.

¹³ Ma nau ku alua tei wane keki nanao asi kula eki ana ogogonia ki, wane ni foa na tha Selemaea neri, ma wane ni kekeda na tha Sadoka, ma ana Lifaete ki tha Bedaea: ma iburiada tha Anana kaluwane tha Saka, kaluwane tha Matanaea: uria na kera sorea sulia wane eki na wane mamana ki neri, ma ra kera na toli la ifana ina lada kera.

¹⁴ God nau ae, oko onotooku sulia si ade la eri, mosi usua kau si ade la lea nau ki na nau ku ilia na ba ifana biu God nau, ma si ra ne farana sa keki ilidaki ifana.

¹⁵ Afa boṉi eki nau ku rikia i Juda tei toa keki buria si kula taala waene ki afa boṉi mamaloa, keki ṉalia mai ifii koni ki, keki alua i suila ase ki; keka ade una eri lau boo asi waene, ma foee faene ki, ma foee thakwari ki, ma si do oro eeta ki kwailiu ne kulua, na keka ṉalia mai uri Jerusalema afa boṉi mamaloa: ma nau ku faamamanea si do taa ki ku thaitoomana suli kera afa boṉi eri na kera usi asi faṉa.

¹⁶ Ma tei wane i Taera kera ni lau boo asi kula eri, na keka nalia mai gwa i’a ki, ma si do oro ni usi la anidaki ne eeta kwailiu, ma keka usi ania afa boṉi mamaloa isana kwalafaa tha Juda, ma i Jerusalema.

¹⁷ Sui nau ku ṉata ni firua bia wane inoto Juda ki, ku una eri isada, Si ade la taa ta na muka ilia neri, muka faawaludaa fa boṉi mamaloa?

¹⁸ Ta na sa maka kamulua totonao ki kera ade una eri, mado? ma God kulu e ṉalia mai taa la nei sui boo fafi kulu ma fafia toaa susu nei inunufana, mado? una ena mena, muka ṉalia mai ta si rakeiria lau fafia Isirela sulia abula lamulua ana faawaluda lana fa boṉi mamaloa neri.

¹⁹ Ma lalae mai, asi maṉa na fanua ka thafalii rodo i la maethakaa Jerusalema ki inao ana fa boṉi mamaloa, nau ku ṉata fifi sa keki fonoa baba eki, ku lufida kesi ifinia lau maasia sui lana fa boṉi mamaloa eri: ma nau ku alua tei wane ana wane ni ra nau ki keki to isana maethakaa eki, ada keka ṉalia mai ta si do kulua afa boṉi mamaloa.

²⁰ Mania wane na keka usia do ana todado la ki, ma wane na kera usi asi do ki sui bana ne eeta kwailiu, keka teo ada ithara karaṉia Jerusalema tee fa teo la mado ta ro fa teo la.

²¹ Sui ni nau ku faamamanea si do taa ku thaitoomana suli kera, ku una eri isada, Mulu teo kakalia sulufau nei uria ta? mada sa ruana muka ilia lau si ade la unei, nau kwai rau fafi kamulua. Ita asi maṉa eri ka lae alaa, kesi lae lau mai afa boṉi mamaloa.

²² Ma nau ku nata fifi sana Lifaete ki sa keki faafaalu kera italaada, sui keki lae mai, keki fono toi kalia maethakaa ki, fasi keki abutei nia fa boṉi mamaloa. God nau ae, oko onotooku fasi sulia si ade la nei lau boo, ma oki suusia taa la faisi nau asi lio oe ana tatakomi la baita.

²³ Afa boṉi eki lau boo nau ku rikia Ju eki na kera tole kini i Asadoda, ma i Amona, ma i Moaba.

²⁴ Ma wela kera ki, ta bali ana ṉata lada na ṉataa toa i Asadoda, ma keka dora ania ṉata la ana ṉata lana Ju ki, keka ṉata ada ana ṉata lana kulee toa eki ne eeta kwailiu.

²⁵ Ma nau ku ṉata ni firua bida, ku alua taa la fafi kera, ku kwakwaea tei wane iada, ku lafua ifuda faisida, ku suuwanida keka othi ana thatana tha God, ku una eri, E a’i dodoloa muka falea thari kamulua ki ifana kaluwane kera ki; e a’i dodoloa muka tolea thari kera ki ifana kaluwane kamulua ki, mado fani kamulua italaamulua.

²⁶ Ta na sa tha Solomona, kiṉa ba i Isirela, e abula taa sulia si ade la una eki, mado? ma sui imaalutana kulee toa oro ki e a’i lau ta kiṉa ne ’uri nia, ma God nia e liothau iana, ma tha God e alu nia ṉa kiṉa e gwauwai ana Isirela ni sui bana: una ena mena, kini ana fanua eeta ki kera ilia na wane nei mena ka abula taa boo.

²⁷ Sui miki fafurono kamulua, mado? sa miki ilia si do taa eki sui bana ne baita, sa miki ade faisia bae lana God kulu, miki tole kini ana thari kulee toa eeta ki?

²⁸ Ma tee nonii wane ana kaluwane tha Joida ki, na kaluwane aofia ni foa eri na tha Ilaesifu, e fuṉao tha Sabalata ṉa Horonaete: mania nau ku tari nia ka thaka faisi nau.

²⁹ Oko onotooda fasi, God nau ae, uria na kera faasuaa to lana wane ni foa ki, ma alaofua ba na wane ni foa ki ma Lifaete ki kera kania na ba.

³⁰ Asi ade la una eri nau ku faafaalu kera faisia kulee toa eeta ki sui bana, ku alua si ofu la ni ra ki fana wane ni foa ki ma Lifaete ki, wane boo si ra nia, ta wane boo si ra nia;

³¹ Ma ifana oke ’ai eki na keki falea asi maṉa na kera gwaludaki, ma ifana foee ’ai totonao ki. God nau, ae oko onotooku fasi asi lio ne lea.